މާރޭޒްގެ ހެޓްރިކާއެކު ސިޓީއަށް ބޮޑު މޮޅެއް

ފޯވާޑް ރިޔާދް މާރޭޒްގެ ހެޓްރިކާއެކު ބާންލީ އަތުން މެންޗެސްޓާ ސިޓީ ބޮޑު މޮޅެއް ހޯދައިފިއެވެ.

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން ސިޓީ މޮޅުވީ 5-0 ގެ ތަފާތު ބޮޑު ނަތީޖާއަކުންނެވެ.

ސިޓީގެ ދަނޑުގައި ކުޅުނު މި މެޗުގައި އެ ޓީމުން މޮޅު ކުޅުމެއް ދެއްކިއިރު، މެޗު ފަށައިގެން ހަވަނަ މިނެޓުގައި މާރޭޒްގެ ލަނޑުން އެ ޓީމުން ވަނީ ލީޑު ނަގާފައެވެ. އަދި މެޗުގެ 22 ވަނަ މިނެޓުގައި މާރޭޒް ވަނީ އިތުރު ލަނޑެއް ޖަހާ ސިޓީގެ ލީޑު ފުޅާކޮށްދީފައެވެ. މި މެޗުގައި ސިޓީން ގިނަ ހަމަލާތަކެއް އުފެއްދިއިރު، ފުރަތަމަ ހާފު ނިމުމުގެ ކުރިން ސިޓީން ވަނީ ތިން ލަނޑުގެ ލީޑެއް ނަގާފައެވެ. އެގޮތުން ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް ސިޓީގެ ތިންވަނަ ލަނޑު ޖަހައިދިނީ ޑިފެންޑަރު ބެންޖަމިން މެންޑީއެވެ.

މެޗުގެ ދެވަނަ ހާފުގައިވެސް ސިޓީން މޮޅު ކުޅުމެއް ދެއްކިއިރު، އެ ޓީމުގެ ހަތަރުވަނަ ލަނޑު 66 ވަނަ މިނެޓުގައި ކާމިޔާބުކޮށްދިނީ ޒުވާން ފޯވާޑް ފެރާން ޓޮރޭސްއެވެ. އަދި އޭގެ ތިން މިނެޓު ފަހުން މާރޭޒް ވަނީ އިތުރު ލަނޑެއް ޖަހާ މެޗުގައި ހެޓްރިކް ހަދާފައެވެ. މިއީ 2018 ވަނަ އަހަރު ސިޓީއާ ގުޅުނު މާރޭޒް އެ ޓީމުގެ ޖާޒީގައި ހެދި ފުރަތަމަ ހެޓްރިކެވެ.

މި މޮޅާއެކު ސިޓީ އޮތީ ތާވަލުގެ އަށްވަނައިގައި ކުޅުނު ނުވަ މެޗުން ލިބުނު 15 ޕޮއިންޓާއެކުއެވެ. ސިޓީއާ އެއްވަރަށް ޕޮއިންޓް ލިބިފައިވާ އެސްޓަން ވިލާ އޮތީ ތާވަލުގެ ހަތްވަނައިގައެވެ. އެކަމަކު އެ ޓީމުން މިހާތަނަށް ކުޅެފައިވަނީ އަށް މެޗެވެ. މީގެ އިތުރުން ހޮނިހިރު ދުވަހުގެރޭ ސިޓީ އަތުން ބަލިވި ބާންލީ އޮތީ ތާވަލުގެ 17 ވަނައިގައި ނުވަ މެޗުން ފަސް ޕޮއިންޓާއެކުއެވެ.