މި ބަޖެޓުން ޤާނޫނުގައި ލާޒިމްކުރާ ކަންކަން ވެސް ނުކުރެވޭނެ: އެޗްއާރުސީއެމް
ފުރަތަމަ ޕްލޭން ކުރީ 39 މިލިއަން ރުފިޔާގެ ބަޖެޓެއް
އެޗްއާރްސީއެމްއަށް އަލަށް ނެގުނު މެމްބަރުން ހުވާކުރުމުގެ ރަސްމިއްޔާތުގެ ތެރެއިން
އަންނަ އަހަރަށް ލަފާކޮށް ދައުލަތުން ހިއުމަން ރައިޓްސް ކޮމިޝަން (އެޗްއާރުސީއެމް) އަށް އެކަށައަޅާފައިވާ ބަޖެޓުން ޤާނޫނުގައި ލާޒިމްކުރާ ކަންކަން ވެސް ނުކުރެވޭނެ ކަމަށް އެ ކޮމިޝަނުން ބުނެފިއެވެ.
ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމިޓީގެ ހޮނިހިރު ދުވަހުގެ ބައްދަލުވުމުގައި އެޗްއާރުސީއެމްގެ މެމްބަރު މުއުމިނާ ވަހީދު ވިދާޅުވީ ބަޖެޓާ ގުޅޭ ގޮތުން އެ ކޮމިޝަނުގެ ވަރަށް ބޮޑެތި ކަންބޮޑުވުންތަކެއް އެބަހުރި ކަމަށެވެ.
އެގޮތުން މި އަހަރަށް ކޮމިޝަނާ ގާނޫނުން މަތިކޮށްފައިވާ ޒިންމާތަކާއި އެންޓި ޓޯޗާ ގާނޫނުގެ ދަށުން ރާވާފައިވާ ހަރަކާތްތަކަށް އެންމެ ފުރަތަމަ ޕްލޭން ކުރީ 39 މިލިއަން ރުފިޔާގެ ބަޖެޓެއް ނަމަވެސް، ބަޖެޓް ސީލިންއަށް ފެއްތުމަށްޓަކައި 30.3 މިލިއަން ރުފިޔާގެ ބަޖެޓެއް ހުށަހެޅީ ކަމަށް މުއުމިނާ ވިދާޅުވިއެވެ.
އެހެންނަމަވެސް، ފިނޭންސް މިނިސްޓްރީން ފޮނުވާފައިވާ ބަޖެޓުގައި ވަނީ 24 މިލިއަން ރުފިޔާ ކަމަށާއި މިއީ ހުށަހެޅި އަދަދަށްވުރެ 18 އިންސައްތަ ދަށް އަދަދެއް ކަން ފާހަގަ ކުރެއްވިއެވެ. އަދި މުވައްޒަފުންގެ މުސާރައާއި އިދާރީ ކަންކަމަށް ޚަރަދުކުރުމަށްފަހު ޕްރޮގްރާމުތައް ހިންގުމަށް ބާކީ އޮންނާނީ 5 މިލިއަނެއްހާ ރުފިޔާ ކަމަށް ވިދާޅުވިއެވެ.
މިހާރު ކަނޑައަޅާފައި ބަޖެޓާ ގުޅިގެން އިތުރަށް ވާހަކަދައްކަވަމުން، މުއުމިނާ ވިދާޅުވީ އެންޓި ޓޯޗާ ގާނޫނުން މަތިކޮށްފައިވާ ޒިންމާ އަދާކުރަން އެކަށީގެންވާ ބަޖެޓު ލިބިފައި ނެތް ކަމަށެވެ. އަދި މިނިވަންކަން ގެއްލޭގޮތަށް ބަންދުގައި ތިބި މީހުންގެ މަރުކަޒުތަކާއި ޖަލުތަކަށް ކުރާ ޒިޔާރަތްތަކަށް މި ބަޖެޓުން ހަރަދު ނުކުރުވޭނެކަން ފާހަގަކުރެއްވިއެވެ.
މުއުމިނާ އިތުރަށް ވިދާޅުވީ އަންނަ އަހަރުގެ މޮނިޓަރިންގ ވިޒިޓްތަކަށް ރާވާފައި ވަނީ ތިން ލައްކަ ރުފިޔާ ނަމަވެސް، ބަޖެޓް ސީލިންއަށް ފެއްތުމަށް ދެ ލައްކަ ރުފިޔާ ޖެހި ކަމަށެވެ. ނަމަވެސް، މިހާރު ބަޖެޓު އުނިކޮށްފައިވާ ގޮތުން މެންޑޭޓްގައި ލާޒިމްކުރާ މިންވަރާއި ގާތަށް ވެސް އެކަން ނުކުރެވޭނެ ކަމަށް ވިދާޅުވިއެވެ.
މީގެ އިތުރުން ވިސްލްބްލޯވާ ޔުނިޓް ހިންގާނެ ވެރިއަކު މިވަގުތު ކޮމިޝަންގައި ނެތްކަމަށާއި ކޮމިޝަންގެ ލީގަލް އަދި އިންވެސްޓިގޭޓިވް ޑިޕާޓްމަންޓުން ދެ ސްޓާފުން ލައިގެން މަސައްކަތް ކުރުމުގައި ވަރަށް ބޮޑެތި ދަތިތަކެއް ހުރިކަން ފާހަގަކުރެއްވިއެވެ.
މުއުމިނާ ވިދާޅުވީ ވިސްލްބްލޯ ޔުނިޓް ހިންގުމަށް މަދުވެގެން އަށް މުވައްޒަފުން ބޭނުންވާ ކަމަށާއި ފިނޭންސް މިނިސްޓްރީއާއެެކު ބޭއްވި ބައްދަލުވުމުގައި "ކޮމްޕްރޮމައިޒް" ކޮށް، ސީލިންއަށް ފެއްތުމަށް ތިން މުވައްޒަފުން ލައިގެން އަންނަ އަހަރު އެ ޔުނިޓު ހިންގަން އެއްބަސްވި ކަމަށެވެ. އެހެންނަމަވެސް، ތިން މުވައްޒަފުން ލައިގެން އެ ޔުނިޓް މެނޭޖްކުރާނެ ވަރަށް ފައިސާ ލިބިފައި ނެތް ކަމަށް ވިދާޅުވިއެވެ.
އޭގެ އިތުރުން ބައިނަލްއަޤްވާމީ މުޖުތަމައުގައި ކޮމިޝަން ތަމްސީލް ކުރަން ޖެހޭ ހާލަތުގައި ކޮމިޝަން ތަމްސީލް ކުރާނެ ފައިސާ ދީފައި ނެތް ކަމަށް މުއުމިނާ ވިދާޅުވިއެވެ. އަދި ކޮވިޑް-19 ގެ މި ހާލަތަކީ މާލީ ދަތިކަން ދިމާވެފައިވާ ހާލަތެއް ކަން ގަބޫލުކުރެއްވި ނަމަވެސް މަސައްކަތްތައް ކުރެވޭނެ މިންވަރަށް ފައިސާ ދޭންޖެހޭނެ ކަމަށް އޭނާ ވިދާޅުވިއެވެ.
ފިނޭންސް މިނިސްޓްރީން ބަޖެޓު ސީލިންގއެއް ކަނޑައެޅީ މި އަހަރު އެޗްއާރްސީއެމްއިން މަސައްކަތްކޮށްފައިވާ މިންވަރަށް ބަލާފައިކަން ގަބޫލު ކުރައްވާ ކަމަށް ވިދާޅުވެ މުއުމިނާ ވަނީ މިއީ އައު ކޮމިޝަނެއްކަން ކޮމިޓީގެ މެމްބަރުންނަށް ހަނދުމަކޮށްދެއްވާފައެވެ.
އެގޮތުން އައު ކޮމިޝަނުން މަސައްކަތް ކުރާނެ އައު ތަސައްވުރެއް އޮތް އިރު އެ ކޮމިޝަންގެ މަސްއޫލިއްޔަތު ފުރިހަމައަށް އަދާކުރުމަށް މަސައްކަތްތައް ރާވާ ބައްޓަން ކުރަމުންދާ ކަމަށް ވިދާޅުވިއެވެ. އަދި އަންނަ އަހަރު ތެރޭގައިވެސް އެ ކޮމިޝަނަކީ ރައްޔިތުންގެ އިތުބަރު ހިފޭ ކޮމިޝަނަކަށް ކޮމިޝަން ހެދުމަށް މަސައްކަތްތައް ކުރުމުގެ ފުރުސަތު މިހާރުގެ ކޮމިޝަނަށް ދޭން ޖެހޭނެ ކަމަށް ވިދާޅުވިއެވެ.
