ވަގު ޕާސްޕޯޓުގައި ރާއްޖެ އެތެރެވުމަށް މަސައްކަތްކުރި ތިން ބިދޭސީއަކު އަތުލައިގަނެފި
6 ޑިސެމްބަރު 2020 | އާދީއްތަ 15:58ޕާސްޕޯޓު ނަކަލުކުރި ދެ ބިދޭސީންނަކީ 47 އަހަރުގެ އަންހެނަކާއި، 21 އަހަރުގެ އަންހެނެއް
އިމިގްރޭޝަނުން އަތުލައިގަތް ދެ ބިދޭސީން
ޕާސްޕޯޓު ނަކަލުކޮށްގެން އަދި ވައްތަރު މީހެއްގެ ރެސިޑެންޓް ކާޑު ބޭނުންކޮށް އޮޅުވާލައިގެން ރާއްޖެ އެތެރެވުމަށް މަސައްކަތްކުރި ބިދޭސީންތަކެއް އިމިގްރޭޝަނުން ހުއްޓުވައިފި އެވެ.
އިމިގްރޭޝަނުން ބުނީ ޕާސްޕޯޓު ނަކަލުކޮށްގެން ރާއްޖެ އެތެރެވުމަށް މަސައްކަތްކުރި ދެ ބިދޭސީއަކާއި، ވައްތަރު މީހެއްގެ ރެސިޑެންޓް ކާޑު ބޭނުންކޮށް އޮޅުވާލައިގެން ރާއްޖެ އެތެރެވުމަށް މަސައްކަތްކުރި ބިދޭސީއަކު ހުއްޓުވީ އާދިއްތަ ދުވަހު ކަމަށެވެ.
ޕާސްޕޯޓު ނަކަލުކޮށްގެން ރާއްޖެ އެތެރެވުމަށް މަސައްކަތްކުރި ދެ ބިދޭސީންނަކީ 47 އަހަރުގެ އަންހެނަކާއި، 21 އަހަރުގެ އަންހެނެއް ކަމަށެވެ. އަދި ވައްތަރު މީހެއްގެ ރެސިޑެންޓް ކާޑެއް ބޭނުންކޮށް އޮޅުވާލައިގެން ރާއްޖެ އެތެރެވުމަށް މަސައްކަތް ކުރީ 24 އަހަރުގެ އަންހެނެއް ކަމަށް އިމިގްރޭޝަނުން ބުންޏެވެ.
މި މައްސަލަތަކުގައި އަތުލައިގަނެވުނު 3 މީހުންނާ ގުޅޭ އިތުރު ތަފްސީލެއް އިމިގްރޭޝަނުން ހާމައެއް ނުކުރެއެވެ.
އިމިގްރޭޝަނުން ވަނީ މީގެ ކުރިން ވެސް ޕާސްޕޯޓް ނަކަލުކޮށްގެންނާއި، ވަގު ޕާސްޕޯޓުގައި އެތެރެވާން މަސައްކަތް ކުރި މީހުން ވެލާނާ އިންޓަރނޭޝަނަލް އެއާޕޯޓް މެދުވެރިކޮށް އެތެރެވާން އުޅުނު ބަޔަކު ހުއްޓުވާފައެވެ.
