ގްރީލިޝް ހޯދުމަށް ލިވަޕޫލުންވެސް މަސައްކަތްކުރަނީ

އެސްޓަން ވިލާއަށް ކުޅެމުން އަންނަ އިންގްލެންޑުގެ މިޑްފީލްޑަރު ޖެކް ގްރީލިޝް ހޯދުމަށް ލިވަޕޫލުންވެސް މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

މީގެ ކުރިން ގްރީލިޝް ހޯދުމަށް މަސައްކަތް ކުރަމުން އައީ މެންޗެސްޓާ ސިޓީ އާއި މެންޗެސްޓާ ޔުނައިޓެޑުންނެވެ. އެކަމަކު ދާދި ފަހުން އިނގިރޭސި މީޑިއާތަކުން ވަނީ ގްރީލިޝްއަށް އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން ލިވަޕޫލުންވެސް ފާރަލަމުން އަންނަ ކަމަށް ރިޕޯޓުކޮށްފައެވެ.

ލިވަޕޫލުން ގްރީލިޝް ހޯދުމަށް މަސައްކަތް ކުރަމުން އަންނަ ކަމަށް ރިޕޯޓުތައް ބުނިއިރު، ލިވަޕޫލަށް ކުޅެމުން އަންނަ މިސްރުގެ ފޯވާޑް މުޙައްމަދު ސަލާހު އެ ޓީމު ދޫކޮށްލަން ބޭނުންވާ ކަމަށް ދާދި ފަހުން މީޑިއާތަކުން ވަނީ ރިޕޯޓުކޮށްފައެވެ.

ގްރީލިޝްއަށް ޕްރިމިއާ ލީގުގެ ބޮޑެތި ކުލަބުތަކުން ފާރަލި ނަމަވެސް، މި އަހަރުގެ ސެޕްޓެމްބަރު މަހުގެ ތެރޭގައި އުމުރުން 25 އަހަރުގެ މިޑްފީލްޑަރު ވަނީ ވިލާގެ އެއްބެސްވުން އިތުރު ފަސް އަހަރަށް އާކޮށްފައެވެ. އެހެންކަމުން 2025 ވަނަ އަހަރުގެ ހޫނު މޫސުމުގެ ނިޔަލަށް އޭނާ ވިލާގައި މަޑުކުރާނެއެވެ. ރިޕޯޓުތައް ބުނާ ގޮތުން ވިލާގެ އެއްބަސްވުން ދިގު މުއްދަތަކަށް ގްރީލިޝް އާކުރުމާ ގުޅިގެން، އޭނާ ހޯދަން ބޭނުންވާ ކުލަބަކުން 100 މިލިޔަން ޕައުންޑް ޚަރަދުކުރަން ޖެހޭނެއެވެ.

ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ ގްރީލިޝް ވަނީ ސެޕްޓެމްބަރު މަހުގެ ކުރީކޮޅު ކުޅުނު ޔުއެފާ ނޭޝަންސް ލީގުގެ މެޗުތަކަށް އެކުލަވާލި އިންގްލެންޑުގެ ގައުމީ ފުޓްބޯޅަ ޓީމުގެ ސްކޮޑުންވެސް ފުރުސަތު ހޯދާފައެވެ. އަދި ޑެންމާކާ ދެކޮޅަށް އިންގްލެންޑް ކުޅުނު މެޗުގައި ގްރީލިޝް ކުޅުނުއިރު، އެ މެޗަކީ އިންގްލެންޑުގެ ޖާޒީގައި ގްރީލިޝް ކުޅުނު ފުރަތަމަ މެޗެވެ. އަދި އޭގެ ފަހުން ގްރީލިޝް ވަނީ ނޭޝަންސް ލީގުގައި އިންގްލެންޑުން ކުޅުނު މެޗުތަކުގައި އެ ޓީމުގެ މެދުތެރޭގައި މުހިންމު ދައުރެއް އަދާކޮށްފައެވެ.

އުމުރުން އެންމެ ހަ އަހަރުގައި ވިލާއާ ގުޅުނު ގްރީލިޝް، ވިލާގެ ސީނިއާ ޓީމަށް އެންމެ ފުރަތަމަ މެޗެއް ކުޅެދީފައިވަނީ 2014 ވަނަ އަހަރުގެ މެއި މަހުގައެވެ. އޭގެ ފަހުން ގްރީލިޝް ވަނީ މިހާތަނަށް ވިލާއަށް ކުޅެދިން 199 މެޗުގައި 31 ލަނޑު ކާމިޔާބުކޮށްފައެވެ.