ފްރެންޗް ލީގުގައި އާދީއްތަ ދުވަހުގެރޭ ލިލް އާއި އެންމެ ފަހުގެ ޗެމްޕިއަން ޕީއެސްޖީ ބައްދަލުކުރި މެޗު އެއްވަރުވެގެން ނިމިއްޖެއެވެ.
ލިލްގެ ދަނޑުގައި ކުޅުނު މި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.
ޕީއެސްޖީއަށް ކުޅެމުން އަންނަ ބްރެޒިލުގެ ތަރި ނޭމާ އަދިވެސް އަނިޔާގައި ކުޅުމާ ދުރުގައި ހުރިއިރު، މި މެޗު ޕީއެސްޖީން ފެށީ އެ ޓީމުގެ ޒުވާން ތަރި ކީލިއަން އެމްބާޕޭ ބެންޗުގައި ބައިންދައިގެންނެވެ.
މި މެޗުގެ ކުރީކޮޅު ޕީއެސްޖީގެ އެންހެލް ޑި މާރިއާ ހުރަސްކޮށްދިން ބޯޅައަކުން ރަފީނިއާ އަލްކަންޓާރާ ފޮނުވާލި ހަމަލާ ގޯލު ދަނޑި ކައިރިން ބޭރަށް ދިޔައިރު، އޭގެ ފަހުން މޮއިސް ކީން ފޮނުވާލި ހަމަލާއެއް ލިލްގެ ގޯލްކީޕަރު ވަނީ މަތަކޮށްފައެވެ.
އަދި ދެވަނަ ހާފުގައިވެސް ޕީއެސްޖީގެ ކީންއަށް ވަނީ ލީޑު ނަގަން ރަނގަޅު ފުރުސަތެއް ލިބި ބޭކާރުވެފައެވެ. މި ހާފުގައި ލިލްގެ ބުރަކް ޔިލްމާޒް ނުރައްކާތެރި ހަމަލާއެއް އުފެއްދި ނަމަވެސް، އޭރިއާ ބޭރުން ފޮނުވާލި މި ބާރު ހަމަލާ ޕީއެސްޖީގެ ގޯލްކީޕަރު ކޭލޯ ނަވާސް ވަނީ ދިފާއުކޮށްފައެވެ.
މި މެޗު އެއްވަރުވުމާއެކު ޕީއެސްޖީއަށް ވަނީ ތާވަލުގެ އެއްވަނައަށް އަރަން ލިބުނު ފުރުސަތު ގެއްލިފައެވެ. ތާވަލުގެ އެއްވަނައިގައި އޮތް ލިލް އާއި ދެވަނައިގައި އޮތް ލިޔޯނަށް 16 މެޗުން 33 ޕޮއިންޓް ލިބިފައިވާއިރު، ތިންވަނައިގައި އޮތް ޕީއެސްޖީއަށް 16 މެޗުން ލިބިފައިވަނީ 32 ޕޮއިންޓެވެ.
