ކުރިއަށް އޮތް ދިރާގު ދިވެހި ޕްރިމިއާ ލީގަށް ޒުވާން ސްކޮޑަކާއެކު ނުކުތުމަކީ ވަރަށް ބޮޑު ޗެލެންޖެއް ކަމަށް ޓީސީ ސްޕޯޓްސް ކުލަބުގެ ކޯޗު މުޙައްމަދު ޝާޒްލީ (ޝާޒް) ބުނެފިއެވެ.
އައު ސީޒަނާ ކުރިމަތިލާއިރު ޓީސީގެ ސްކޮޑަށް ވަނީ ބޮޑު ބަދަލެއް އައިސްފައެވެ. އެގޮތުން މިދިޔަ ސީޒަނުގައި ޓީސީއަށް ކުޅުނު ގައުމީ ފުޓްބޯޅަ ޓީމުގެ ފޯވާޑް އަލީ އަޝްފާގު (ދަގަނޑޭ) އާއި ގައުމީ ފުޓްބޯޅަ ޓީމުގެ ކެޕްޓަން އަކްރަމް އަބްދުލް ޣަނީ (އަކޫ) ކުލަބު ވެލެންސިއާއަށް ބަދަލުވެފައިވާއިރު، އެ ޓީމުގެ ކެޕްޓަން އަޙްމަދު ފައްރާހު (ފައްރަ) ވަނީ ފަސް އަހަރު ފަހުން އެ ޓީމު ދޫކޮށް ފުރަތަމަ ޑިވިޝަނުގައި އަލަށް ވާދަކުރާ ސުޕަ ޔުނައިޓެޑް ސްޕޯޓްސް (ސަސް) އަށް ބަދަލުވެފައެވެ. އަދި މިދިޔަ ސީޒަނުގައި އެ ޓީމުގެ މެދުތެރޭގައި މުހިންމު ދައުރެއް އަދާކުރި ގައުމީ ފުޓްބޯޅަ ޓީމުގެ މިޑްފީލްޑަރު އިސްމާޢީލް އީސަ (މެސީ) ވަނީ ޔުނައިޓެޑް ވިކްޓަރީ (ޔޫވީ) އަށް ބަދަލުވެފައެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން ޝާޒްލީ ބުނީ ޓީސީ އަކީ ރާއްޖޭގެ ފުޓްބޯޅައިގެ ގަދަ ބާރެއް ކަމަށާއި، އެހެން ނަމަވެސް މި ފަހަރު ޓީސީ ފެންނާނީ ތަންކޮޅެއް ތަފާތު ގޮތަކަށް ކަމަށެވެ. އެއީ މިދިޔަ އަހަރު ނިންމާލިއިރު ތިބި ވަރަށް ގިނަ ސީނިއާ ކުޅުންތެރިން ޓީމުގައި ނެތުމުން ކަމަށާއި، ޓީމުގައި މި ތިބީ ވަރަށް ޒުވާން ކުޅުންތެރިންތަކެއް ކަމަށެވެ. އެހެންކަމުން ބޮޑު މުބާރާތަކަށް ނުކުންނައިރު ވަރަށް ގިނަ ކަންކަން ބޭނުންވާނެ ކަމަށާއި، ޒުވާން ގިނަ ކުޅުންތެރިންނާއެކު ޕްރިމިއާ ލީގުގައި ވާދަކުރަން ނުކުތުމަކީ ވަރަށް ބޮޑު ޗެލެންޖެއް ކަމަށްވެސް ޝާޒްލީ ބުންޏެވެ. އަދި ތަޖުރިބާކާރު ކުޅުންތެރިން ނެތްތަން ދެއްކުމުގެ ފުރުސަތު އޮންނާނެެ ކަމަށާއި، އެކަމަކު ތަމްރީނުތަކާއި ޓީމުގައި ތިބި ކުޅުންތެރިންގެ މަސައްކަތަށް ބަލާއިރު ޓީމާ ދޭތެރޭ ވަރަށް ބޮޑު އުންމީދެއް އެބައޮތް ކަމަށްވެސް ބުންޏެވެ.
ނޫސްވެރިންގެ މި ބައްދަލުވުމުގައި ޓީސީގެ ކެޕްޓަން މުޙައްމަދު އައްޒާމް ބުނީ މި ސީޒަނަށް ކުރިއާލާ ތައްޔާރުވާން ފެށުނު ކަމަށާއި، ސީޒަނާ ކުރިމަތިލާއިރު ޓީމު އޮތީ ވަރަށް ރަނގަޅަށް ތައްޔާރުވެފައި ކަމަށެވެ. އެގޮތުން ޕްރީ-ސީޒަނުގައި ރަނގަޅު މެޗުތަކެއް ކުޅެވުނު ކަމަށާއި، ޓީމާ ދެތޭރޭ ވަރަށް ބޮޑު ޔަގީންކަމެއް އެބައޮތް ކަމަށްވެސް އައްޒާމް ބުންޏެވެ. އަދި ލީގުގައި ރަނގަޅު ހިސާބަކަށް ދެވޭނެ ކަމަށް އުންމީދުކުރާ ކަމަށްވެސް ޓީސީގައި ހިމެނޭ އެންމެ ސީނިއާ އެއް ކުޅުންތެރިޔާ ކަމަށްވާ އައްޒާމް ބުންޏެވެ.
މި އަހަރުގެ އޭއެފްސީ ކަޕުގައިވެސް ވާދަކުރި ޓީސީން އައު ސީޒަނާ ޒުވާން ސްކޮޑަކާއެކީ ކުރިމަތިލާއިރު، ލީގުގައި ޓީސީން ކުޅޭ ފުރަތަމަ މެޗުގައި އަންނަ ހޯމަ ދުވަހު ދުވަހު ނުކުންނާނީ ދަ ގްރާންޑޭ ސްޕޯޓްސް ކުލަބާ ދެކޮޅަށެވެ.
