ސަސް އާއި ޔޫވީންވެސް ބިދޭސީ ހަތަރު ކުޅުންތެރިން ގެނެސްފި
14 ނޮވެމްބަރު 2020 | ހޮނިހިރު 05:42ސަސްއަށް ސޮއިކުރީ ގޯލްކީޕަރު މަމަކްތޯނޯފް، މިޑްފީލްޑަރު މޯރީ، ފޯވާޑް ޔޮނެޒޭވާ އަދި ފޯވާޑް ރޮޑްރިގޭޒް
ސަސްއާ ގުޅުނު ބިދޭސީ ހަތަރު ކުޅުންތެރިން
ކުރިއަށް އޮތް ފުޓްބޯޅަ ސީޒަނަށް ޓީމު ވަރުގަދަ ކުރުމުގެ ގޮތުން ފުރަތަމަ ޑިވިޝަނުގައި އަލަށް ވާދަކުރާ ސުޕަ ޔުނައިޓެޑް ސްޕޯޓްސް (ސަސް) އާއި ޔުނައިޓެޑް ވިކްޓަރީ (ޔޫވީ) އިންވެސް ބިދޭސީ ހަތަރު ކުޅުންތެރިއެއްގެ ސޮއި ހޯދައިފިއެވެ.
އެގޮތުން ސަސްއަށް ސޮއިކުރީ އުޒްބެކިސްތާން ލީގުގެ ޓީމުތަކަށް ކުޅެފައިވާ ގޯލްކީޕަރު މިރްޒޮހިދު މަމަކްތޯނޯފް އާއި، ލާއޯސް އާއި އާރްމީނިއާގެ އިތުރުން ރާއްޖޭގެ ޖޭޖޭއަށް ކުޅެފައިވާ ޖަޕާނުގެ މިޑްފީލްޑަރު އެއިސޫކޭ މޯރީ އާއި، އިންޑިއާގެ އައި ލީގާއި ޖަޕާނާއި މެލޭޝިއާ ލީގާއި އިންޑޮނީޝިއާ ސުޕަ ލީގު އަދި ބަންގްލަދޭޝް ޕްރިމިއާ ލިގުގައި ކުޅެފައިވާ ޖަޕާނުގެ ފޯވާޑް އަޓްސުޝީ ޔޮނެޒޭވާ އަދި ސްޕެއިނުގެ އެކި ޓީމުތަކަށް ކުޅެފައިވާ ފޯވާޑް ވިކްޓޯ ރޮޑްރިގޭޒެވެ.
ސަސްއިން ބިދޭސީ ހަތަރު ކުޅުންތެރިއެއްގެ ސޮއި ހޯދިއިރު، މީގެ ކުރިން އައު ސީޒަނަށް ސަސްއިން ވަނީ ފުރަތަމަ ޑިވިޝަނުގައި ގިނަ އަހަރުތަކެއް ވަންދެން ކުޅެފައިވާ ތަޖުރިބާކާރު ޑިފެންޑަރުން ކަމަށްވާ އަޙްމަދު ޝާފިއު (ޝާފީ)، އަބްދުﷲ ހަނީފް (ބެންޖޯ) އަދި ޓީސީ ސްޕޯޓްސް ކުލަބުގެ ކެޕްޓަން އަޙްމަދު ފައްރާހު (ފައްރަ) ގެ ސޮއިހޯދާފައެވެ. އަދި ކުރިން ޓީސީ އާއި ދެވަނަ ޑިވިޝަނުގެ ޓީމުތަކަށް ކުޅެފައިވާ ޒުވާން ކުޅުންތެރިޔާ އަޙްމަދު އައިހަމް ސަސްއަށް ސޮއިކުރިއިރު، ސަސްއަށް މިދިޔަ އަހަރުތަކުގައި ކުޅުނު އަޙްމަދު ފަރުހާން (ގައްބެ) ވެސް ވަނީ އެ ޓީމާއެކު ހަދާފައިވާ އެއްބަސްވުން އައު ކޮށްފައެވެ.
މިދިޔަ ސީޒަނުގެ ދެވަނަ ޑިވިޝަނުގެ ރަނަރަޕްކަން ހޯދާ މުޅިން އަލަށް ފުރަތަމަ ޑިވިޝަނުގައި ވާދަކުރުމަށް ސަސްއިން ފަރިތަކުރިންތައް ކުރިއަށްގެންދަމުން އަންނައިރު، އައު ސީޒަނަށް އެ ޓީމުން ކުރިމަތިލާނީ ތަޖުރިބާކާރު ކޯޗު އަޙްމަދު ނާޝިދު (ނާދު) އާ އެކުގައެވެ.
މީގެ އިތުރުން ޔޫވީންވެސް ވަނީ ސްކޮޑު ވަރުގަދަ ކުރުމަށް ބިދޭސީ ހަތަރު ކުޅުންތެރިއަކު އެ ޓީމަށް ގެނެސްފައެވެ. އެ ކުޅުންތެރިންނަކީ ޓީސީ ސްޕޯޓްސް ކުލަބުގައި 2018 ވަނަ އަހަރު މޮޅު ކުޅުމެއް ދެއްކި ކިރްގިސްތާންގެ މިޑްފީލްޑަރު އަނަޓޯލީ ވްލަސީޗޭވް އާއި، މީގެ ކުރިންވެސް ޔޫވީއަށް ކުޅެފައިވާ ކިރްގިސްތާނުގެ ގޯލްކީޕަރު ރުސްލާން އާމިރޯފާއި، ޔޫކްރޭނުގެ ފޯވާޑް ކީރްލޯ ސިލިޗް އަދި ކިރްގިސްތާނުގެ ޑިފެންޑަރު މަރަޓް އަދްޒިނިޔަޒޯފެވެ.
އައު ސީޒަނަށް ތައްޔާރުވުމަށް މި މަހުގެ އެއްވަނަ ދުވަހު ޔޫވީން ފަރިތަކުރުންތައް ފަށާފައިވާއިރު، އެ ޓީމުން ވަނީ އައު ސީޒަނަށް ބައެއް ތަޖުރިބާކާރު ކުޅުންތެރިން ގެނެސްފައެވެ. އޭގެ ތެރޭގައި ޓީސީ ސްޕޯޓްސް ކުލަބަށް ކުޅެމުން އައި ގައުމީ ފުޓްބޯޅަ ޓީމުގެ މިޑްފީލްޑަރު އިސްމާޢީލް އީސަ (މެސީ) އާއި، ކުލަބު ގްރީން ސްޓްރީޓްސްއަށް ކުޅެމުން އައި ގައުމީ ފުޓްބޯޅަ ޓީމުގެ މިޑްފީލްޑަރު މުޙައްމަދު އާރިފް (ބަކާ) ހިމެނެއެވެ. އަދި ޔޫވީން ވަނީ އީގަލްސްގެ އިސްމާއިލް ފަރުހާދު (ފަރޭ) އާއި އަޙްމަދު ނިޒާމް (ކުޑަ ނިޒާމްބެ) ގެ ސޮއިވެސް ހޯދާފައެވެ.
އައު ސީޒަނަށް ޔޫވީން ކުރިމަތިލާއިރު، މި ފަހަރުވެސް އެ ޓީމުގެ ކޯޗަކަށް ހުންނާނީ މިދިޔަ ސީޒަނުގެ މެދު ތެރެއިން އެ ޓިމާ ހަވާލުވި ކޯޗު މުޙައްމަދު އާދަމެވެ. އެކަމަކު މުޙަމަދު އާދަމުގެ އެދުމަކަށް ޔޫވީގެ ފަރިތަކުރުންތަކުގައި ތަޖުރިބާކާރު ކޯޗު އިހުސާން އަބްދުލް ޣަނީ (ސާންތި) އަންނަނީ ބައިވެރިވަމުންނެވެ. އަދި ކުރީގެ މަޝްހޫރު ގޯލްކީޕަރު އިސްމާޢީލް ޒަރިޔަންދުވެސް ވަނީ ޔޫވީގެ ފަރިތަކުރުންތަކުގައި ބައިވެރިވެފައެވެ.
އެފްއޭ ޗެރިޓީ ޝީލްޑް މެޗުން އަންނަ ޑިސެމްބަރު މަހުގެ އަށްވަނަ ދުވަހު ފުޓްބޯޅަ ސީޒަން ފަށާއިރު، ދިރާގު ދިވެހި ޕްރިމިއާ ލީގުގެ ކުޅުން ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމާފައިވަނީ ޑިސެމްބަރު މަހުގެ 13 ވަނަ ދުވަހުއެވެ.
