އެލެގްރީގެ ޝައުގު ޕްރިމިއާ ލީގަށް

އިނގިރޭސި ޕްރިމިއާ ލީގުގެ ކުލަބަކަށް އިރުޝާދުދޭން ބޭނުންވާ ކަމަށް އިޓަލީގެ މަސިމިލިއާނޯ އެލެގްރީ ބުނެފިއެވެ.

ޔުވެންޓަސްއަށް އިޓާލިއަން ލީގު ފަސް ފަހަރު ކާމިޔާބުކޮށްދިނުމަށްފަހު 2018-2019 ވަނަ އަހަރުގެ ސީޒަން ނިމުމުން އެ ޓީމުން ވަކިވި އުމުރުން 53 އަހަރުގެ އެލެގްރީ އަދި ޓީމަކާ ހަވާލުވެފައެއް ނުވެއެވެ. މީގެ ކުރިން އިނގިރޭސި ބަސް ދަސްކުރަން އެލެގްރީ ފެށިއިރު، އޭނާ ހޯދުމަށް މެންޗެސްޓާ ޔުނައިޓެޑާއި އާސެނަލުން މަސައްކަތް ކުރަމުން އަންނަ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

ދާދި ފަހުން ދިން އިންޓަވިއުއެއްގައި އެލެގްރީ ބުނީ އިނގިރޭސި ބަސް ދަސްކުރުމުގައި މިހާރު ބޮޑެތި ކުރިއެރުންތަކެއް ލިބިފައިވާ ކަމަށެވެ. އަދި ޕްރިމިއާ ލީގަކީ މި ވަގުތު ޔޫރަޕުގައި އޮތް އެންމެ ވަރުގަދަ އެއް ލީގު ކަމަށާއި، އެހެންކަމުން ކެރިއަރުގައި ޕްރިމިއާ ލީގު ތަޖުރިބާކޮށްލަން ބޭނުންވާ ކަމަށްވެސް އެލެގްރީ ބުންޏެވެ.

އެލެގްރީ ހީދުމުގެ ރޭހުގައި އެންމެ ކުރީގައި އުޅޭ އެއް ކުލަބު ކަމަށްވާ ޔުނައިޓެޑުން، އެ ޓީމުގެ މިހާރުގެ ކޯޗު އޮލެ ގުނަ ސޯލްޝެއާ ވަރަށް އަވަހަށް މަގާމުން ވަކިކުރާނެ ކަމަށް ރިޕޯޓުތައް ބުނެއެވެ. މި ފަހަކަށް އައިސް ޔުނައިޓެޑުން ނެރެމުން އަންނަ ދަށް ނަތީޖާތަކުގެ ސަބަބުން އެ ޓީމުގެ މެނޭޖުމަންޓުން ސޯލްޝެއާ ވަކިކޮށް އައު ކޯޗެއް ހޯދުމަށް މިހާރު މަސައްކަތް ކުރަމުން އަންނައިރު، އެލެގްރީގެ އިތުރުން ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯއަށްވެސް އެ ކުލަބުން އަންނަނީ ފާރަލަމުންނެވެ.

އޭސީ މިލާނަށް 2011 ވަނަ އަހަރު އިޓާލިއަން ލީގު ކާމިޔާބުކޮށްދީގެން ގިނަ ބަޔެއްގެ ސަމާލުކަން ހޯދި އެލެގްރީ ވަނީ މިލާނުގައި ހަތަރު ސީޒަން ހޭދަކޮށްފައެވެ. މި މުއްދަތުގައި އޭނާ ވަނީ މިލާނަށް އިޓާލިއަން ލީގުގެ އިތުރަށް އިޓާލިއަން ސުޕަ ކަޕުވެސް ކާމިޔާބުކޮށްދީފައެވެ.

އޭގެ ފަހުން ޔުވެންޓަސްއަށް ބަދަލުވެ އެ ޓީމުގައި ފަސް ސީޒަން އެލެގްރީ ހޭދަކުރިއިރު، މި މުއްދަތުގައި އޭނާ ވަނީ އެ ޓީމަށް އިޓާލިއަން ލީގު ފަސް ސީޒަނުގައިވެސް ހޯދައިދީފައެވެ. އަދި އޭގެ އިތުރަށް އޭނާ ވަނީ ޔުވެންޓަސްއަށް އިޓާލިއަން ކަޕް ހަތަރު ފަހަރު އަދި އިޓާލިއަން ސުޕަ ކަޕް ދެ ފަހަރު ކާމިޔާބުކޮށްދީފައެވެ.