ޔުއެފާ ނޭޝަންސް ލީގުގެ މެޗުތަކަށް ތައްޔާރުވުމުގެ ގޮތުން ބުދަ ދުވަހުގެރޭ ކުޅުނު މެޗުން ފިންލެންޑް އަތުން ދުނިޔޭގެ ޗެމްޕިއަން ފްރާންސް ބަލިއިރު، ނޭޝަންސް ލީގުގެ ޗެމްޕިއަން ޕޯޗުގަލުން އެންޑޯރާގެ މައްޗަށް ބޮޑު މޮޅެއް ހޯދައިފިއެވެ.

އަމިއްލަ ގައުމުގައި ކުޅުނު މެޗުން ފްރާންސް ބަލިވީ ފިންލެންޑް އަތުން 2-0 ގެ ނަތީޖާއަކުންނެވެ.

ދުނިޔޭގެ ރޭންކިންގެ 55 ވަނައިގައި އޮތް ފިންލެންޑުން ދުނިޔޭގެ ޗެމްޕިއަން ފްރާންސް ބަލިކުރިއިރު، މި މެޗަށް ފްރާންސުން ނުކުމެފައިވަނީ ބަދަލުތަކެއް ގެނެސްގެންނެވެ. މި މެޗުގައި ފިންލެންޑުން ކާމިޔާބުކުރި ދެ ލަނޑުވެސް އެ ޓީމުން ޖަހާފައިވަނީ ފުރަތަމަ ހާފުގައެވެ. އެގޮތުން މެޗުގެ 28 ވަނަ މިނެޓުގައި އެ ގައުމަށް ލީޑު ނަގައިދިނީ މާކަސް ފޯސްއެވެ. އަދި އޭގެ ތިން މިނެޓު ފަހުން ފިންލެންޑަށް ލީޑު ފުޅާކޮށްދިނީ ޖޯނީ ކޯކޯއެވެ.

ބުދަ ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުން ޕޯޗުގަލް މޮޅުވީ އެންޑޯރާ އަތުން 7-0 ގެ ތަފާތު ބޮޑު ނަތީޖާއަކުންނެވެ.

އަމިއްލަ ގައުމުގައި ކުޅުނު މި މެޗުގައި ޕޯޗުގަލުގެ ލަނޑުތައް ޖެހީ ޕެޑްރޯ ނެޓޯ، ޕައުލީނިއޯ، ރެނާޓޯ ސަންޗޭޒް، ކްރިސްޓިއާނޯ ރޮނާލްޑޯ އަދި ޔާއޯ ފެލިކްސްއެވެ. މީގެ ތެރެއިން ޕައުލީނިއޯ ދެ ލަނޑު ޖެހިއިރު، ޕޯޗުގަލުގެ އަނެއް ލަނޑަކީ އެންޑޯރާގެ ގާސިއާ މިރަމޮންޓޭޒް އަތުން ބައިކޮޅަށް ވަން ލަނޑެކެވެ.

މި މެޗު ޕޯޗުގަލުން ފަށާފައިވަނީ އެ ޓީމުގެ ކެޕްޓަން ރޮނާލްޑޯ ބެންޗުގައި ބައިންދައިގެންނެވެ. ދެވަނަ ހާފުގައި ކުޅެން އަރާ ރޮނާލްޑޯ ލަނޑު ޖެހިއިރު، އޭނާ ވަނީ މިހާތަނަށް ޕޯޗުގަލުގެ ގައުމީ ފުޓްބޯޅަ ޓީމަށް 102 ލަނޑު ހަމަކޮށްފައެވެ. އެހެންކަމުން ގައުމީ ފުޓްބޯޅަ ޓީމަށް އެންމެ ގިނަ ލަނޑު ޖެހުމުގެ ރިކޯޑު އޮތް އީރާނުގެ ލެޖެންޑް އަލީ ދާއީގެ ރިކޯޑާ ހަމަކުރަން ރޮނާލްޑޯ ދެން ބޭނުންވަނީ އެންމެ ހަތް ލަނޑެވެ.

މީގެ އިތުރުން ބުދަ ދުވަހުގެރޭ ބައިނަލްއަގުވާމީ އެކުވެރިކަމުގެ މެޗެއްގައި ނެދަލެންޑްސް އާއި ސްޕެއިން ބައްދަލުކުރިއިރު، މި މެޗު ނިމުނީ 1-1 ން ދެ ޓީމު އެއްވަރުވެގެންނެވެ.