ރެއާލުގެ ހަޒާޑާއި ކަސެމީރޯ ކޮވިޑް-19 އަށް ޕޮޒިޓިވްވެއްޖެ

ރެއާލް މެޑްރިޑުގެ ފޯވާޑް އެޑެން ހަޒާޑާއި މިޑްފީލްޑަރު ކަސެމީރޯ ކޮވިޑް-19 އަށް ޕޮޒިޓިވްވެއްޖެއެވެ.

މި ދެ ކުޅުންތެރިން ކޮވިޑް-19 އަށް ޕޮޒިޓިވްވިކަން ރެއާލުން ވަނީ ހޮނިހިރު ދުވަހު ހާމަކޮށްފައެވެ. ރެއާލުގެ ދެ ކުޅުންތެރިއަކު ވައިރަހަށް ޕޮޒިޓިވްވީ ސްޕެނިޝް ލީގުގައި އާދީއްތަ ދުވަހުގެރޭ ރަށުން ބޭރުގައި ވެލެންސިއާއާ ދެކޮޅަށް ކުޅެން އޮތް މެޗުގެ ކުރިން ހުކުރު ދުވަހު ހެދި ޓެސްޓުތަކުންނެވެ. އެއާއެކު ހަޒާޑާއި ކަސެމީރޯ އައިސޮލޭޝަނަށް ބަދަލުކޮށްފައިވާ ކަމަށް ރެއާލުން ވަނީ ބުނެފައެވެ. އަދި އެ ދެ ކުޅުންތެރިއަކު ފިޔަވައި އެ ޓީމުގެ އެއްވެސް ކުޅުންތެރިއަކު އަދި އޮފިޝަލަކުވެސް ވައިރަހަށް ޕޮޒިޓިވްނުވާ ކަމަށް ވަނީ ބުނެފައެވެ.

ކޮވިޑް-19 އަށް ހަޒާޑް ޕޮޒިޓިވްވިއިރު، އޭނާ އަނިޔާއިން ރަނގަޅުވެ ކުޅުމުގެ ތެރެއަށް އެނބުރި އައިސްފައިވަނީ މިދިޔަ ހަފުތާގެ ހޮނިހިރު ދުވަހުއެވެ. އެގޮތުން މި އަހަރުގެ ޖުލައި މަހަށްފަހު މިދިޔަ ހޮނިހިރު ދުވަހު ހަޒާޑް ރެއާލަށް މެޗެއް ކުޅެދިންއިރު، އަމިއްލަ ދަނޑުގައި ހުއެސްކާ އަތުން 4-1 ން ރެއާލް މޮޅުވި މެޗުގައި ހަޒާޑް ވަނީ ލަނޑުވެސް ޖަހާފައެވެ. މިއީ މިދިޔަ އަހަރުގެ އޮކްޓޯބަރު މަހުގެ ފަސް ވަނަދުވަހުގެ ފަހުން ހަޒާޑް ރެއާލަށް ޖަހައިދިން ފުރަތަމަ ލަނޑެވެ.

ރެއާލުގެ ދެ ކުޅުންތެރިއަކު ކޮވިޑް-19 އަށް ޕޮޒިޓިވްވިއިރު، މީގެ ކުރިން އެ ޓީމުގެ ޑިފެންޑަރު އެޑާ މިލިޓާއޯވެސް ވަނީ ވައިރަހަށް ޕޮޒިޓިވްވެފައެވެ.

ސްޕެނިޝް ލީގުގައި އާދީއްތަ ދުވަހުގެރޭ ވެލެންސިއާއާ ދެކޮޅަށް ރެއާލް ނުކުންއިރު، އެ ޓީމު އޮތީ ތާވަލުގެ ދެވަނައިގައި ކުޅުނު ހަތް މެޗުން 16 ޕޮއިންޓާއެކުއެވެ. ތާވަލުގެ އެއްވަނައިގައި އަށް މެޗުން 17 ޕޮއިންޓާއެކު އޮތީ ރެއާލް ސޮސިއެޑާޑެވެ. އަދި ރެއާލާ ދެކޮޅަށް ނުކުންނަ ވެލެންސިއާ އޮތީ ތާވަލުގެ 13 ވަނައިގައި އަށް މެޗުން އަށް ޕޮއިންޓާއެކުއެވެ.