ސްވިމިންގ އެސޯސިއޭޝަން އޮފް މޯލްޑިވްސްއާ ދާދީ ފަހުން ހަވާލުކުރެވުނު ހުޅުމާލޭ ސްވިމިންގ ޕޫލް ފީ ނަގައިގެން އާންމުންނަށް ދޫކުރަން ނިންމައިފިއެވެ.
ސްވިމިންގ އެސޯސިއޭޝަނުން އާންމުކުރި ދެންނެވުމެއްގައި ބުނެފައިވަނީ އެ އެސޯސިއޭޝަނުން މިހާރު ބަލަހައްޓަމުންގެންދާ ހުޅުމާލޭ މިނީ ސްޕޯޓްސް ކޮމްޕްލެކްސްގައި ހަދާފައިވާ ސްވިމިންގ ޕޫލް މެންބަޝިޕް އުސޫލުން އާންމުންނަށް ބޭނުންކުރެވޭ ގޮތަށް ހުޅުވާލުމަށް ނިންމާފައިވާ ކަމަށެވެ. އެގޮތުން އާންމު ދިވެހިންގެ މެންބަޝިޕް ފީ އަކީ މަހަކު 1،500 ރުފިޔާ ނުވަތަ ދުވާލަކު 150 ރުފިޔާ ކަމަށެވެ. އަދި މި އަގު ދައްކައިގެން ޕޫލް ބޭނުން ކުރެވޭނީ ދުވާލަކު އެއް ގަޑިއިރު ކަމަށްވެސް ބުނެފައިވެއެވެ.
މީގެ އިތުރުން ބިދޭސީންގެ މެންބަޝިޕް ފީ އަކީ މަހަކު 3،000 ރުފިޔާ ނުވަތަ ދުވާލަކު 300 ރުފިޔާ ކަމަށާއި، މިއީ ދުވާލަކު އެއް ގަޑިއިރު ބޭނުން ކުރެވޭ ފީއެއް ކަމަށްވެސް ވަނީ ބުނެފައެވެ.
ޕޫލް ބޭނުންކުރާ އެންމެންވެސް ޕޫލް ބޭނުންކުރުމުގެ އުސޫލުތަކަށް އަމަލުކުރަންވާނެ ކަމަށާއި، ޕޫލް ބޭނުންކުރަން ފުރުސަތު ދޭނީ ނަން ނޯޓުކުރާ ތަރުތީބުން ކަމަށްވެސް ސްވިމިންގ އެސޯސިއޭޝަނުން ބުނެއެވެ. އަދި އާންމު ފަރާތްތަކަށް ޕޫލް ބޭނުންކުރުމުގެ ފުރުސަތު ދެވޭނީ، ފެތުމުގެ ގައުމީ ސްކޮޑުތަކުގެ ފެތުންތެރިންނާއި، ސްވިމިންގ އެސޯސިއޭޝަނުގެ މެންބަރު ކުލަބުތަކުގެ ތަމްރީނުތަކަށް ބޭނުންކުރާ ވަގުތުތައް ފިޔަވައި އިތުރު ވަގުތުތަކުގައި ކަމަށްވެސް ސްވިމިންގ އެސޯސިއޭޝަނުން ބުނެއެވެ.
މީގެ އިތުރުން ހުކުރު ދިވަހާއި ހޮނިހިރު ދުވަސް ހާއްސަކޮށްފައިވަނީ އާއިލާތަކަށާއި، ގުރޫޕުތަކަށް ކަމަށާއި، އާއިލާތަކަށާއި ގްރޫޕުތަކަށްވެސް ޕޫލް ބޭނުންކުރެވޭނީ ކަނޑައެޅިފައިވާ ފީ ދެއްކުމަށްފަހު ކަމަށްވެސް އެ އެސޯސިއޭޝަނުން ވަނީ ބުނެފައެވެ. އަދި މުބާރާތް ފަދަ އިވެންޓުތައް ބޭއްވުމަށްވެސް ޕޫލް ދޫކުރުމަށް ނިންމާފައިވާ ކަމަށްވެސް ސްވިމިންގ އެސޯސިއޭޝަނުން ބުނެއެވެ.
