މިހާރު ދިމާވެފައިވާ އެންމެ ބޮޑު މައްސަލައަކީ އޭޕްރަންގެ ޖާގަ ކުޑަވުން: އެމްއޭސީއެލް
22 ޑިސެމްބަރު 2020 | އަންގާރަ 04:47ކޮންސްޓްރަކްޝަންގެ މަސައްކަތްތައް ކުރިއަށްދޭ
ފަލަސުރުހީ ޕްރޮގްރާމްގެ ތެރެއިން އެމްއޭސީލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް
ވެލާނާ އިންޓަނޭޝަނަލް އެއަރޕޯޓު (ވީއައިއޭ)ގެ އޭޕްރަންގެ ޖާގަ ކުޑަވުމަކީ މިހާތު ދިމާވެފައިވާ އެންމެ ބޮޑު މައްސަލަ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
ރާއްޖެޓީވީގެ ''ފަލަސުރުހީ'' ޕްރޮގްރާމްގައި އެމްއޭސީލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް ވިދާޅުވީ އޭޕްރަން އެއްބައި ތަރައްގީ ކުރުމުގެ މަސައްކަތްތައް ކުރިއަށްދާ ކަމަށާއި، ކޮންސްޓްރަކްޝަންގެ މަސައްކަތްތައް ވެސް ކުރިއަށްދާ ކަމަށެވެ. އަދި އެމަސައްކަތްތަކާއެކު ފްލައިޓްތަކުގެ އޮޕަރޭޝަންސްތައް ކުރިއަށް ގެންދިއުމަކީ މިހާރު ކުރިމަތިވާ އެންމެ ބޮޑު ޗެލެންޖިން މަސައްކަތް ކަމަށް އޭނާ ވިދާޅުވިއެވެ.
މީގެ އިތުރުން އަރީފް ވިދާޅުވީ މޫސުން ގޯސްވެ ވައިގަދަވުމުން ބައެއް ހާލަތްތަކުގައި ފްލައިޓަށް ނުޖެއްސި މަޑުކުރަން ޖެހޭ ކަމަށެވެ.
ސިންގަލް ރަންވޭއެއް ނަމަވެސް މެނޭޖްކުރެވޭކަން ފާހަގަކުރައްވައި އަރީފް ވިދާޅުވީ އަންނަ އަހަރުގެ ތެރޭގައި ގާތްގަނޑަކަށް ހުރިހާ ކަމެއް ހައްލުވެ އޮޕަރޭޝަންސްތައް ވަރަށް ރަނގަޅަށް ''ސްމޫތު''ކޮށް ދާނެ ކަމަށެވެ.
ކޮވިޑް-19ގެ ހާލަތަށް އަލިއަޅުއްވާލައްވާ އަރީފް ވިދާޅުވީ ދަތިތައް ކުރިމަތިވިކަމުގައިވީ ނަމަވެސް އާންމު ރައްޔިތުންގެ ސަލާމަތާއި ރައްކާތެރިކަމަށް އިސްކަންދޭ ކަމަށާއި، ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާއި އެއްގޮތަށް އަމަލުކުރާ ކަމަށެވެ.
އެގޮތުން ފަތުރުވެރިންނާއި އެހެނިހެން ދަތުރުވެރިންނަށް ރައްކާތެރި ގޮތެއްގެ މަތިން ޚިދުމަތް ފޯރުކޮށްދޭ ތަނަކަށް ހެދުމަށް ހަރުދަނާ ފިޔަވަޅުތަކެއް ވަނީ އަޅާފައެވެ. އަދި، ދަތުރުވެރިންނަށް ވީހާވެސް ތަކުލީފު ކުޑަވާނެ ގޮތަކަށް އިންތިޒާމުތައް ހަމަޖައްސަމުންދެއެވެ.
