ގައުމުތަކަށް ވެކްސިން ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކުރިއަށްގެންދާ "ކޮވެކްސް" ޕްރޮގްރާމްގެ އިތުރުން އިތުބާރު ލިބިފައިވާ އެހެން ވެކްސިންތައް ވެސް ހޯދުމުގެ މަސައްކަތްތައް ކުރިއަށްދާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ބުނެފިއެވެ.
އަންގާރަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ މިހާރު އެންމެ ކުރީގައި އުޅޭ ދެ ވެކްސިނެއް ކަމަށްވާ ފައިޒާ އަދި މޮޑާނާ ވެކްސިން ނުލިބުނު ނަމަވެސް، ކޮވެކްސް ފެސިލިޓީގައި ނުވަ ވެކްސިނެއް ހިމެނޭ ކަމަށެވެ. އޭގެ ތެރޭގައި އޮކްސްފޯޑް ވެކްސިން ވެސް ހިމެނޭ ކަމަށް ޑރ. ނަޒްލާ ވިދާޅުވިއެވެ.
ނަމަވެސް ކޮވިކްސް ޕްރޮގްރާމްގެ ފެއިލްވެ، 2024 ވަނަ އަހަރާ ހަމައަށް ވެސް ފަގީރު ގައުމުތަކުގައި ދިރިއުޅޭ އެތައް ބިލިއަން ބަޔަކަށް ވެކްސިން ނުލިބިދާނެކަމުގެ ބިރު އޮތް ކަމަށް ބޭރުގެ މީޑިއާތަކުގައި ރިޕޯޓުކުރުމާއި ގުޅިގެން އެކަމަށް އިޝާރާތް ކުރައްވާ ޑރ. ނަޒްލާ ވިދާޅުވީ ވެކްސިން ނުލިބޭނެކަން ނިންމަން އަދި އަވަސް ކަމަށެވެ.
ޑރ. ނަޒްލާ ވިދާޅުވީ ކޮވިކްސް ވެކްސިންގެ އިތުރުން އިތުބާރު ލިބިފައިވާ އެހެން ވެކްސިން ހޯދުމަށް ކުރަން ޖެހޭ މަސައްކަތްތައް ކުރަމުންދާ ކަމަށާއި، މިހާރު ވެސް ވަރަށް ގިނަ ގައުމުތަކާއެކު މަޝްވަރާތައް ކުރިއަށްދާ ކަމަށެވެ. އަދި ވެކްސިންގެ އެގްރިމެންޓާއި ހަމައަށް ނުދެވެނީސް މިކަމާއި ބެހޭ އިތުރު ތަފްސީލްތައް ހާމަ ނުކުރެވޭނެ ކަމަށް ޑރ.ނަޒްލާ ވިދާޅުވިއެވެ.
ކޮވިޑް-19ށް ވެކްސިން ހޯދުމަށް ރާއްޖެއިން ކުރަމުންދާ މަސައްކަތުގައި މިހާރު ކޮވެކްސް ފެސިލިޓީން ރާއްޖޭގެ އާބާދީގެ 20 އިންސައްތައަށް ހިލޭ ވެކްސިން ހޯދުމަށް ހުށައެޅި ހުށައެޅުން ރަސްމީކޮށް ޑަބްލިޔުއެޗްއޯއިން ވަނީ ގަބޫލުކޮށްފައެވެ.
ކޮވެކްސް ފެސިލިޓީގެ ދަށުން ރާއްޖެއަށް އެންމެ ފުރަތަމަ ވެކްސިން ލިބޭނީ އާބާދީގެ ދެ ލައްކަ މީހުންނަށްކަމަށް "ރާއްޖެއެމްވީ" އަށް އިތުބާރުކުރެވޭ މަސްދަރަކުން ވަނީ ކަށަވަރުކޮށްދީފައެވެ. އަދި ކޮވެކްސް ފެސިލިޓީގެ ދަށުން ރާއްޖެއަށް ލިބޭ ވެކްސިނެއްގެ ހަތަރު ލައްކަ ޑޯޒް ލިބޭނެއެވެ. ވެކްސިން ރާއްޖެ ގެނައުމުގައި ލަސްތަކެއް ވަނީ ވެކްސިން ރައްކާކޮށްފައި ބަހައްޓާނެ ތަންތަނާ މެދު އަދި ގޮތެއް ނުނިންމޭތީ ކަމަށްވެސް ވަނީ މައުލޫމާތު ލިބިފައެވެ.
