އިލެކްޝަންސް ކޮމިޝަނަށް އެސޯސިއޭޝަންތަކުގެ އިންތިޚާބު ބޭއްވޭނެ: ޓޮމް

ގައުމީ ކުޅިވަރު އެސޯސިއޭޝަންތަކުގެ އިންތިޚާބުތައް ގައުމީ އިންތިޚާބާ ބެހޭ މައި އިދާރާ އިލެކްޝަންސް ކޮމިޝަނުން ބޭއްވިދާނެ ކަމަށާއި، އެހެން ނަމަވެސް ޤާނޫނުގައި އެ މާއްދާ ހިމަނަން ވާނީ އެސޯސިއޭޝަންތަކުގެ އަސާސީ ގަވާއިދު އެގޮތަށް ބަދަލުކޮށްގެން ކަމަށް މަޝްހޫރު ފުޓްބޯޅަ ކުޅުންތެރިޔާ އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްކަންވެސް ކުރެއްވި މަހިބަދޫ ދާއިރާގެ މަޖިލިސް މެންބަރު އަޙްމަދު ތޯރިގް (ޓޮމް) ވިދާޅުވެއްޖެއެވެ.

ކުޅިވަރުގެ ޤާނޫނަށް އެމްޑީޕީގެ ޗެއާޕަސަން އަދި ކުރީގެ ކުޅިވަރާ ބެހޭ ވަޒީރުކަންވެސް ކުރައްވާފައިވާ ހެންވޭރު ހުޅަނގު ދާއިރާގެ މަޖިލިސް މެންބަރު ހަސަން ލަތީފް ހުށަހަޅުއްވާފައިވާ އިސްލާހުތަކަށް އަންގާރަ ދުވަހުގެ މަޖިލީހުގެ ޖަލްސާގައި ވާހަކަދައްކަވަމުން ޓޮމް ވިދާޅުވީ ކުޅިވަރު އެސޯސިއޭޝަނުގެ އިންތިޚާބުތަކުގައި މައްސަލަތައް އުފެދޭ ކަމަށާއި މިނިވަންކަމާއެކު އިންތިޚާބުތައް ކުރިއަށްނުދާ ވާހަކަ އަބަދުވެސް އަޑުއިވޭ ކަމަށެވެ.

ކުޅިވަރުގެ ޤާނޫނަށް އިސްލާހު ހުށަހެޅުމުން ކުޅިވަރު އެސޯސިއޭޝަންތަކުން ކުޅިވަރު ޖަމުޢިއްޔާތަކުން ބޮޑެތި ބަޔާންތައް ނެރި ވަކިގޮތަކަށް ކަންކަން ދިމާވެދާނެ ކަމަށް ފާހަގަކޮށްފައިވާ ކަމަށާއި، އެހެންކަމުން އެކަން ހިނގާގޮތް ބަލާލިއިރު، ފީފާއިން ގައުމުތައް ސަސްޕެންޑް ކުރަނީ އެ އެސޯސިއޭޝަނެއްގެ އެތެރޭގެ ކަންތައްތަކެއްގެ ސަބަބުން ކަމަށާއި، ކުޅިވަރު އެސޯސިއޭޝަނެއް ސަސްޕެންޑް ކޮށްގެން ފީފާއަށް ވާނެ ފައިދާއެއް ނޯންނަ ކަމަށްވެސް ވިދާޅުވިއެވެ.

ޓޮމް ވިދާޅުވީ ބައެއް ހާލަތްތަކުގައި ފީފާއިން އަމަލުކޮށްފައި ވަނީ ރަނގަޅަށް ނޫން ކަމަށާއި، އެގޮތުން އެފްއޭއެމުގެ ކުރީގެ ރައީސް އިލްހާމް އަޙްމަދުގެ ދައުރުގައި ފީފާއިން އެޅި ފިޔަވަޅުތަކަކީ ރަނގަޅު ފިޔަވަޅުތަކެއް ކަމަށް ގަބޫލުނުކުރައްވާ ކަމަށެވެ. އަދި އޭރުގެ އެފްއޭއެމުގެ ރައީސް އިލްހާމަށް ޖަވާބުދާރީވުމަށްވެސް އެކަށީގެންވާ ފުރުސަތުވެސް ފީފާއިން ނުދޭކަން ފާހަގަކުރައްވާ ޓޮމް ވިދާޅުވީ ފީފާއާ ގުޅުން އޮންނަ ބާރުގަދަ ފަރާތްތަކުން، އެ ފަރާތްތަކުން ބޭނުންނަމަ އެގައުމެއް ސަސްޕެންޝަނަކަށް ގެންދިޔުމަކީ ފަސޭހަ ކަމެއް ކަމަށެވެ.

ރާއްޖެ ސަސްޕެންޑް ކުރާނެ ކަމަށް ދެކެވޭ ވާހަކައާ ގުޅިގެން ޓޮމް ވިދާޅުވީ ފީފާއިން ގައުމެއް ސަސްޕެންޑްކޮށްފައި ބާއްވަން ބޭނުން ނުވާނެ ކަމަށާއި، އެކަން ހައްލުކުރަން މަސައްކަތް ކުރާނެ ކަމަށެވެ. އަދި ފީފާ އަކީ އެއްވެސް ބައުންޑަރީއެއް، އަމިއްލަ ފުޓްބޯޅަ ދަނޑެއް އަދި ޓެރަޓަރީއެއް އޮންނަ ތަނެއް ނޫން ކަމަށާއި، އެހެން ނަމަވެސް ދުނިޔޭގެ ފުޓްބޯޅައިގެ ގޮތް ކިޔާނީ ފީފާއިން ކަމަށެވެ. ޑިމޮކްރަސީ އާއި ބީރައްޓެހި އަދި އެފްއޭގެ ރައީސް އައްޔަންކުރާ ގައުމެއް ކަމަށްވާ ޗައިނާ ސަސްޕެންޑްކޮށްގެން ގެއްލުންވާނީ ކޮންބަޔަކަށްތޯ ޓޮމް ސުވާލުކުރެއްވިއެވެ.

ފީފާ އަދި އޭއެފްސީންވެސް އެއްވެސް ގައުމެއްގެ ހެޑް އޮފް ސްޓޭޓާ މައްސަލަ ޖެހި، އެގައުމެއްގެ ފުޓްބޯޅައަށް ގެއްލުންވާނެ ކަމެއް ކުރަން ބޭނުން ނުވާނެ ކަމަށާއި، އެހެން ނަމަވެސް ސަރުކާރުތަކުން ސީދާ ނުފޫޒު ފޯރުވާ އެފްއޭގެ ރައީސެއް ދުރުކުރުން ފުރުސަތެއް ނުދޭނެ ކަމަށްވެސް ޓޮމް ވިދާޅުވިއެވެ.

ޓޮމް ވިދާޅުވީ އިލެކްޝަންސް ކޮމިޝަނަށް އެސޯސިއޭޝަންތަކުގެ އިންތިޚާބުގެ މަސްއޫލިއްޔަތު ހަވާލު ކުރެވޭނެ ކަމަށާއި، އެހެން ނަމަވެސް އެކަން ފުރަތަމަ ކުރަންވީ ޖަމުޢިއްޔާތަކުގެ އަސާސީ ގަވާއިދަށް އެ ބަދަލުގެނެސް، ހުރިހާ އެސޯސިއޭޝަނެއްގެ އަސާސީ ގަވާއިދަށް އެއް އުސޫލެއް ގެނައުމުން ކަމަށްވާއިރު، އެގޮތް ގަބޫލުނުކުރެވިގެން އުޅެނީ އެސޯސިއޭޝަންތައް ހިންގަން މި ވަގުތު ތިބި ފަރާތްތަކަށް ކަމަށެވެ.

ކުޅިވަރުގެ ޤާނޫނަށް ހަސަން ލަތީފް ހުށަހެޅުއްވި އިސްލާހުތައް މައިގަނޑު ފަސް ބަޔަކަށް ބަހާލާފައިވާއިރު، އެ ފަސް ބައި ހިމެނޭ ގޮތަށް ގިނަ އިސްލާހުތަކެއް ވަނީ ހުށަހަޅުއްވާފައެވެ. މި އިސްލާހުތަކުގެ އިބުތިދާއީ ބަހުސް ރައްޔިތުންގެ މަޖިލީހުގައި ފަށާފައިވާއިރު، މަޖިލީގެ ގިނަ މެމްބަރުން ވަނީ އިސްލާހުތަކައް ތާއީދުކޮށް ވާހަކަ ދައްކަވާފައެވެ.