މިދިޔަ މަހު ބޭރަށް ހިންގުން ޖެހިގެން 1003 ކޭސް ރިޕޯޓުކޮށްފައިވޭ: އެޗްޕީއޭ
15 ނޮވެމްބަރު 2020 | އާދީއްތަ 09:16ސެޕްޓެންބަރު މަހު 767 ކޭސް ރިޕޯޓުކޮށްފައިވޭ
އޭޑީކޭ ހޮސްޕިޓަލް، އާދަޔާ ޚިލާފަށް ބަނޑުގައިރިއްސާ ނަމަ އަވަހަށް ޑޮކްޓަރަށް ދެއްކުމަށް އިލްތިމާސްކޮށްފައިވޭ
މިދިޔަ މަހު ބޭރަށް ހިންގުން ޖެހިގެން 1003 ކޭސް ރިޕޯޓުކޮށްފައިވާ ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ރޯގާގެ ގޮތުގައި ފެތުރެމުންދާ ބަލިތަކުގެ ހާލަތާއި ބެހޭ ގޮތުން އެޗްޕީއޭއިން ނެރުނު ރިޕޯޓުގައިވާ ގޮތުގައި، އެހެން އަހަރުތަކާ އަޅާބަލާއިރު، އަހަރުގެ މިހާތަނަށް ބޭރަށް ހިންގުން ޖެހިގެން ރިޕޯޓްކޮށްފައިވާ އަދަދު މަދެވެ. ނަމަވެސް މި އަހަރުގެ ފުރަތަމަ 6 މަހާ އަޅާބަލާއިރު، އޮކްޓޫބަރު މަހު ބޭރަށް ހިންގުން ޖެހިގެން ރިޕޯޓްކޮށްފައިވާ އަދަދު ވަނީ އިތުރުވެފައެވެ. އެގޮތުން ސެޕްޓެންބަރު މަހު 767 ކޭސް ރިޕޯޓުކޮށްފައިވާއިރު، އޮކްޓޫބަރު މަހު މި އަދަދު ވަނީ 1003 އަށް އިތުރުވެފައެވެ.
ބޭރަށް ހިންގުމާއި ހޮޑުލުމުން ރައްކާތެރިވުމަށް އަޅަންޖެހޭ ފިޔަވަޅުތަކާއި ބެހޭ ގޮތުން އެޗްޕީއޭއިން ބުނީ ކެއުމުގެ ކުރިން އަދި ކާބޯތަކެތި ތައްޔާރުކުރުމުގެ ކުރިން ސައިބޯނި ލައިގެން ރަނގަޅަށް އަތް ދޮވުމާއި، ކާބޯތަކެތި ރަނގަޅަށް ކައްކައިގެން ބޭނުންކުރުމާއި ރޯ ތަރުކާރީއާއި މޭވާ ރަނގަޅަށް ދޮވެގެން ބޭނުން ކުރަންޖެހޭ ކަމަށެވެ. އަދި ގޭގައި ކާބޯތަކެތި ރައްކާކުރާއިރު ރައްކާކުރާ ތަނަކީ ސާފު ތާހިރު ތަނެއްތޯ ބެއްލުމާއި ކާބޯތަކެތި ތައްޔާރު ކުރާ ތަންތަނާއި ތަކެތި ރަނގަޅަށް ދޮވެ ސާފުކުރަން ޖެހެއެވެ.
ކާބޯތަކެއްޗަށް ދިރޭ ސޫފާސޫތްޕަށް ނޭރެވޭނެހެން މަތިޖަހާފައި ބެހެއްޓުމާއި، ކެއުމުގައި ވީހާވެސް ތާޒާ ކާނާ ބޭނުން ކުރުމާއި ކާބޯތަކެތި ހަލާކުނުވާނޭހެން ރައްކާކުރުމަށް އެޗްޕީއޭއިން އެދިފައިވެއެވެ. އަދި ކެއްކުމަށާއި ފެން ބުއިމަށް ފުޅީގައި ބަންދުކޮށްފައިވާ ފެން ނުވަތަ ކޮލޮރިންޓް ކޮށްފައިވާ ފެން ނުވަތަ ވޯޓާރ ސަޕްލައި ފެން ނުވަތަ ފެން ކައްކާއިގެން ބޭނުން މުހިންމު ކަމަށެވެ.
އެޗްޕީއޭއިން ބުނީ ބޭރަށް ހިންގުމާއި ހޮޑުލުން ޖެހިއްޖެ ނަމަ ގިނަގިނައިން ލޮނުޕެކެޓު (އޯ.އާރ.އެސް)، ފެން އަދި ސޫޕް، ކުރުނބާ ފެންފަދަ ދިޔާތަކެތި ބޭނުންކުރަން ޖެހޭ ކަމަށެވެ.
މީގެ އިތުރުން ބޭރަށް ހިންގުމުގެ އިތުރުން އާދަޔާ ޚިލާފަށް ކަރުހިއްކުމާއެކު ބޮލަށް އެނބުރުން އެރުމާއި، މާބޮޑަށް ވަރުދެރަވުމާއި، ކުޑަކަމުދެވޭ މިންވަރު މަދުވުމާއި، ގިނަގިނައިން ހޮޑުލެވުމާއި ލެވޭހޮޑުގައި ލޭގެ އަސަރު ހުރުމާއި، ބޮޑުކަމުދެވޭތަކެތީގައި ލޭގެ އަސަރު ހުރުމާއި، އާދަޔާ ޚިލާފަށް ބަނޑުގައިރިއްސާ ނަމަ އަވަހަށް ޑޮކްޓަރަށް ދެއްކުމަށް އެޗްޕީއޭއިން ވަނީ އިލްތިމާސްކޮށްފައެވެ. އަދި ބޭރަށް ހިންގުމުގެ އަލާމާތްތައް ނުފެންނަތާ 2 ދުވަސް ވަންދެން، ސްކޫލު ކުދިން ސްކޫލަށް ނުފޮނުވުމަށާއި، މަސައްކަތަށް ނުނިކުމެ ގޭގައި މަޑު ކުރުމަށް ވެސް އެޗްޕީއޭއިން ވަނީ އިލްތިމާސްކޮށްފައެވެ.
