މާފުށީ ކައުންސިލް ފުޓްސަލް ކަޕް: ޗެމްޕިއަންކަން ސްޓްރައިކާސް އާއި ސްޕާކްލްސްއަށް

ކ. މާފުށީ ކައުންސިލުން އިންތިޒާމުކޮށްގެން ބޭއްވި "މާފުށީ ކައުންސިލް ފުޓްސަލް ކަޕް 2020" ގެ ފިރިހެން ބައިގެ ޗެމްޕިއަންކަން ސްޓްރައިކާސް އެފްސީ ހޯދިއިރު، އަންހެން ބައިގެ ޗެމްޕިއަންކަން ސްޕާކްލްސް ހޯދައިފިއެވެ.

މި މުބާރާތަކީމާފުށީ ކައުންސިލުގެ ފަރާތުން އެ ރަށުގައި ދިރިއުޅޭ ރައްޔިޔުންނަށް ހާއްސަކޮށްގެން ބޭއްވި ފުޓްސަލް މުބާރާތެކެވެ. އަދި މިއީ މާފުށީ ކައުންސިލުން އިންތިޒާމުކޮށްގެން ބޭއްވި ފުރަތަމަ ފުޓްސަލް މުބާރާތެވެ.

މި މުބާރާތުގެ ފިރިހެން ބައިގައި ޖުމްލަ 17 ޓީމެއް ވަނީ ވާދަކޮށްފައެވެ. މި ބައިގެ ޗެމްޕިއަންކަން ސްޓްރައިކާސް ހޯދީ ހުކުރު ދުވަހުގެރޭ ކުޅުނު ފައިނަލް މެޗުގައި ބްލަންކޯ އެފްސީ އަތުން 5-3 ން މޮޅުވެގެންނެވެ.

ފިރިހެން ބައިގެ އެންމެ މޮޅު ކުޅުންތެރިޔާގެ މަގާމާއި އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދީ ސްޓްރައިކާސްގެ އަޙްމަދު ޝަމާލެވެ. އަދި އެންމެ މޮޅު ކޯޗަކަށް ސްޓްރައިކާސްގެ ކޯޗު ނަސީޙް މުޙައްމަދު ހޮވުނުއިރު، ފިރިހެން ބައިގެ ފެއާޕްލޭ ޓީމަކީ ހޯމީސްއެވެ.

ފިރިހެން ބައިގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ދިންއިރު، މި ބައިގެ ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ވަނީ ދީފައެވެ. އަދި ފިރިހެން ބައިގެ ފެއާޕްލޭ ޓީމަށް ހޮވުނު ހޯމީސްއަށް 5،000 ރުފިޔާގެ ފައިސާގެ އިނާމެއް ވަނީ ދީފައެވެ.

މީގެ އިތުރުން މި މުބާރާތުގެ އަންހެން ބައިގައި ހަ ޓީމެއް ވާދަކުރިއިރު، މި ބައިގެ ޗެމްޕިއަންކަން ސްޕާކްލްސް ހޯދީ ހުކުރު ދުވަހުގެރޭ ކުޅުނު ފައިނަލް މެޗުގައި ސްޓްރައިކާސް އަތުން 4-3 ން މޮޅުވެގެންނެވެ.

އަންހެން ބައިގެ އެންމެ މޮޅު ކުޅުންތެރިޔަކަށް ހޮވުނީ ސްޕާކްލްސްގެ ޝަރުވާ މުޙައްމަދެވެ. އަދި މި ބައިގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދީ ޝަރުވާ އާއި ސްޓްރައިކާސްގެ އައިމިނަތު ސުވައިދާއެވެ. އަދި އެންމެ މޮޅު ކޯޗަކަށް ސްޕާކްލްސްގެ ކޯޗު އަޙްމަދު ޝަހީން ހޮވުނުއިރު، އަންހެން ބައިގެ ފެއާޕްލޭ ޓީމަކީ ސައިރެންސްއެވެ.

އަންހެން ބައިގެ ޗެމްޕިއަން ޓީމަށް 17،000 ރުފިޔާގެ ފައިސާގެ އިނާމެއް ދިންއިރު، މި ބައިގެ ރަނަރަޕް ޓީމަށް ވަނީ 5،000 ރުފިޔާގެ ފައިސާގެ އިނާމެއް ވަނީ ދީފައެވެ. އަދި އަންހެން ބައިގެ ފެއާޕްލޭ ޓީމަށް ހޮވުނު ސައިރެންސްއަށް 3،000 ރުފިޔާގެ ފައިސާގެ އިނާމެއް ވަނީ ދީފައެވެ.

މާފުށީ ކައުންސިލުން މައުލޫމާތުދޭ ގޮތުގައި މިމުބާރާތް ބޭއްވުމުގެ މައިގަނޑު މަގުސަދަކީ މާފުށީގައި ދިރިއުޅޭ ރައްޔިތުން، ހާއްސަކޮށް ޒުވާނުންގެ މެދުގައި އެކުވެރިކަމާއި އެއްބައިވަންތަކަށް ގާއިމުކުރުމާއި، ރައްޔިތުންގެ މެދުގައި ގުޅުން ބަދަހިކޮށް އެކުވެރި މާހައުލެއް ހޯދައި ދިނުމާއި، އިޖުތިމާޢީ ރޫހާއި ކުޅިވަރުގެ ރޫހު އާލާކޮށް ދިރުވައި، ރާއްޖޭގައި ފުޓްސަލް ކުރިއަރުވަން އެހީތެރިވުމާއި ފުޓްސަލް ހުނަރު އިތުރުކުރުމާއި، އަދި ރަށުން ބޭރުގައި ބާއްވާ މުބާރާތްތަކުގައި އެ ރަށް ތަމްސީލުކުރުމަށް ކުޅުންތެރިން ތަމްރީނުކޮށް، އެ ރަށުގެ ޒުވާނުންނަށް މުބާރާތްތައް ކުޅުމުގެ ފުރުސަތު ހޯދައިދީ، ރައްޔިތުން ދުޅަހެޔޮ ސިއްހަތެއްގައި ތިބުމަށް ހިތްވަރު ދިނުމެވެ.