ޖަރުމަނުގައި އެއްދުވަހާ އެންމެ ގިނަ މީހުން މަރުވީ އަންގާރަ ދުވަހު!
17 ޑިސެމްބަރު 2020 | ބުރާސްފަތި 03:24އެގައުމުގައި ކޭސްތައް އިތުރުވެ ލޮކްޑައުންއަކަށް ވަނީ ގޮސްފައި
ޖަރުމަނުގެ ހޮސްޕިޓަލެއްގައި މީހަކަށް ފަރުވާދެނީ
އަންގާރަ ދުވަހު ކޮވިޑް-19 ޖެހިގެން ޖަރުމަނުގައި މަރުވި މީހުންގެ އަދަދު ރެކޯޑް މިންވަރަކަށް އިތުރުވެއްޖެއެވެ.
ޖަރުމަނުގެ ކަމާއިބެހޭ އިދާރާތަކުން ހާމަކޮށްފައިވާ މައުލޫމާތަކަށް ބަލާ އިރު، އަންގާރަ ދުވަހު އެގައުމުން ވަނީ 952 މީހަކު ބަލީގައި މަރުވެފައެވެ. މީގެ ކުރިން އެއްދުވަހާ އެންމެ ގިނައިން މީހުން މަރުވެގެން ރިކޯޑް ކޮށްފައިވަނީ ޑިސެމްބަރ މަހުގެ 11 ވަނަ ދުވަހުއެވެ. އެގައުމުގެ ސީޑީސީގެ ޑާޓާތައް ދައްކާ ގޮތުން މިއީ އެއްދުވަހާ އެންމެ ގިނަ މީހުން މަރުވި ދުވަހެވެ.
ޖަރުމަނުގައި ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު އިތުރުވަމުން އަންނަ އިރު ދުވާލެއްގެ މައްޗަށް އެވްރެޖްކޮށް 30،000 ގާތްކުރާ އަދަދަކަށް މީހުން ޕޮޒިޓިވްވެއެވެ. އެގޮތުން އަންގާރަ ދުވަހު އެކަނި ވެސް 27،728 މީހަކު ވަނީ ޕޮޒިޓިވްވެފައެވެ. އަދި ބުދަ ދުވަހު މި އަދަދު އިތުރުވެ 28،969 މީހަކު ވަނީ ބައްޔަށް ހުށަހެޅިފައެވެ.
ކޮވިޑްގެ ކޭސްތައް އިތުރުވެ އެގައުމުގައި ވަނީ ވަރުގަދަ ލޮކްޑައުންއެއް އިއުލާންކޮށް އަމަލުކުރަން ފަށާފައެވެ. ކޭސްތަކުގެ އަދަދު އިތުރުވަމުން އަންނަ އިރު އެގައުމުގެ އިދާރާތަކުން ބުނެފައިވަނީ ބައެއް ސިޓީތަކުން ކޭސްތަކުގެ މައުލޫމާތު ލިބުން ލަސްވެ އެންމެ ފުރިހަމަ މައުލޫމާތު ނުލިބޭ ކަމަށެވެ. އަދި އަދަދުތައް މިހާރު ހުރިވަރަށް ވުރެ ވެސް އިތުރުވާނެ ކަމަށް ބެލެވޭ ކަމަށް ބުނެފައިވެއެވެ.
މިހާތަނަށް އެގައުމުގައި އެންމެ ގިނަ މީހުން ޕޮޒިޓިވްވީ ޑިސެމްބަރ މަހުގެ 11 ވަނަ ދުވަހުއެވެ. އެގައުމުގައި މިހާތަނަށް އައި އިރު 1.4 މިލިއަން މީހުން ވަނީ ޕޮޒިޓިވްވެފައެވެ. އަދި 24،000 ވުރެ ގިނަ މީހުން ވަނީ މަރުވެފައެވެ.
