އިނގިރޭސިވިލާތުގައި ބައޯންޓެކްގެ ވެކްސިން ޑިސެންބަރު މަހުގެ މެދުތެރޭގައި ލިބޭނެ: ޕްރޮފެސަރ

އިނގިރޭސިވިލާތުގައި ބައޯންޓެކްގެ ވެކްސިން ޑިސެންބަރު މަހުގެ މެދުތެރޭގައި ލިބޭނެ ކަމަށް ޕްރޮފެސަރ އުގްރޫ ސަހިން ވިދާޅުވެއްޖެ އެވެ.

ބައޯންޓެކް އަދި ފިޒާއިން އުފައްދާ ވެކްސިން ތައްޔާރު ކުރުމުގައި އިސްކޮށް ހަރަކާތްތެރިވާ ޕްރޮފެސަރ އުގްރޫ ސަހިން ސްލައި ނިއުސްއަށް ދެއްވި ޚާއްސަ އިންޓަވިޔުއެއްގައި ވިދާޅުވީ ކުރިއަށް އޮތް ޑިސެންބަރު މަހުގެ މެދެއްހާ ހިސާބުގައި ޔޫރަޕް އަދި އެމެރިކާގައި ވެކްސިން ބޭނުން ކުރެވި ދިރިއުޅުން އާންމު ހާލަތަށް ރުޖޫއަވާނެ ކަމަށެވެ.

އަދި މިވެކްސިން އިނގިރޭސިވިލާގެ މީހުންނަށް ޑިސެންބަރު މަހުގެ ލިބޭނެ ކަމަށް ޕްރޮފެސަރ ވިދާޅުވި އެވެ.

ޕްރޮފެސަރ ވިދާޅުވީ އިނގިރޭސިވިލާތުގައި ވެކްސިންގެ ލައިސެންސްގެ ކަންތައް އަވަސްވި ވަރަކަށް ވެކްސިން ރައްޔިތުންނަށް ހަމައަށް ލިބުމުގައި އަވަސް ވެގެންދާނެ ކަމަށެވެ. އަދި އުންމީދު ކުރެވެނީ ލައިސެންސް ކަންތައް ހަމަޖެހި ޑިސެންބަރު މަހުގެ މެދެއްހާ ހިސާބުގައި ވެކްސިންގެ ފުރަތަމަ ޝިޕްމެންޓް ނެރެވޭނެ ކަމަށެވެ.

މީގެ އިތުރުން ޕްރޮފެސަރ ވިދާޅުވީ ވެކްސިން ބޭނުން ކުރަންފެށި ހާލަތު ރަނގަޅުވުމަށް ދުވަސްކޮޅެއް ނަގާނެ ކަމަށާއި، 2021 ވަނަ އަހަރުގެ މެދެއްހާ ހިސާބުގައި ހުރިހާ ކަމެއް އާންމު ހާލަތަށް އަންނާނެ ކަމަށެވެ.

ވެކްސިންއަށް އަލިއަޅުއްވާލައްވާ ޕްރޮފެސަރ ވިދާޅުވީ ބައޯންޓެކްގެ ވެކްސިންއަކީ 90 އިންސައްތަ ވަރުގަދަ ކާމިޔާބު ވެކްސިންއެއް ކަމަށެވެ. އަދި އެކި ޓެސްޓުގެ މަރުހަލާތަކުގައި ވަރަށް ރަނގަޅު ނަތީޖާ ފެނިފައިވާ ވެކްސިންއެއް ކަމަށް ޕްރޮފެސަރ ވިދާޅުވި އެވެ. އަދި ވެކްސިންއަށް ފުރިހަމަ އިތުބާރު އޮތްކަން ހާމަކުރައްވާ ޕްރޮފެސަރ ވިދާޅުވީ އެންމެ ފުރަތަމަ ވެކްސިން ޖަހާ މީހުންގެ ތެރޭގައި އޭނާ ހިމެނޭނެ ކަމަށެވެ.

ވެކްސިންއެއް ލިބެންދެން ކޮވިޑް-19ށް ރައްކާތެރިވުމަށް މުއައްސަސާއިން އަންގާ އެންގުންތަކަށް ބޯލަބާ އެގޮތަށް އަމަލުކުރުމަށް ޕްރޮފެސަރ ވަނީ އިލްތިމާސްކޮށްފަ އެވެ.