އަމާޒަކީ މިދިޔަ އަހަރު އިގްތިސާދު ހުރި މިންވަރަށް އިޔާދަކުރުން: ފިނޭންސް މިނިސްޓަރ
16 ނޮވެމްބަރު 2020 | ހޯމަ 09:52މި ބަޖެޓުގައި ވަނީ މި ހާލަތުން އަރައިގަތުމަށް ކޮންމެހެން ކުރަން ޖެހޭ ކަންތައްތައް: އަމީރު
ފިނޭންސް މިނިސްޓަރ އިބްރާހިމް އަމީރު ރައްޔިތުންގެ މަޖިލިހުގެ ޖަލްސާއެއްގައި
ސަރުކާރުގެ އަމާޒަކީ މިދިޔަ އަހަރު އިގްތިސާދު ހުރި މިންވަރަށް އިޔާދަކުރުން ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ހޯމަ ދުވަހުގެ ޖަލްސާގައި އަންނަ އަހަރަށް ލަފާ ކުރާ ދައުލަތުގެ ބަޖެޓަށް ބަހުސް ފަށާފައިވާއިރު، ފިނޭންސް މިނިސްޓަރ ވަނީ މި ޖަލްސާގައި ބައިވެރިވެވަޑައިގެންފައެވެ.
ޖަލްސާގައި ވާހަކަ ދައްކަވަމުން ފިނޭންސް މިނިސްޓަރ އަމީރު ވިދާޅުވީ މި ބަޖެޓު ހުށައެޅުމުގެ އެންމެ ބޮޑު ބޭނުމަކީ ކޮވިޑް-19 އާ ގުޅިގެން ކުރިމަތިވެފައިވާ އިގްތިސާދީ ހާއްސަ ހާލަތުން، އަރައިގަތުން ކަމަށެވެ. އަދި މި ހާލަތަކީ އަބަދުވެސް ބަދަލުވަމުންދާ ހާލަތެއް ކަން ގަބޫލުކުރައްވާ ކަމަށް ވިދާޅުވެ އަމީރު ވަނީ ބަޖެޓުގައި ވަނީ މި ހާލަތުން އަރައިގަތުމަށް ކޮންމެހެން ކުރަން ޖެހޭ ކަންތައްތައް ކަން މެމްބަރުންނަށް ސާފުކޮށްދެއްވާފައެވެ. އަދި ސަރުކާރުގެ ސިޔާސަތުތަކުގެ ސަބަބުން މި ހާލަތު ދިގު މުއްދަތަކަަށް ދެމިގެން ނުދާނެ ކަން ދުނިޔޭގެ އިގްތިސާދީ މާހިރުން ވެސް ގަބޫލުކުރާނެ ކަމަށް ވިދާޅުވިއެވެ.
މިދިޔަ އަހަރު ރާއްޖޭގެ އިގްތިސާދު އޮތް ހާލަތާއި ގުޅިގެން ވާހަކަ ދައްކަވަމުން ފިނޭންސް މިނިސްޓަރ ވިދާޅުވީ މިދިޔަ އަހަރުގެ ޑިސެމްބަރު މަހު ރާއްޖޭގެ އިގްތިސާދު އޮތީ ގާތްގަނޑަކަށް 85 ބިލިއަން ރުފިޔާގައި ކަމަށެވެ. އެހެންނަމަވެސް މިހާރު އިގްތިސާދު 54 ބިލިއަން ރުފިޔާއަށް ކުޑަވެފައިވާއިރު އަމާޒަކީ ކުރިން ހުރި މިންވަރަށް އިގްތިސާދު އިޔާދަކުރުން ކަމަށެވެ.
ބަޖެޓު ބަހުސްގައި ބައެއް މެމްބަރުން ވަނީ ލިބޭ އާމްދަނީ އާއި އެއްވަރަށް ބަޖެޓު ކުޑަކުރުމަށް ގޮވާލައްވާފައެވެ. މިކަމަށް ޖަވާބުދާރީވަމުން މިނިސްޓަރ ވިދާޅުވީ އެއީ ކުރެވިދާނެ ކަމެއް ކަމަށެވެ. ނަމަވެސް އަމާޒަކީ އިގްތިސާދު ފުޅާކުރުން ކަމަށްވާއިރު، ލިބޭ މިންވަރަކުން ދަރަނި ހޯދައިގެން ވެސް މި އަމާޒު ހާސިލު ކުރަން ބޭނުންވާކަން ހާމަކުރެއްވިއެވެ. ފިނޭންސް މިނިސްޓަރ ވިދާޅުވީ މިގޮތަށް ކަންކަން ނުކޮށްފިނަމަ، އިގްތިސާދު ދާނީ ކުޑަވަމުން ކަމަށެވެ.
އަންނަ އަހަރަށް ލަފާކުރާ ދައުލަތުގެ ބަޖެޓްގެ ޖުމްލަ އަދަދަކީ 34.7 ބިލިއަން ރުފިޔާއެވެ. މީގެ ތެރެއިން ޚަރަދުގެ ގޮތުގައި ހިނގާނެކަމަށް ބެލެވެނީ 33.3 ބިލިއަން ރުފިޔާއެވެ. މި ފައިސާގެ 62.3 އިންސައްތަ ހޭދަވަނީ ރިކަރަންޓް ހަރަދަށެވެ. އަދި ކެޕިޓަލް އެކްސްޕެންޑިޗަރއަށް ހަރަދުވަނީ 37.7 އިންސައްތައެވެ. ބާކީ 1.5 ބިލިއަން ރުފިޔާ ހަރަދުކުރުމަށް ކަނޑައަޅާފައިވަނީ ދައުލަތުގެ ދަރަނި އަދާކުރުމަށެވެ.
ބަޖެޓު ބަހުސްގައި މެމްބަރުން ވަނީ ލިބޭ އާމްދަނީއަށް ވުރެ ހަރަދުތައް ބޮޑުވުމުން ބަޖެޓަށް ފައިނޭންސް ކުރެވިދާނެތޯ ސުވާލު އުފައްދަވާ ކަންބޮޑުވުން ފާޅުކުރައްވާފައެވެ. ނަމަވެސް ގިނަ މެމްބަރުން ވަނީ ޖުމްލަކޮށް ބަޖެޓުގައި ހިމެނިފައިވާ ކަންކަމާއިމެދު ހިތްހަމަޖެހިވަޑައިގަންނަވާ ކަމަށް ވިދާޅުވެފައެވެ.
