މި އަހަރުގެ ޑިސެމްބަރު މަހަށް ތާވަލުކޮށްފައި އޮތް ފީފާ ކުލަބު ވޯލްޑް ކަޕް އަންނަ އަހަރުގެ ފެބްރުއަރީ މަހަށް ފަސްކުރަން ފީފާއިން ނިންމައިފިއެވެ.

މީގެ ކުރިން މި މުބާރާތް ބޭއްވުމަށް ނިންމާފައި އޮތީ މި އަހަރުގެ ޑިސެމްބަރު މަހު ގަތަރުގައެވެ. އެކަމަކު ކޮވިޑް-19 އާ ގުޅިގެން ފީފާއިން ވަނީ މި މުބާރާތް އަންނަ އަހަރަށް ފަސްކޮށްފައެވެ. އަންގާރަ ދުވަހުގެރޭ ފީފާއިން ނެރުނު ބަޔާނެއްގައި ބުނީ މި ދަނޑިވަޅުގައި މި އަހަރު މުބާރާތް ބޭއްވުމުގެ ފުރުސަތު ނެތުމުން، އަންނަ އަހަރުގެ ފެބްރުއަރީ މަހުގެ 1-11 ށް ގަތަރުގައި މި މުބާރާތް ބޭއްވުމަށް މިހާރު ތާވަލުކޮށްފައިވާ ކަމަށެވެ.

މިހާތަނަށް ކުލަބު ވޯލްޑް ކަޕަށް ދެ ޓީމެއް ވަނީ ކޮލިފައިވެފައެވެ. އެއީ މިދިޔަ ސީޒަނުގެ ޔުއެފާ ޗެމްޕިއަންސް ލީގުގެ ޗެމްޕިއަން ޖަރުމަނުގެ ބަޔާން މިއުނިކާއި މުބާރާތް ބާއްވާ ގައުމު ކަމަށްވާ ގަތަރުގެ ލީގު ޗެމްޕިއަން އަލް ދުހައިލެވެ.

ފީފާއިން މި މުބާރާތް އަންނަ އަހަރަށް ފަސްކުރަން ނިންމުމާއެކު އެއް އަހަރު ތެރޭގައި ހަ ތަށި އުފުލާލަން ބަޔާނުން ދެކެމުން އައި ހުވަފެނަށް ވަނީ ނިމުން އައިސްފައެވެ. އެއް އަހަރު ތެރޭ ހަ ތަށި ހޯދުމުގެ ޝަރަފު މި ވަގުތާ ހަމައަށް އޮތް ހަމައެކަނި ޓީމަކީ 2009 ވަނަ އަހަރު ހަ ތަށި ކާމިޔާބުކުރި ބާސެލޯނާއެވެ.

މިހާރު ފީފާއިން ކުލަބު ވޯލްޑް ކަޕް ބާއްވަނީ ހަ ބައްރުގެ ޗެމްޕިއަނުންނާއި ހޯސްޓްކުރާ ގައުމުގެ ލީގު ޗެމްޕިއަނުންގެ މެދުގައި އާދައިގެ މުބާރާތެއްގެ ގޮތުގައެވެ. އެކަމަކު މިދިޔަ އަހަރު ފީފާއިން ވަނީ ކުލަބު ވޯލްޑް ކަޕުގެ ފޯމެޓަށް ބަދަލުގެނެސްފައެވެ. އެގޮތުން ކުލަބު ވޯލްޑް ކަޕުގެ ފޯމެޓަށް އަލަށް ގެނައި ބަދަލާއެކު، މި މުބާރާތް ދެން ބާއްވާނީ 24 ޓީމާއެކު ކޮންމެ ހަތަރު އަހަރަކުން އެއް ފަހަރުއެވެ. ފީފާއިން މީގެ ކުރިން ވަނީ އައު ކުލަބު ވޯލްޑް ކަޕަކީ ފީފާ ކޮންފަޑަރޭޝަންސް ކަޕުގެ ބަދަލުގައި ބާއްވާ މުބާރާތެއް ކަމަށް ބުނެފައެވެ.

އައު ކުލަބު ވޯލްޑް ކަޕުގެ ފުރަތަމަ މުބާރާތް އަންނަ އަހަރު ޗައިނާގައި ޖޫން މަހުގެ 17ން ޖުލައި މަހުގެ ހަތަރުވަނަ ދުވަހުގެ ނިޔަލަށް ބޭއްވުމަށް މީގެ ކުރިން ފީފާއިން ވަނީ ނިންމާފައެވެ. އެ މުބާރާތުގައި 24 ޓީމެއް ވާދަކުރާއިރު، މުބާރާތުގައި ވާދަކުރާނީ ޔޫރަޕުގެ އަށް ޓީމާއި ދެކުނު އެމެރިކާގެ ހަ ޓީމާއި އެފްރިކާ، އޭޝިއާ އަދި އުތުރު އެމެރިކާ ބައްރުން، ކޮންމެ ބައްރަކުން ތިން ޓީމު އަދި އޯޝޭނިއާގެ ޓީމެކެވެ. އެކަމަކު އައު ކުލަބު ވޯލްޑް ކަޕް 2022 ވަނަ އަހަރަށް ފަސްކުރުން ގާތް ކަމަށް ރިޕޯޓުތައް ބުނެއެވެ.

މިދިޔަ އަހަރުގެ ކުލަބު ވޯލްޑް ކަޕް ކާމިޔާބުކުރީ އިނގިރޭސި ޗެމްޕިއަން ލިވަޕޫލުންނެވެ. އަންނަ އަހަރުގެ ފެބްރުއަރީ މަހުގެ މުބާރާތުގައި ޔޫރަޕުގެ ޗެމްޕިއަނުންގެ ގޮތުގައި ކުޅޭ ބަޔާން ވަނީ 2013 ވަނަ އަހަރު ކުލަބު ވޯލްޑް ކަޕްގެ ތަށި އުފުލާލާފައެވެ.