އިންގްލެންޑާއި އައިސްލެންޑް ބައްދަލުކުރާ މެޗު ނިއުޓްރަލް ދަނޑެއްގައި ކުޅެނީ

ޔުއެފާ ނޭޝަންސް ލީގުގައި މި މަހު އައިސްލެންޑުން އިންގްލެންޑުގައި ކުޅެން ހަމަޖެހިފައި އޮތް މެޗު އަލްބޭނިއާގައި ކުޅުމަށް މަޝްވަރާ ކުރަމުން އަންނަ ކަމަށް ރިޕޯޓުތައް ބުނެފިއެވެ.

މި މަހުގެ 18 ވަނަ ދުވަހު އިންގްލެންޑުގެ ވެމްބްލީ ސްޓޭޑިއަމުގައި ކުޅެން ހަމަޖެހިފައި އޮތް މެޗު އެހެން ގައުމަކަށް ބަދަލުކުރަން ޖެހުނީ ކޮވިޑް-19 އާ ގުޅިގެން ދާދި ފަހުން އިނގިރޭސިވިލާތުގެ ސަރުކާރުން އެކުލަވާލި އުސޫލުތަކާ ގުޅިގެންނެވެ. އެގޮތުން އިނގިރޭސި ސަރުކާރުން ދާދި ފަހުން ހަމަޖައްސާފައިވާ އުސޫލުތަކުގައިވާ ގޮތުން ކޮވިޑް-19 ގެ ހާލަތު ގޯސްވެފައިވާ ޑެންމާކަށް ދާ އިންގްލެންޑް ނޫން ގައުމުތަކުގެ މީހުންނަށް އެ ގައުމަށް އެތެރެނުވެވޭނެއެވެ. އަދި އިނގިރޭސި ރަށްވެހިކަން އޮންނަ މީހަކު ޑެންމާކަށް ގޮސްފައި އައިސްފިނަމަ 14 ދުވަހަށް ހޯމް-އައިސޮލޭޝަނުގައި ހުންނަން ޖެހެއެވެ.

އެހެންކަމުން އިންގްލެންޑާއި އައިސްލެންޑް ބައްދަލުކުރާ މެޗު އިންގްލެންޑުގައި ނުކުޅެވޭގޮތްވީ އިންގްލެންޑާ ދެކޮޅަށް އައިސްލެންޑް ކުޅޭ މެޗުގެ ތިން ދުވަސް ކުރިން އެ ގައުމުން ޑެންމާކުގައި އެ ގައުމާ ދެކޮޅަށް ކުޅެން ހަަމަޖެހިފައި އޮތުމުންނެވެ.

އެހެންކަމުން މި މެޗު ނިއުޓްރަލް ދަނޑެއްގައި ކުޅުމަށް އިނގިރޭސި އެފްއޭއިން މަސައްކަތް ކުރަމުން އަންނައިރު، އަލްބޭނިއާގައި މި މެޗު ކުޅުމަށް އެ ގައުމުގެ ފުޓްބޯޅަ ފެޑެރޭޝަނާއެކު މަޝަވްރާ ކުރަމުން އަންނަ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ. ޔުއެފާގެ ގަވާއިދުގައިވާ ގޮތުން ގައުމުތަކުގެ ސަރުކާރުން ކަނޑައަޅާފައިވާ އުސޫލުތަކަށް ބޯލެނބުމުގެ ގޮތުން މެޗުތައް ކުޅޭ ވަގުތާއި ދަނޑަށް ބަދަލު ގެނެވޭނެ ގޮތަށް އޮތް ނަމަވެސް، ދަނޑު ބަދަލުކުރުމުގެ ކުރިން ޔުއެފާގެ ހުއްދަ ހޯދަން ޖެހޭނެއެވެ.

ކޮވިޑް-19 އާ ގުޅިގެން އިނގިރޭސިވިލާތުގެ ސަރުކާރުން އެކުލަވާލި އުސޫލުތަކާ ގުޅިގެން އިންގްލެންޑާއި އައިސްލެންޑް ބައްދަލުކުރާ މެޗު އިންގްލެންޑުގައި ނުކުޅެވޭއިރު، ބުދަ ދުވަހުގެރޭ ސްވިޑެންއިން ޑެންމާކުގައި އެ ގައުމާ ދެކޮޅަށް ކުޅޭ ބައިނަލްއަގުވާމީ އެކުވެރިކަމުގެ މެޗުގައި ދެ ގައުމީ ޓީމަށް ކުޅޭ އިނގިރޭސި ޕްރިމިއާ ލީގުގެ ކުލަބުތަކަށް ނިސްބަތްވާ ކުޅުންތެރިން ނުކުޅޭނެ ކަމަށް އެ ދެ ގައުމުގެ ފުޓްބޯޅަ އެސޯސިއޭޝަނުން ވަނީ ބުނެފައެވެ. އެގޮތަށް ނިންމީ އިނގިރޭސިވިލާތުގެ ސަރުކާރުން އެކުލަވާލި އުސޫލުތަކާއެކު، އެ ކުޅުންތެރިން ނިސްބަތްވާ ކުލަބުތަކުން އެކަމަށް އެދުމުންނެވެ.