ޔޫރޯ ފެށުމުގެ ކުރިން ސަންޗޯ ހޯދުމަށް ޔުނައިޓެޑުން މަސައްކަތް ކުރަނީ

އަންނަ އަހަރަށް ފަސްކޮށްފައިވާ ޔޫރޯ ފުޓްބޯޅަ މުބާރާތް ފެށުމުގެ ކުރިން އިންގްލެންޑުގެ ޒުވާން ފޯވާޑް ޖޭޑަން ސަންޗޯ ހޯދުމަށް މެންޗެސްޓާ ޔުނައިޓެޑުން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

މި ނިމުނު ޓްރާންސްފާ ބާޒާރުގައި މީޑިއާތަކުން ވަނީ އުމުރުން 20 އަހަރުގެ ސަންޗޯ 110 މިލިޔަން ޕައުންޑަށް ޔުނައިޓެޑަށް ވިއްކާލަން ޑޯޓްމުންޑުން އެއްބަސްވި ކަމަށް ރިޕޯޓުކޮށްފައެވެ. އެގޮތުން ޔުނައިޓެޑާއެކު ފަސް އަހަރުގެ އެއްބަސްވުމެއް ސަންޗޯ ހަދާނެ ކަމަށްވެސް ރިޕޯޓުކުރިއެވެ. އެކަމަކު ކޮވިޑް-19 ގެ މި ދަނޑިވަޅުގައި 110 މިލިޔަން ޕައުންޑް ދެއްކުމަށް ޔުނައިޓެޑަށް ދަތިވާނެތީ، އެ ހުއްޓުނީއެވެ.

އެކަމަކު ރިޕޯޓުތައް ބުނާ ގޮތުން ސަންޗޯ ހޯދުމަށް ޔުނައިޓެޑުން އަދިވެސް މަސައްކަތް ކުރަމުން އަންނައިރު، އަންނަ އަހަރުގެ ހޫނު މޫސުމުގައި ބޭއްވުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތުގެ ކުރިން ސަންޗޯގެ ސޮއި ހޯދުމަށް ޔުނައިޓެޑުން މިހާރު އަންނަނީ މަސައްކަތް ކުރަމުންނެވެ.

ސަންޗޯ ހޯދުމަށް ޔުނައިޓެޑުގެ އިތުރުން ޔޫރަޕުގެ ބޮޑެތި ކުލަބުތަކުންވެސް މަސައްކަތް ކުރަމުން އަންނައިރު، އޭނާ ވިދާލީ 2017 ވަނަ އަހަރު އިންޑިއާގައި ބޭއްވި 17 އަހަރުން ދަށުގެ ފީފާ ވޯލްޑް ކަޕުގައެވެ. އެ މުބާރާތުގެ ޗެމްޕިއަންކަން އިންގްލެންޑުން ހޯދިއިރު، އޭނާ ވަނީ މުބާރާތުގައި މޮޅު ކުޅުމެއް ދައްކާފައެވެ.

ޑޯޓްމުންޑުގެ ސީނިއާ ޓީމުގައި މިހާތަނަށް ތިން ސީޒަން ހޭދަކޮށްފައިވާ ސަންޗޯ ވަނީ އެ ކުލަބަށް 108 މެޗުގައި 36 ލަނޑު ކާމިޔާބުކޮށްފައެވެ. އަދި ވަނީ ޑޯޓްމުންޑާއެކު ޖަރުމަން ސުޕަ ކަޕް ކާމިޔާބުކޮށްފައެވެ.

މި ނިމުނު ޓްރާންސްފާ ބާޒާރުގައި ސަންޗޯ ހޯދުމަށް ޔުނައިޓެޑުން ކުރި މަސައްކަތް ނާކާމިޔާބުވުމުން، އެ ޓީމުން ވަނީ ހިލޭ ޓްރާންސްފާއެއްގެ ދަށުން އުރުގުއޭގެ ފޯވާޑް އެޑިންސަން ކަވާނީ އެ ޓީމަށް ގެނެސްފައެވެ. ދެން ޔުނައިޓެޑުން ގެނައި ކުޅުންތެރިޔަކީ އަޔަކްސްއަށް ކުޅެމުން އައި ނެދަލެންޑްސްގެ މިޑްފީލްޑަރު ޑޮނީ ވެން ޑަ ބީކެވެ.