ޔުއެފާ ޗެމްޕިއަންސް ލީގުގެ ދެވަނަ ބުރުގައި ބާސެލޯނާ އާއިި ޕީއެސްޖީ ބައްދަލުކުރަން ޖެހިއްޖެއެވެ.

ޗެމްޕިއަންސް ލީގުގެ ގަދަ 16 ގެ ގުރު ނެގުން ކުރިއަށްދިޔައީ ހޯމަ ދުވަހުގެ ހަވީރުއެވެ. މި ސީޒަނުގެ ޗެމްޕިއަންސް ލީގުގެ ދެވަނަ ބުރުގައި ބާސާ އާއި ޕީއެސްޖީ ބައްދަލުކުރާއިރު، މިއީ 2017 ވަނަ އަހަރުގެ މާޗު މަހަށްފަހު މި ދެ ޓީމު ބައްދަލުކުރާނެ ފުރަތަމަ ފަހަރެވެ. އެ ފަހަރުވެސް މި ދެ ޓީމު ބައްދަލުކޮށްފައިވަނީ ޗެމްޕިއަންސް ލީގުގެ ދެވަނަ ބުރުގައެވެ. އެ ފަހަރު ދެވަނަ ބުރުގެ ފުރަތަމަ ލެގުގައި ޕީއެސްޖީ އަތުން 4-0 ން ބަލިވެފައިވަނިކޮށް، ދެވަނަ ލެގުގައި ބާސާ ވަނީ ޕީއެސްޖީ އަތުން 6-1 އިން މޮޅުވެ، ކުއާޓާއިން ޖާގާ ހޯދައި، ޗެމްޕިއަންސް ލީގުގެ ތާރީޚުން ޖާގަ ހޯދާފައެވެ. އެއާ އެކު ބާސާ ވެފައިވަނީ ފުރަތަމަ ލެގުން 4-0 ން ބަލިވެފައިވަނިކޮށް، ދެވަނަ ލެގުގައި އެ ނަތީޖާ އަނބުރާލި ފުރަތަމަ ޓީމަށެވެ.

އޭގެ ފަހުން ދުނިޔޭގެ ރިކޯޑު އަގެއް ކަމަށްވާ 222 މިލިޔަން ޔޫރޯއަށް ބްރެޒިލުގެ ތަރި ނޭމާ ބާސާ ދޫކޮށް ޕީއެެސްޖީއަށް ބަދަލުވިއިރު، މި ފަހަރުގެ މެޗުތައް ވެގެންދާނީ ބާސާއާ ދެކޮޅަށް ނޭމާ ނުކުންނަ ފުރަތަމަ މެޗަށެވެ.

މީގެ އިތުރުން މި ސީޒަނުގެ ޗެމްޕިއަންސް ލީގުގެ ދެވަނަ ބުރުގެ އެހެން މެޗުތަކަށް ބަލާއިރު، ޗެލްސީ ބައްދަލުކުރަން ޖެހުނީ އެތުލެޓިކޯ މެޑްރިޑާއެވެ. އަދި ލިވަޕޫލާއި އާރްބީ ލެއިޕްޒީގް ބައްދަލުކުރާއިރު، ރެއާލް މެޑްރިޑް ނިކުންނާނީ އެޓަލާންޓާއާ ދެކޮޅަށެވެ. އަދި އެންމެ ފަހުގެ ޗެމްޕިއަން ބަޔާން މިއުނިކުން ލާޒިއޯއާ ދެކޮޅަށް ނުކުންނައިރު، ޔުވެންޓަސް ބައްދަލުކުރާނީ ޕޯޓޯއާއެވެ. މީގެ އިތުރުން މެންޗެސްޓާ ސިޓީން ބޮރޫޝިއާ މޮންޗެންގްލަޑްބަކާ ދެކޮޅަށް ނުކުންނައިރު، ސެވިއްޔާ ނުކުންނާނީ ބުރޫޝިއާ ޑޯޓްމުންޑާ ދެކޮޅަށެވެ.

މުބާރާތުގެ ދެވަނަ ބުރުގެ ފުރަތަމަ ލެގުގެ މެޗުތައް އަންނަ އަހަރުގެ ފެބްރުއަރީ މަހުގެ ފަހުކޮޅު ކުޅޭއިރު، ދެވަނަ ލެގުގެ މެޗުތައް ކުޅޭނީ މާޗު މަހުގައެވެ.