މުވައްޒަފުން މަދުކުރުމުގެ ވިސްނުމެއް ނެތް، ރިކަރަންޓް ހަރަދު އިތުރުވަނީ މިހެންވެ: ފިނޭންސް

ކޮވިޑުގެ ހާލަތުގައިވެސް މުވައްޒަފުން މަދުކުރުމުގެ ވިސްނުމެއް ނުގެންގުޅޭ ކަމަށާއި، އެހެންކަމުން ދައުލަތުގެ ހިންގުމުގެ ހަރަދު އިތުރުވާނެ ކަމަށް ފިނޭންސް މިނިސްޓްރީން ބުނެފިއެވެ.

2021 ވަނަ އަހަރަށް ލަފާ ކުރާ ދައުލަތުގެ ބަޖެޓު ދިރާސާ ކުރަމުންދާ ކޮމިޓީގައި ފިނޭންސް މިނިސްޓްރީން ވަނީ އަންނަ އަހަރަށް ލަފާ ކުރާ ބަޖެޓުގައި ރިކަރަންޓް ހަރަދު ބޮޑުވާ ސަބަބުތައް ތަފްސީލުކޮށްދީފައެވެ.

Advertisement

އަންނަ އަހަރަށް ލަފާކުރާ ދައުލަތުގެ ބަޖެޓްގެ ޖުމްލަ އަދަދަކީ 34.7 ބިލިއަން ރުފިޔާއެވެ. މީގެ ތެރެއިން ޚަރަދުގެ ގޮތުގައި ހިނގާނެކަމަށް ބެލެވެނީ 33.3 ބިލިއަން ރުފިޔާއެވެ. މި ފައިސާގެ 62.3 އިންސައްތަ ހޭދަވަނީ ރިކަރަންޓް ހަރަދަށެވެ. އަދި ކެޕިޓަލް އެކްސްޕެންޑިޗަރއަށް ހަރަދުވަނީ 37.7 އިންސައްތައެވެ. ބާކީ 1.5 ބިލިއަން ރުފިޔާ ހަރަދުކުރުމަށް ކަނޑައަޅާފައިވަނީ ދައުލަތުގެ ދަރަނި އަދާކުރުމަށެވެ.

ރިކަރަންޓް ހަރަދާ ގުޅޭގޮތުން ފިނޭންސް މިނިސްޓްރީގެ ބަޖެޓް އެގްޒެކެޓިވް ސަރުވަޝް އާދަމް ވިދާޅުވީ މި ދަނޑިވަޅުގައި މުވައްޒަފުންގެ އަދަދު މަދުކުރެވެން ނެތުމުން، އެ ފަރާތްތަކަށް ހިނގާ ހަރަދުތައް ބަޖެޓުގައި ހިމެނޭނެ ކަމަށެވެ.

ރިކަރަންޓް ހަރަދު ކަނޑައެޅުމުގައި މާލީ ވުޒާރާގެ މާ ބޮޑު ކޮންޓްރޯލެއް ނެތްކަން ފާހަގަކުރައްވާ ސަރުވަޝް ވިދާޅުވީ އެ ހަރަދު އިތުރަށް ބޮޑުވެގެން އަންނަނީ މިނިވަން މުއައްސަސާތަކާއި ސަރުކާރުގެ އެކި އޮފީސްތަކުގެ ޕްރޮގްރާމްތަކުގެ ސަބަބުން ކަމަށެވެ. އަދި މި އަހަރު ދަރަނި ބޮޑުވުމުގެ ސަބަބުން އިންޓްރެސްޓަށް ހިނގާ ހަރަދުތައް ބޮޑުވެ، ކެޕިޓަލް ހަރަދުތައްވެސް އިތުރުވާނެ ކަމަށެވެ.

މިކަމާއި ގުޅޭގޮތުން ކޮމިޓީގައި ވާހަކަދައްކަވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ ކެޕިޓަލް އިންވެސްޓްމެންޓްތައް އިތުރުވުމުން ކުރަންޖެހޭ ހަރަދުތައްވެސް އިތުރުވާނެ ކަމަށެވެ.

އަމީރު ވިދާޅުވީ 2020 ވަނަ އަހަރު ބަޖެޓު އެކުލަވާލިއިރު 2019 ވަނަ އަހަރަށް ވުރެ ރިކަރަންޓު ހަރަދު އިތުރުވީ ނަމަވެސް، އެ ހަރަދުތައް ކުޑަކުރުމަށް ކުރެވުނު މަސައްކަތްތަކުގެ ތެރެއިން ރިކަރަންޓް ހަރަދު 20 ބިލިއަނަށް ކުޑަ ކުރެވުނު ކަމަށެވެ. 2020 ވަނަ އަހަރަށް ފާސްކުރެވުނު ބަޖެޓުގައި ރިކަރަންޓް ހަރަދުގެ ގޮތުގައި ކަނޑައަޅާފައިވަނީ 22 ބިލިއަން ރުފިޔާއެވެ.

އަންނަ އަހަރަށް ލަފާކޮށް ދައުލަތުން ހުށައަޅާފައިވާ ބަޖެޓަކީ ކޮންމެހެން ކުރަން ނުޖެހޭ ހަރަދުތައް ވަރަށް ބޮޑަށް ހިފަހައްޓާފައިވާ ބަޖެޓެއް ކަމަށް ފިނޭންސް މިނިސްޓަރ އަމީރު ވަނީ ވިދާޅުވެފައެވެ. އަދި މި އަހަރުގެ ބަޖެޓަކީ އިގްތިސާދު އަލުން އާރާސްތުކުރުމަށް ހާއްސަކުރެވިގެން އެކުލަވާލެވުނު ބަޖެޓެއް ކަމަށްވެސް ވިދާޅުވިއެވެ.