3 ފަނޑިޔާރެއްގެ ސްލޫކީ މައްސަލަ ބެލުމަށް ޖޭއެސްސީން ތަހުގީގު ކޮމެޓީ އެކުލަވާލައިފި
24 ނޮވެމްބަރު 2020 | އަންގާރަ 08:35ޏ. ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް އަހުމަދު އަކްރަަމްގެ ސްލޫކީ މައްސަލައެއް ބަލަމުންދޭ
ޖުޑީޝަލް ސަރވިސް ކޮމިޝަން: ފަނޑިޔާރުންގެ ސުލޫކީ ގިނަ މައްސަލަތަކެއް އެކޮމިޝަނަށް ހުށަހެޅެމުންދޭ
ތިން ފަނޑިޔާރެއްގެ ސްލޫކީ މައްސަލަތައް ބެލުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ތަހުގީގު ކޮމެޓީއެއް އެކުލަވާލައިފި އެވެ.
އަންގާރަ ދުވަހު ޖޭއެސްސީން އާންމުކޮށްފައިވާ ނޫސްބަޔާނެއްގައި ބުނެފައި ވަނީ، 28 އޮކްޓޯބަރު 2020 ވަނަ ދުވަހު ބޭއްވުނު އެކޮމިޝަނުގެ 79 ވަނަ ބައްދަލުވުމުގައި ތިން ފަނޑިޔާރަކާ ގުޅޭ ސްލޫކީ މައްސަލަ ތަހުގީގު ކުރުމަށް ތަހުގީގު ކޮމެޓީއެއް އެކުލަވާލާފައިވާ ކަމަށެވެ.
އެގޮތުން، ޏ. ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް އަހުމަދު އަކްރަަމް ބެއްލެއްވި މައްސަލަ ހިންގުމަށް އެކަށީގެން ނުވާ މިންވަރަށް ލަސްވެފައިވާ ކަމަށް ބެލެވޭ މައްސަލައެއް ހިމެނޭއިރު، ހދ. ކުޅުދުއްފުށި މެޖިސްޓްރޭޓް ކޯޓުގެ މެޖިސްޓްރޭޓް އަލީ އާދަމް، ޖަމިއްޔާއެއް އުފައްދާ، އެ ޖަމިއްޔާގެ ހަރަކާތްތައް ރާވާ ހިންގުމުގައި އަމަލީގޮތުން ބައިވެރިވާ ކަމަށް ބުނާ މައްސަލައަކާއި ތަފްރީޤުކޮށްފައިވާ ކައިވެންޏެއް ރުޖޫއަކޮށްދިން ކަމަށްބުނާ މައްސަލައަކާއި މުޒާހަރާތަކުގައި ބައިވެރިވެ، ޝުއޫރު ފާޅުކޮށް ސޯޝަލް މީޑިއާގައި ފަނޑިޔާރަކު ހިއްސާކޮށްގެންނުވާނެފަދަ ހިޔާލުތައް ފާޅުކުރާކަމަށް ބުނާ މައްސަލައެއް ހިމެނެ އެވެ.
މީގެއިތުރުން، ތ. ކަނޑޫދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލީ ޝަރީފް، ގާނޫނު ހުއްދަކުރާ މިންވަރަށްވުރެ ގިނައިން ކުޑަކުދިން އަރުވައިގެން ސައިކަލް ދުއްވާކަމަށް ބުނާ މައްސަލައެއްވެސް ހިމެނެ އެވެ.
ޖޭއެސްސީއަކީ، ގާނޫނުއަސާސީގެ ދަށުން އުފެދި، ގާނޫނުން ބާރު ލިބިގެން، ފަނޑިޔާރުންގެ ސުލޫކީ މައްސަލަތައް ބަލަމުންދާ ކޮމިޝަނެވެ. އެކޮމިޝަނުން ފަނޑިޔާރަކު، ފަނޑިޔާރުކަމުން ވަކިކުރަން ނިންމައިފިނަމަ، އެކަން ހުށަހަޅަން ޖެހެނީ ރައްޔިތުންގެ މަޖިލީހަށެވެ.
މިހާރު ހިނގަމުންދާ 19 ވަނަ މަޖިލީހާއެކު، ޖޭއެސްސީގެ ގާނޫނަށް ބޮޑެތި ބަދަލުތަކެއް ނެގެސް، ޝަރުއީ ދާއިރާ ހަރުދަނާކުރުމަށް ގިނަ މަސައްކަތްތަކެއް ކުރެެމެންދެ އެވެ. އަދި ގާނޫނާއި، ފަނޑިޔާރުންގެ ސުލޫކާ ހިލާފުވާ ފަނޑިޔާރުންނާމެދު ޖޭއެސްސީން ދަނީ ފިޔަވަޅު އަޅަމުންނެވެ.
