އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ އާސެނަލް ބަލިކޮށް ތާވަލުގެ އެއްވަނައަށް އަލުން ޓޮޓެންހަމް ހޮޓްސްޕާ ޖެހިލިއިރު، ވުލްވްސް އަތުން ފަސޭހަކަމާއެކު އެންމެ ފަހުގެ ޗެމްޕިއަން ލިވަޕޫލް މޮޅުވެއްޖެއެވެ.
އާދީއްތަ ދުވަހުގެރޭ ކުޅުނު ނޯތު ލަންޑަން ޑާބީ މެޗުން ޓޮޓެންހަމް މޮޅުވީ 2-0 ގެ ނަތީޖާއަކުންނެވެ.
ޓޮޓެންހަމުގެ ދަނޑުގައި ކުޅުނު މި މެޗުގައި އެ ޓީމުން ދެ ލަނޑުވެސް ޖަހާފައިވަނީ މެޗުގެ ފުރަތަމަ ހާފުގައެވެ. އެގޮތުން މެޗުގެ 13 ވަނަ މިނެޓުގައި ޓޮޓެންހަމަށް ލީޑު ނަގައިދިނީ ސޮން ހުއެން-މިންއެވެ. އޭނާ މި ލަނޑު ކާމިޔާބުކުރީ އޭރިއާ ބޭރުން ފޮނުވާލި ބާރު ހަމަލާއަކުންނެވެ. އަދި އޭގެ ފަހުން ފުރަތަމަ ހާފުގެ އިތުރު ވަގުތުގައި ސޮން ދިން ޕާހަކުން ޓޮޓެންހަމަށް ލީޑު ފުޅާކޮށްދިނީ ހެރީ ކޭންއެވެ.
މި ނަތީޖާއާއެކު ތާވަލުގެ އެއްވަނައަށް ޓޮޓެންހަމް އަލުން އެރީ ކުޅުނު 11 މެޗުން ލިބުނު 24 ޕޮއިންޓާއެކުއެވެ. އަދި ޓޮޓެންހަމް އަތުން ބަލިވި އާސެނަލް އޮތީ ތާވަލުގެ 15 ވަނައިގައި 11 މެޗުން 13 ޕޮއިންޓާއެކުއެވެ.
މީގެ އިތުރުން ލީގުގައި އާދީއްތަ ދުވަހުގެރޭ ކުޅުނު މެޗުން ލިވަޕޫލް މޮޅުވީ އަމިއްލަ ދަނޑުގައި ވުލްވްސް އަތުން 4-0 ގެ ތަފާތު ބޮޑު ނަތީޖާއަކުންނެވެ. މި މޮޅާއެކު ލިވަޕޫލް ވަނީ ލީގުގައި ބަލިނުވެ އަމިއްލަ ދަނޑުގައި 65 މެޗު ހަމަކޮށްފައެވެ.
މި މެޗުގައި ލިވަޕޫލުގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 24 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ވުލްވްސްގެ ކެޕްޓަން ކޮނާ ކޯޑީއަށް ހެދުނު ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ސަލާހެވެ. މި މެޗުގެ ފުރަތަމަ ހާފު ނިމެން ގާތްވެފައި ވަނިކޮށް އޭރިއާ ތެރެއިން ކޯޑީއަށް ލިވަޕޫލުގެ ސަޑިއޯ މާނޭ ފައުލްކުރި ކަމަށް ނިންމާ ވުލްވްސްއަށް ޕެނަލްޓީއެއް ދޭން ރެފުރީ ނިންމި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) ގެ އެހީ ހޯދުމަށްފަހު ރެފުރީ ވަނީ އެއީ ފައުލެއް ނޫން ކަމަށް ނިންމާފައެވެ.
މި މެޗުގައި ލިވަޕޫލުން ލީޑު ފުޅާކޮށްފައިވަނީ 58 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ގިނީ ވައިނަލްޑަމެވެ. އަދި މެޗުގެ 67 ވަނަ މިނެޓުގައި ސަލާހު ހުރަސްކޮށްދިން ބޯޅައަކުން ލިވަޕޫލުގެ ތިންވަނަ ލަނޑު ޖެހީ ޖޮއެލް މަޓިޕެވެ. މި މެޗުގައި ލިވަޕޫލުން ކާމިޔާބުކުރި ހަތަރުވަނަ ލަނޑަކީ މެޗުގެ 78 ވަނަ މިނެޓުގައި ވުލްވްސްގެ ނެލްސަން ސެމޭޑޯ އަތުން ބައިކޮޅަށް ވަން ލަނޑެކެވެ.
މި މޮޅާއެކު ތާވަލުގެ ދެވަނައިގައި އޮތް ލިވަޕޫލަށް ވަނީ އެއްވަނައިގައި އޮތް ޓޮޓެންހަމާ އެއްވަރަށް ޕޮއިންޓް ލިބިފައެވެ. ލިވަޕޫލަށްވެސް 11 މެޗުން 24 ޕޮއިންޓް ލިބިފައިވާއިރު، ޓޮޓެންހަމަށް ކުރިލިބެނީ ލަނޑުގެ ތަފާތުންނެވެ. އަދި ލިވަޕޫލް އަތުން ބަލިވި ވުލްވްސް އޮތީ ތާވަލުގެ 10 ވަނައިގައި 11 މެޗުން 17 ޕޮއިންޓާއެކުއެވެ.