2021 ވަނަ އަހަރު ހައުސިންގް މަޝްރޫއުތަކަށް 716 މިލިއަން ރުފިޔާ!
9 ނޮވެމްބަރު 2020 | ހޯމަ 04:57ސަރުކާރުގެ އެންމެ އިސް އެއް އަމާޒަކީ ފަޚުރުވެރި އާއިލާއެއް ބިނާކުރުމަށް މަގުފަހިކުރުން
ފްލެޓަށް އެދި ފޯމް ހުށަހެޅުމަށް ގިނަ ބަޔަކު ކިއޫގައި ޖެހިފައި
2021 ވަނަ އަހަރަށް ލަފާ ކުރާ ދައުލަތުގެ ބަޖެޓުގައި ހައުސިންގ މަޝްރޫއުތަކަށް 716 މިލިއަން ރުފިޔާ ހިމަނައިފި އެވެ.
ހޯމަ ދުވަހުގެ ޖަލްސާގައި އަންނަ އަހަރަށް ލަފާ ކުރާ ދައުލަތުގެ ބަޖެޓު ހުށައަޅުއްވާދެއްވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ ސަރުކާރުގެ އެންމެ އިސް އެއް އަމާޒަކީ ފަޚުރުވެރި އާއިލާއެއް ބިނާކޮށް، ޤަދަރުވެރި ދިރިއުޅުމެއް އުޅެވޭ ރައްޔިތެއްކަން ކަށަވަރުކޮށްދިނުމަށް، ރައްޔިތުންނަށް ދިމާވެފައިވާ ގެދޮރުގެ ދަތިކަމަށް ހައްލު ހޯދައިދިނުން ކަމަށެވެ.
އަދި އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަކީ ވެސް ސަރުކާރުގެ އެންމެ އިސް އެއް އަމާޒުކަން އޭނާ ފާހަގަކުރެއްވި އެވެ.
އަމީރު ވިދާޅުވީ މާލެއާއި ރާއްޖޭގެ އެކި ސަރަޙައްދުތަކުގައި ބޯހިޔާވަހިކަމަށް ޙައްލެއް ހޯދުމަށް، އެފޯޑަބަލް ހައުސިން މަޝްރޫތަކަށް ބޭނުންވާ އިކުއިޓީ ބަޖެޓުން ފޯރުކޮށްދިނުމަށް 2021 ވަނަ އަހަރު ހިމަނާފައިވާ ކަމަށެވެ. އަދި ސަރުކާރުގެ އަމާޒަކީ، އައު ހައުސިންގ މަޝްރޫޢުތަކުގެ އަމަލީ މަސައްކަތް ވީހާވެސް އަވަހަކަށް ފެށި، އަދި މިހާރު ކުރިއަށްދާ މަޝްރޫއުތައް ނިންމައި ފްލެޓްތައް ހައްޤުވާ ފާރާތްތަކަށް ހަވާލުކުރުން ކަމަށެވެ. އެގޮތުން ހައުސިން މަޝްރޫއުތަކަށް ޖުމްލަ 716 މިލިއަން ރުފިޔާ 2021 ވަނަ އަހަރަށް ބަޖެޓުކުރެވިފައިވާނެ ކަން އޭނާ ހާމަކުރެއްވި އެވެ.
ދިވެހި ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަކީ، މިހާތަނަށް އެއްވެސް ސަރުކާރަކަށް ހައްލު ނުކުރެވިވާ، ދިވެހި ރައްޔިތުން އެންމެ ކަންބޮޑުވާ އެއް މައްސަލަ އެވެ.
އެގޮތުން މާލޭގައި ދިރިއުޅެން ކަމުނުދާ ތަންތަނުގައި 21،013 އާއިލާއެއް ދިރިއުޅެމުންދާއިރު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުގެ ޓާގެޓަކީ، އެފަރާތްތަކަށް ބޯހިޔާވަހިކަން ފޯރުކޮށްދިނުމެވެ.
