ފުލުހުން ހިންގަމުން އަންނަ މަސްތުވާތަކެތީގެ ބޮޑު އޮޕަރޭޝަނެއްގައި މާލެއިން 10 މީހަކު ހައްޔަރުކޮށްފި އެވެ.

މިކަމާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ މާލޭގެ ފަރީދީމަގުގެ ވަކި ސަރަހައްދެއް ބަންދުކޮށް އެ ސަރަހައްދު ބަލާ ފާސްކުރުމުގެ މަސައްކަތް ކުރަމުން އަންނަ ކަމަށެވެ. އެގޮތުން މިކަމުގައި ޝާމިލުވާ ކާރެއް ބަލާފައިވާ ކަމަށާއި، އެ ކާރުގައި ވަގަށް އެތެރެކޮށްފައިވާ ގިނަ އަދަދެއްގެ މަސްތުވާތަކެތި ހުރިކަމަށް ބެލެވޭ ކަމަށެވެ.

ހަމީދު ވިދާޅުވީ ފުލުހުންގެ ޑްރަގް އެންފޯސް ޑިޕާޓްމަންޓާއި. ޑްރަގް އިންޓެލިޖެންސާއި މެރިން ފުލުހުން ދަނީ ކަނޑުމަތީގައާއި އެއްގަމުގައި އޮޕަރޭޝަން ހިންގަމުންނެވެ. ހަމީދު ވިދާޅުވީ މަސްތުވާތަކެތި ޓްރެފިކްކުރަން އުޅުނު މި މައްސަލައާއި ގުޅިގެން ފުލުހުން އޮޕަރޭޝަން ހިންގަމުން އަންނަތާ ހަފްތާއެއް ވެއްޖެ ކަމަށެވެ.

މި އޮޕަރޭޝަންގެ ތެރެއިން ބައެއް މީހުން ވަނީ ހައްޔަރުކޮށްފައެވެ. ހަމީދު ވިދާޅުވީ 10 މީހަކު ހައްޔަރުކޮށްފައިވާ އިރު، މީގެ ތެރޭގައި ޑްރަގް އެތެރެކުރާ ބޮޑު ނެޓްވޯކެއްގެ ޝާމިލުވާ މީހުން ހިމެނޭ ކަމަށެވެ.

މި އޮޕަރޭޝަންގެ ތެރެއިން 10 މީހުން ހައްޔަރުކޮށްފައިވާ އިރު، އަންގާރަ ދުވަހުގެ ހެނދުނުން ފަށައިގެން ކަނޑާއި އެއްގަމުގައި އަންނަނީ އޮޕަރޭޝަން ހިންގަމުންނެވެ. އަދި އެކި ސަރަހައްދުތައް ބަލާ ފާސްކުރަމުންދާ ކަމަށް ވެސް ފުލުހުން ބުނެފައިވެއެވެ. ފުލުހުން ބުނީ މި އޮޕަރޭޝަންގެ އިތުރު ތަފްސީލު ފަހުން ހާމަކުރާނެ ކަމަށެވެ.