އެމެރިކާއިން ޕެރިސް މުއާހަދާއާ ވަކިވެއްޖެ
މި މުއާހަދާގައި 196 ގައުމަކުން ވަނީ ސޮއިކޮށްފަ
ގްރީން ހައުސް ގޭސް ޖައްވަށް ދޫކުރާ ގައުމުތަކުގެ ލިސްޓުގެ ދެވަނައިގައި ވަނީ އެމެރިކާ
އެމެރިކާއިން ދުނިޔޭގެ މޫސުމަށް އަންނަ ބަދަލުތަކާ ބެހޭ ޕެރިސް މުއާހަދާއާ ވަކިވެއްޖެއެވެ.
މި މުއާހަދާ އަކީ މޫސުމަށް އަންނަ ބަދަލުތަކާއި، ޖައްވަށް ދޫކުރާ ގްރީން ހައުސް ގޭސްގެ މިންވަރު މަދުކުރުމަށް އެކިއެކި ގައުމުތަކުގެ މެދުގައި ވެވިފައިވާ އެއްބަސްވުމެކެވެ. އެގޮތުން މި މުއާހަދާގައި މިހާތަނަށް 196 ގައުމަކުން ވަނީ ސޮއި ކޮށްފައެވެ.
އެ ގައުމުގެ ރައީސް ޑޮނަލްޑް ޓްރަމްޕް ވަނީ މިީގެ ކުރިން ވެސް މި މުއާހަދާއިން ވަކިވާނެ ކަމަށް ވިދާޅުވެފައެވެ. އެގޮތުން އެ ގައުމުން މި މުއާހަދާއިން ވަކިވާން ނިންމާފައިވާ ކަމަށް ނޯޓިސް ފޮނުވާފައި ވަނީ 2019 ވަނަ އަހަރުގެ ނޮވެމްބަރު މަހުގައެވެ.
އެމެރިކާގެ ރައީސް ޑޮނަލްޑް ޓްރަމްޕާ ހިލާފަށް މިހާރު އެ ގައުމުގެ ރިޔާސީ ރޭހުގައި ވާދަ ކުރައްވަމުން ގެންދަވާ ޖޯ ބައިޑެން ވިދާޅުވެފައި ވަނީ އެމެރިކާގެ ރައީސް ކަމަށް އޭނާ ހޮއްވަވައިފި ނަމަ އެ ގައުމު އަލުން އެ މުއާހަދާ އާ ގުޅެން ނިންމާފައިވާ ކަމަށެވެ.
އިންޓަރނޭޝަނަލް އެނަރޖީ އޭޖެންސީއިން ހާމަކޮށްފައިވާ ތަފާސްހިސާބުތަކަށް ބަލާއިރު ގްރީން ހައުސް ގޭސް ޖައްވަށް ދޫކުރާ ގައުމުތަކުގެ ލިސްޓުގެ ދެވަނައިގައި އެމެރިކާ އޮތް އިރު މި ލިސްޓުގެ އެންމެ ކުރީގައި ވަނީ ޗައިނާއެވެ. ނަމަވެސް ޗައިނާއިން ވަނީ 2060 ވަނަ އަހަރުގެ ކުރިން އެ ގައުމަކީ ކާބަން ނިއުޓްރަލް ގައުމަކަށް ހަދަން ހަމަޖެހިފައިވާ ކަމަށް ބުނެފައެވެ.
