ބާސެލޯނާއަށް ކުޅެމުން އަންނަ ސްޕެއިނުގެ ޑިފެންޑަރު ސާޖީ ރޮބާޓޯ ކޮވިޑް-19 އަށް ޕޮޒިޓިވްވެއްޖެއެވެ.

ސާޖީ ރޮބާޓޯ ކޮވިޑް-19 އަށް ޕޮޒިޓިވްވިކަން ބާސާއިން ހާމަކުރީ ބުދަ ދުވަހުގެ ވަގުތެއްގައެވެ. އެ ކުލަބުން ނެރުނު ބަޔާނެއްގައި ބުނީ އަންގާރަ ދުވަހު ކުރިއަށްގެންދިޔަ ޓެސްޓުތަކުން ސާޖީ ރޮބާޓޯ ކޮވިޑް-19 އަށް ޕޮޒިޓިވްވެފައިވާ ކަމަށެވެ. އެއާއެކު އޭނާ އައިސޮލޭޝަނަށް ބަދަލުކޮށްފައިވާ ކަމަށާއި، އަދި އޭނާގެ ހާލު ރަނގަޅު ކަމަށްވެސް މި ބަޔާނުގައި ވަނީ ބުނެފައެވެ.

ސާޖީ ރޮބާޓޯ ކޮވިޑް-19 އަށް ޕޮޒިޓިވްވިއިރު، އޭނާ ހުރީ އަނިޔާގައި ކުޅުމާ ދުރުގައެވެ. ސާޖީ ރޮބާޓޯއަށް އަނިޔާވީ ސްޕެނިޝް ލީގުގައި މިދިޔަ ނިވެމްބަރު މަހުގެ 21 ވަނަ ދުވަހު އެތުލެޓިކޯ މެޑްރިޑް އަތުން 1-0 ގެ ނަތީޖާއަކުން ބާސާ ބަލިވި މެޗުގައެވެ. އެ މެޗުގައި ސާޖީ ރޮބާޓޯގެ ފައިގެ ފަލަމަސްގަނޑަށް އަނިޔާވިއިރު، ދެ މަސް ވަންދެން އޭނާ ކުޅުމާ ދުރުގައި ހުންނަން ޖެހޭނެ ކަމަށް ރިޕޯޓުތައް ބުނެއެވެ.

ސާޖީ ރޮބާޓޯ އަނިޔާގައި ކުޅުމާ ދުރުގައި ހުރިއިރު، ބާސާގެ ގިނަ ޑިފެންޑަރުންތަކަކަށް ވަނީ އަނިޔާވެފައެވެ. އޭގެ ތެރޭގައި ޖެރާޑް ޕީކޭ އާއި، ސެމުއެލް އުމްޓިޓީގެ އިތުރުން ކްލެމެންޓް ލޯންގްލޭވެސް ހިމެނެއެވެ. މީގެ ތެރެއިން ޕީކޭގެ ކަކުލަށް ބޮޑު ގެއްލުމެއްވެފައިވާއިރު، މި އަނިޔާއާ ގުޅިގެން ޕީކޭއަށް ދެން މި ސީޒަނުގައި ނުކުޅެވުމުގެ ފުރުސަތު ބޮޑު ކަމަށް ރިޕޯޓުތައް ބުނެއެވެ.

މި ސީޒަނުގެ ސްޕެނިޝް ލީގުގައި ބާސާއަށް އެންމެ އެދެވޭ ކުޅުމެއް ދެއްކިފައި ނުވާއިރު، އެ ޓީމު އޮތީ ނުވަ މެޗުން 14 ޕޮއިންޓް ހަމަކޮށް ތާވަލުގެ ހަތްވަނައިގައެވެ. ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ބާސާއިން ރަށުން ބޭރުގައި ފެރެންސްވަރޯސްއާ ދެކޮޅަށް ނުކުންނައިރު، ސްޕެނިޝް ލީގުގައި އަންނަ ހޮނިހިރު ދުވަހުގެރޭ ކަޑިޒްއާ ދެކޮޅަށްވެސް ބާސާ ނުކުންނާނެއެވެ.