މުއްދަތެއް ނެތް ގޮތަށް އުތީމު ކައުންސިލްގެ ރައީސް އަބްދުﷲ ރަޝީދު ސަސްޕެންޑުކޮށްފި
15 ނޮވެމްބަރު 2020 | އާދީއްތަ 09:1611 މައްސަލައެއް ދަނީ ބަލަމުން
ހއ. އުތީމު ކައުންސިލްގެ ރައީސް އަބްދުﷲ ރަޝީދު، ގިނަ ތުހުމަތުތަކެއް އޭނާގެ މައްޗަށް ކުރެވިފައިވޭ
ބަލަމުންދާ މައްސަލަތަކާއި ގުޅިގެން ހއ. އުތީމު ކައުންސިލްގެ ރައީސް އަބްދުﷲ ރަޝީދު ސަސްޕެންޑުކޮށްފިއެވެ.
ލޯކަލް ގަވަމަންޓް އޮތޯރިޓީ (އެލްޖީއޭ) އިން ރަޝީދު ސަސްޕެންޑް ކުރީ މުއްދަތެއް ނެތް ގޮތަށެވެ.
އެލްޖީއޭއިން ރަޝީދަށް ފޮނުވާފައިވާ ސިޓީގައި ބުނެފައިވަނީ އެ އޮތޯރިޓީއަށް ހުށަހަޅާފައިވާ ގިނަ މައްސަލަތަކެއް ބަލަން މި މަހު 8 ވަނަ ދުވަހު ބޭއްވި ބައްދަލުވުމެއްގައި ނިންމާފައިވާ ކަަމަށެވެ. އޭނާއާ ގުޅޭ 11 މައްސަލައެއް އެ އޮތޯރިޓީ އަށް ހުށަހަޅާފައިވާއިރު، މިމައްސަލަތައް ބަލައި ނިމެންދެން ރަޝީދު ސަސްޕެންޑް ކުރުމަށް އެއޮތޯރިޓީން ނިންމާފައިވެއެވެ.
ރަޝީދާ ގުޅޭ ގޮތުން ހުށަހަޅާފައިވާ މައްސަލަތަކަކީ ކޭބަލް ޓީވީ ޚިދުމަތް ދިނުމާ ގުޅޭ މައުލޫމާތު ޝީޓުގައި ފަސް އަހަރަށް ކުއްޔަށް ދިނުމަށް ޖަހާފައިވީއިރު 10 އަހަރަށް އެގްރިމަންޓު ކުރުމާއި، މިއަހަރުގެ ޖެނުއަރީ މަހުން އޮކްޓޯބަރު މަހުގެ ނިޔަލަށް ކޭބަލް ޓީވީ އޮޕަރޭޓް ކުރާ ފަރާތުން ކުލި ދައްކާފައި ނުވާއިރު އެކަމާއި ގުޅިގެން ރަސްމީކޮށް އެއްވެސް އެންގުމެއް އަންގާފައި ނެތުމާއި، ކޭބަލްޓީވީ ޚިދުމަތް ދޭ ފަރާތުން ގަންނަން ޖެހޭ ޑީކޯޑަރު ގަތުމަށް ކައުންސިލްގެ ބަޖެޓުން ހަރަދު ކޮށްފައިވާ ކަމަށެވެ. އަދި ރަށް ކުނި ކަހާ ސާފުކުރުމަށް ކޮންޓްރެކްޓް އުސޫލުން ހަތަރު މީހުން ނެގި އިރު އެކަމަށް އެދި ހުށަހެޅި މީހުންނާ އިންޓަވިއުކޮށްފައި ނުވުމާއި، މަސައްކަތު މީހެއް މަގާމުން ވަކިވުމުން އެ މަގާމަށް އިއުލާން ކުރުމަށްފަހު ކައުންސިލަރު ބޭނުން މީހަކު މަގާމަށް ނެގުމާއި، ކައުންސިލަށް ހޯދާ ތަކެތި ގަތުމުގައި ބިޒްޓްރެކްސް އިންޓަނޭޝަނަލް ކިޔާ ކުންފުންޏަކުން އެތަކެތި އެކިފަހަރު މަތިން ހޯދާފައިވުމާއި އިތުރަށް ހޯދަން ޖެހޭ ދެ ކޯޓޭޝަން ވެސް އެ ކުންފުނިން ހޯދާފައިވުން ހިމެނެއެވެ.
މީގެ އިތުރުން ވައްކަމުގެ މައްސަލައެއްގައި ސިވިލް ސަރވިސް ވަޒީފާއިން ވަކިކޮށްފައިވާ މީހަކު އުތީމު އިމާމުންގެ ޕޫލަށް ވޭޖް އެމްޕްލޯއިމަންޓުގެ ދަށުން ނެގުމާއި، ކައުންސިލުން ކުރަންޖެހޭ މަސައްކަތްތައް ކުރުމުގައި މާލިއްޔަތު ގަވާއިދުގައި ޕްރޮކިއުމަންޓް އުސޫލުތަކާ އެއްގޮތަށް ލިޔެކިޔުންތައް ފުރިހަމަ ނުކުރުމާއި، ކައުންސިލަށް ލިބޭ ފައިސާގެ އެހީތަކުގެ ރިކޯޑެއް ބަލަހައްޓާފައި ނެތުމުގެ އިތުރުން ކައުންސިލް އޮފީސް ގޯތީގައި ހުރި ނިކަގަސް ކެނޑުމުގައި އިދާރީ ގޮތުން ފުރިހަމަކުރަން ޖެހޭ ކަންކަން ނުކޮށް ހުރި މައްސަލައެވެ.
މިމައްސަލަތަކާއި ގުޅިގެން ރަޝީދަށް ޖަވާބުދާރީވުމުގެ ފުރުސަތުދީފައިވާއިރު، އެލްޖީއޭއިން ބުނީ މި މަހު 24 ވަނަ ދުވަހުގެ މެންދުރު 2:00ގެ ނިޔަލަށް ވަގުތު ދީފައިވާ ކަމަށެވެ.
ރަޝީދުގެ މިމައްސަލަތައް ބަލަމުންދާއިރު، އަންނަ އަހަރު މާޗުމަހު ބޭއްވުމަށް ނިންމާފައިވާ ލޯކަލް ކައުންސިލް އިންތިޚާބުގައި ވެސް އުތީމު ކައުންސިލްގެ ރައީސް ކަމަށް އޭނާ ވަނީ ކުރިމަތިލާފަ އެވެ.
