ސީޕީގެ ޔަޤީންކަން: ސަރުކާރު ވައްޓާލަން ފުލުހުން ދެނެއް ނުނިކުންްނާނެ!

އެއްވެސް ސަރުކާރެއް ވައްޓާލަން ދެނެއް ފުލުހުންނެއް ނުނިކުންނާނެ ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެއެވެ.

ބުރާސްފަތި ދުވަހު ރާއްޖެޓީވީގެ "ފަށާއިރު" ޕްރޮގްރާމްގައި ބައިވެރިވެވަޑައިގެން ދެއްވި ޚާއްސަ އިންޓަރވިއުއެއްގައި ސީޕީ ހަމީދު އެއީ މާޒީ ކަމަށާއި، އެ މާޒީން ފުލުހުންނަށް ވަރަށް ގިނަ އިބުރަތްތަކެއް ލިބިގެން ގޮސްފައިވާ ކަމަށެވެ. އަދި ފުލުހުންގެ މުއައްސަސާގައި މިއަދު ތިބި ފަރާތްތަކާއި، ކުރިއަށް އޮތް ތަނުގައި ފުލުހުންގެ މުއައްސަސާއަށް ގުޅެން ތިބި ފަރާތްތައްވެސް އެފަދަ ކަމެއް ނުކުރައްވާނެ ކަމުގެ ޔަޤީންކަން ދެއްވަމުން ސީޕީ އިތުރަށް ވިދާޅުވީ، މިހާރު މުއައްސަސާ ހަރުދަނާ ކުރުމަށް އަޅަމުންދާ ފިޔަވަޅުތަކުގެ ތެރެއިންވެސް އެކަންކަން ކަށަވަރު ކުރެވިގެންދާނެ ކަމަށެވެ.

އޭގެ އިތުރުން، ސީޕީ ކަމުގެ މަޤާމުން އެނބުރި ވަޑައިގަންނަވާނީ އެ ޕްރޮފެޝަނަލިޒަމް ފުލުހުންގެ ތެރޭގައި ޤާއިމުކޮށްފައި ކަމަށް ވެސް ސީޕީ ވިދާޅުވިއެވެ.

2012 ވަނަ އަހަރުގެ ފެބްރުއަރީ 7 ގައި ފުލުހުންނާއި ސިފައިން ސަރުކާރާ ދެކޮޅުވެ، ވެރިކަން ވައްޓާލުމަށް ނުކުތުމާ ގުޅިގެން އޭރު ފުލުހުންނަށް ގިނަ ފާޑުކިއުންތަކެއް އަމާޒުވެގެން ދިޔައެވެ. އެގޮތުން ހަތެއް ފެބްރުއަރީގައި ގިނަ އަދަދެއްގެ ސިފައިންނާއި ފުލުހުން ރައީސް ނަޝީދާ ދެކޮޅަށް ނިކުތެވެ.

ޑރ. މުހައްމަދު ވަހީދުގެ ވެރިކަމުގައި ވެރިކަން ވައް މައްސަލަ ބެލުމަށް ރިޔާސީ ކޮމިޝަނެއް އުފެއްދިއެވެ. ބޭރުގެ ފަރާތްތަކުން އިސްކޮށް ތިބި ކޮމިޝަނުން އެ މައްސަލަ ތަހުޤީޤު ކުރުމަށްފަހު އޭރު ނިންމީ، ވެރިކަން ނިމުމަކަށް އައީ ބަޤާވާތަކުން ނޫން ކަމަށާއި، އެއްވެސް މަޖުބޫރުކަމެއް އޮވެގެން ނޫން ކަމަށެވެ.

އެހެން ނަމަވެސް، މިހާރު މަޖިލީހުގައި ކުރިއަށްދާ އިންތިގާލީ އިންސާބުގެ ބިލް ޤާނޫނަކަށްވުމުން، 7 ފެބްރުއަރީގައި 2012 ގައި ސަރުކާރު ވެއްޓުނު ގޮތް ތަހުގީގު ކުރެވޭނެ ކަމަށް ދެކިވަޑައިގަންނަވާ ކަމަށް ރައްޔިތުންގެ މަޖިލިސް ރައީސް ވެސް ވަނީ ވިދާޅުވެފައެވެ.