ފައިސާ ގޯނި ބެހިކަމަށް ބުނި މައްސަލަ ނުބަލަން ފުލުހުން ނިންމައިފި
މައްސަލަ ހުށަހެޅީ އަމިއްލަ ފަރާތަކުން
ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު މުޙައްމަދު އިސްމާއިލް
ފައިސާ ގޯނި ހިފައިގެން ހިނގި ކަމަށް ބުނެ، ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު މުޙައްމަދު އިސްމާއިލް ރައްޔިތުންގެ މަޖިލީހުގައި ދެއްކެވި ވާހަކަ ތަހުގީގު ނުކުރަން ފުލުހުން ނިންމައިފިއެވެ.
ރިޝްވަތު ދިން ކަމަށް ދޭހަވާގޮތަށް، ފައިސާ ގޯނި ހިފައިގެން ރައްޔިތުންގެ މަޖިލީހުގެ މެންބަރުންގެ ގާތަށް ހިނގި ކަމަށް ވިދާޅުވެ، މުޙައްމަދު އިސްމާއިލް ދެއްކެވި ވާހަކަ ތަހުގީގުކޮށްދިނުމަށް އެދި އާންމު ފަރާތަކުން މި އޭޕްރީލް މަހުގެ 9 ވަނަ ދުވަހު ފުލުހުންނަށް ހުށަހެޅި މައްސަލައާއި ގުޅިގެން، އެފަރާތަށް ފުލުހުން ފޮނުވި ޖަވާބުގައި ވަނީ، މި މައްސަލައަކީ އެންޓި ކޮރަޕްޝަން ކޮމިޝަނުން ބަލަމުންދާ މައްސަލައެއް ކަން އެ ކޮމިޝަނުން ފުލުހުންނަށް އަންގާފައިވާ ކަމަށެވެ.
އެހެންކަމުން، އާންމު ފަރާތުން ހުށަހެޅި މައްސަލަ އެ ކޮމިޝަނާއި ހިއްސާކޮށްފައިވާނެ ކަމަށާ، އެ މައްސަލައިގެ ތަހުގީގު ފުލުހުން ނުކުރުމަށް ނިންމާފައިވާ ކަމަށްވެސް މި ޖަވާބުގައި ބުނެފައިވެއެވެ.
ނިމިގެންދިޔަ 2016 ވަނަ އަހަރުގެ މާޗް 9 ވަނަ ދުވަހު، އެމްއެމްޕީއާރްސީ އިން ގެއްލިފައިވާ 1.22 ބިލިއަން ރުފިޔާއާ ގުޅޭ ގޮތުން ހުށަހެޅުނު ގަރާރަކަށް ރައްޔިތުންގެ މަޖިލީހުގައި ބަހުސްކުރަމުންދަނިކޮށް، ނިޒާމީ ނުކުތާއެއް ނަންގަވާ، އެމްއެމްޕީއާރްސީގެ ހިޔާނާތުގެ ފައިސާ ގޯނި ހިފައިގެން، ފައިސާ ބަހަން ވަޑައިގެންނެވި ކަމަށް މަޖިލީހުގެ ހޯރަފުށީ ދާއިރާގެ މެމްބަރު މުހައްމަދު އިސްމާއިލް ވަނީ އިޢުތިރާފުވެވަޑައިގެންފައެވެ.
މުހައްމަދު އިސްމާއިލް ވިދާޅުވެފައިވަނީ؛ "މިތަނުގައި އެކި ބޭފުޅުން ވަގުންގެ ވާހަކައާއި އެކި ފައިސާގެ ވާހަކަދައްކާކަށް މާ ރަނގަޅެއް ނޫން. އެ ފައިސާ ގޯނި ހިފައިގެން ހިނގީ އަޅުގަނޑޭ. ހިފައިގެން އެބޭފުޅުންނަށް އެލާރި ބެހީ އަޅުގަނޑު، ހުރިހާ އެންމެން އޭގައި ހިފިއޭ،" މިގޮތަށެވެ.
ރައީސް ޔާމީނާއި ވަރަށް ގާތުން މަސައްކަތް ކުރައްވާ މެމްބަރު މުހައްމަދު އިސްމާއިލް މިފަދައިން އިޢުތިރާފު ވެވަޑައިގެންނެވި ނަމަވެސް، މި މައްސަލަ ތަޙުޤީޤުކޮށް އޭނާއާމެދު މިހާތަނަށް ދަޢުލަތުގެ އެއްވެސް މުއައްސަސާއަކުން ފިޔަވަޅެއް އަޅާފައެއް ނުވެއެވެ.
ރައްޔިތުންގެ މަޖިލީހުގެ ތަޅުމުގައި އޭނާ މިވާޙަކަ ދެއްކެވުމުގެ އިތުރުން ލައިވް ޓީވީގައިވެސް ފައިސާ ބެއްސެވި ކަމަށް ވާހަކަ ދައްކަވާފައިވެއެވެ.
މުހައްމަދު އިސްމާއީލްގެ މައްސަލަ ނުބަލަން ފުލުހުން ނިންމި އިރު ޖުމްހޫރީ ޕާޓީގެ ލީޑަރު ގާސިމް އިބްރާހިމް ކުނޫޒް ޖަލްސާއެއްގައި ދެއްކެވި ވާހަކަފުޅަކާ ގުޅިގެން އޭނާގެ މައްޗަށް ރިޝްވަތު ދެއްވަން އުޅުނު ކަމުގެ ތުހުމަތުގައި ފުލުހުން މައްސަލަ ތަހުގީގުކޮށްފައިވެއެވެ. އަދި މިވަގުތު ގާސިމް ހުންނެވީ ޖަލުގައި ބަންދުވެސް ކޮށްފައެވެ.
ގާސިމްގެ އިތުރުން ދިއްގަރު ދާއިރާގެ މެމްބަރު ފާރިސް މައުމޫނުގެ މައްޗަށްވެސް ރިޝްވަތުގެ ތުހުމަތު ކޮށް ފުލުސް އޮފީހަށް ހާޒިރުކޮށް ސުވާލު ކޮށްފައެވެ.
މުހައްމަދު އިސްމާއީލްގެ ފައިސާ ގޯނީގެ މައްސަލަ ނުބަލަން ފުލުހުން ނިންމި ޚަބަރާއެކު ސޯޝަލް މީޑިއާގައި "ތިޔައީ ބަލާނެ މައްސަލަ އެއްނޫންކަން އޭރުވެސް އެނގޭ" ކަމަށް ބުނެ ގިނަ ބަޔަކު ގެންދަނީ ނުރުހުން ފާޅު ކުރަމުންނެވެ.
