ދަ ގްރާންޑޭ އާއި ސަސްގެ ކުރިމަތިލުން އެއްވަރު

ދިރާގު ދިވެހި ޕްރިމިއާ ލީގުގައި އާދީއްތަ ދުވަހުގެ ހަވީރު ދަ ގްރާންޑޭ ސްޕޯޓްސް ކުލަބާއި ސުޕަ ޔުނައިޓެޑް ސްޕޯޓްސް (ސަސް) ބައްދަލުކުރި މެޗު އެއްވަރުވެގެން ނިމިއްޖެއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗު އެއްވަރުވީ 1-1 ންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ދެ ޓީމަށްވެސް ވަނީ ލީޑު ނަގަން ރަނގަޅު ފުރުސަތުތަކެއް ލިބިފައެވެ. އެގޮތުން މެޗުގެ އަށްވަނަ މިނެޓުގައި ދަ ގްރާންޑޭގެ ޚައިދަރޯފް އޮޓަބެކަށް ހުސް ފުރުސަތެއް ލިބުނު ނަމަވެސް، އޭރިއާ ތެރެއިން އޭނާ ފޮނުވާލި ބޯޅަ ސަސްގެ ގޯލްކީޕަރު މިރްޒޮހިދު މަމަކްތޯނޯފް ވަނީ ދިފާއުކޮށްފައެވެ. އޭގެ ފަހުން މެޗުގެ 29 ވަނަ މިނެޓުގައި ދަ ގްރާންޑޭގެ ކެޕްޓަން ޔަސްފާދު ހަބީބް (މުލަކޭ) އޭރިއާ ބޭރުން ބާރު ހަމަލާއެއް ފޮނުވާލިއިރު، މި ހަމަލާވެސް ސަސްގެ ގޯލްކީޕަރު ދިފާއުކުރިއެވެ.

ފުރަތަމަ ހާފުގައި ލީޑު ނަގަން އެންމެ ހުސް ފުރުސަތުތަކެއް ލިބުނީ ސަސްގެ ޔޫސުފް ޖުނައިދު ޒާހިރަށެވެ. އެގޮތުން މެޗުގެ 30 ވަނަ މިނެޓުގައި ގޯލު ކުރީމަތީގައި ހުހަށް ހުރެ ޖުނައިދު ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. އަދި އޭގެ ފަހުން ފުރަތަމަ ހާފުގެ ފަހު މިނެޓުގައިވެސް ޖުނައިދަށް ވަނީ ހުސް ފުރުސަތެއް ލިބި ބޭކާރުވެފައެވެ.

ދެވަނަ ހާފުގައިވެސް ދެ ޓީމުގެ ފަރާތުން ރަނގަޅު ކުޅުމެއް ފެނިގެންދިޔައިރު، މި ހާފުގައި އެންމެ ފުރަތަމަ ލަނޑު ޖަހާ ލީޑު ނެގީ ދަ ގްރާންޑޭއިންނެވެ. މެޗުގެ 60 ވަނަ މިނެޓުގައި އުމަރުޔޯނޯފް އަކްރޯރް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އަލީ އިފާޒެވެ. އަދި އޭގެ ހަތަރު މިނެޓު ފަހުން އޭރިއާ ތެރެއިން ދަ ގްރާންޑޭގެ ޚައިދަރޯފަށް ސަސްގެ އަޙްމަދު އައިހަމް ފައުލް ކުރުމުން ދަ ގްރާންޑޭއަށް ވަނީ ލީޑު ފުޅާކުރަން ޕެނަލްޓީއެއްވެސް ލިބިފައެވެ. އެކަމަކު ޚައިދަރޯފް ފޮނުވާލި ޕެނަލްޓީ ސަސްގެ ގޯލްކީޕަރު ވަނީ ދިފާއުކޮށްފައެވެ. އޭގެ މިނެޓެއް ފަހުން ސަސްއިން މެޗުގައި ނަތީޖާ އެއްވަރުކުރިއިރު، މި ލަނޑު އެ ޓީމަށް ކާމިޔާބުކޮށްދިނީ ޖަޕާނުގެ ފޯވާޑް އަޓްސުޝީ ޔޮނެޒޭވާއެވެ.

މި މެޗު ދަ ގްރާންޑޭއިން ނިންމާލީ އެއް ކުޅުންތެރިޔަކި މަދުކޮށެވެ. އެއީ މެޗުގެ އިތުރު ވަގުތުގައި އެޓީމުގެ ޑިފެންޑަރު އަޙްމަދު ސައިޒާނަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމާ ގުޅިގެންނެވެ.

މެޗަށްފަހު ދަ ގްރާންޑޭގެ ކޯޗު އިސްމާޢީލް މަހަފޫޒް (އިންމަ) ބުނީ ކުރީ މެޗެކޭ އެއްގޮތަށް މި މެޗުގައިވެސް ކުޅުންތެރިން ރަނގަޅު ކުޅުމެއް ދެއްކި ކަމަށާއި، އެކަމަކު މެޗުން މޮޅެއް ނުލިބުނީ ހެދުނު ބައެއް ގޯސްތަކުގެ ސަބަބުންނާއި ނަތީޖާ ނަގަން ލިބުނު ފުރުސަތުތަކުގެ ބޭނުން ނުހިފުމުން ކަމަށެވެ.

ސަސްގެ ކޯޗު އަޙްމަދު ނާޝިދު (ނާދު) ބުނީ މި މެޗުން ޕޮއިންޓެއް ލިބުނީތީ ހިތްހަމަޖެހޭ ކަމަށެވެ. އަދި އެ ޓީމުގެ ބިދޭސީ ފޯވާޑް އަނިޔާގައި އުޅޭތީ ނުލައި ކުޅެން ޖެހުމުން ދަތިތަކެއް ކުރިމަތިވާ ކަމަށާއި، އެއާއެކުވެސް މެޗުން ޕޮއިންޓެއް ލިބުނީ ކުޅުންތެރިންގެ ހިތްވަރުން ކަމަށްވެސް ނާދު ބުންޏެވެ.

އާދީއްތަ ދުވަހުގެ ހަވީރު ކުޅުނު މެޗުން ދަ ގްރާންޑޭ އާއި ސަސް އެއްވަރުވިއިރު، މި ދެ ޓީމަށްވެސް މިހާތަނަށް ވަނީ ހަތަރު ޕޮއިންޓް ލިބިފައެވެ. އެގޮތުން ލީގުގައި ކުޅުނު ފުރަތަމަ މެޗުތަކުން ދަ ގްރާންޑޭ އާއި ސަސް ވެސް ވަނީ މޮޅެއް ހޯދާފައެވެ.