މާލޭގައި ހުރި އަތޮޅު ފިހާރަތަކާއި ގުޅިގެން ރައްޔިތުންގެ މަޖިލީހަށް ހުށަހަޅާފައިވާ މައްސަލަތައް ހައްލުކުރުމަށް މިހާރު ޕްލޭނިންގ މިނިސްޓްރީއާއި އެކު މަސައްކަތްތަކެއް ކުރަމުންދާ ކަމަށް މިނިސްޓްރީ އޮފް ފިނޭންސްއިން ބުނެފި އެވެ.
މިމައްސަލައިގެ ކަންތައް ކުރިއަށްދާ ގޮތް ސާފުކުރުމަށް ބުދަ ދުވަހު ބޭއްވި ގައުމީ ތަރައްޤީ އާއި ތަރިކައިގެ ކޮމިޓީގައި ވާހަކަދައްކަވަމުން ފިނޭންސް މިނިސްޓްރީގެ ސީނިއަރ ލީގަލް ކައުންސިލް އަޝްރަފް ރަޝީދު ވިދާޅުވީ މި މައްސަލައަށް ހައްލެއް ހޯދުމަށް މިިހާރު މަޝްވަރާތަކެއް ކުރަމުންދާ ކަމަށާއި އަދި ޕްލޭންތަކެއް ކުރަމުންދާ ކަމަށެވެ.
ގައުމީ ތަރައްޤީ އާއި ތަރިކައިގެ ކޮމިޓީގައި ހިމެނިވަޑައިގަންނަވާ ހޯރަފުށީ ދާއިރާގެ މެމްބަރު އަހްމަދު ސަލީމް ވަނީ މި ފިހާރަތަކުގެ މިލްކުވެރިކަން ކައުންސިލްތަކަށް ލިބޭނެތޯއާއި މިހާރު އެތަންތަނުން ލިބޭ ކުލީގެ 40 އިންސައްތައިގެ ބަދަލުގައި 100 އިންސައްތަ ކަައުންސިލްތަކަށް ނުލިބެނީ ކީއްވެގެންތޯއާއި އަދި އެތަންތަން ތަރައްޤީ ކުރަން ކައުންސިލްތަކަށް ލިބޭތޯ ފިނޭންސްއާއި ސުވާލުކުރައްވާފަ އެވެ.
މިސުވާލުތަކަށް ޖަވާބުދެއްވަމުން އަޝްރަފް ރަޝީދު ވިދާޅުވީ މިފިހާރަތަށް ހިންގުން 2005 ވަނަ އަހަރުން ފެށިގެން ހަވާލުކޮށްފައިވަނީ ފިނޭންސް މިނިސްޓްރީއާއި ކަމަށާއި އެހެންނަމަވެސް މިހާރު ކުރަމުންދާ މަސައްކަތުގެ ދަށުން ފިހާރަތައް ކައުންސިލްތަަކަށް ރަޖިސްޓްރީ ކުރެވިގެންދާނެ ކަމަށެވެ. އަދި އެތަންތަނަށް ލިބޭ އާމްދަނީން 40 އިންސައްތަ ކައުންސިލްތަކަށް ދޭއިރު 100 އިންސައްތަ އަށް ބަދަލު ކުރުމާއި މެދު މަޝްވަރާތަކެއް ކުރެވޭ ކަމަށެެވެ.
އަތޮޅު ފިހާރަތަކުން އަތޮޅު ކައުންސިލްތަކަށް ލިބެންޖެހޭ ފައިސާ ހަވާލު ނުކުރާތާ 4 އަހަރުވުމަށް ފަހު، ފައިސާ ޖަމާކޮށްދޭން ފަށާފައިވަނީ މެއި 2019 ގައެވެ.
އަތޮޅު ކައުންސިލްތަަކަށް ފައިސާ ލިބޭނެ ގޮތް ވަރަށް މަދުކަމަށާއި، ކައުންސިލްތަކަށް އަތޮޅު ފިހާރަތަކަކީ އޭގެ ތެރެއިން މުހިއްމު ވަސީލަތެއް ކަމަށް މެމްބަރުން ވަނީ ފާހަގަކުރައްވާފަ އެވެ.
އަތޮޅު ފިހާރަތަކަކީ އަތޮޅުތަކުގެ ރައްޔިތުން ވަރަށް ބޮޑެތި ގުރުބާނީތަކެއް ވެގެން ގާއިިމް ކޮށްފައިވާ ތަންތަން. އެމަސައްކަތް ކުރި އަތޮޅުތަކަށް މި ފިހާރަތަކުގެ ރަޖިސްޓްރީއެއްވެސް ނެތޭ، ކުލިން ލިބޭ އެއްޗެއްވެސް އެމީހުންނަށް ދިނުމުގައި އެފަރާތުގެ ބަހެއް ނެތް. ބައެއް އަތޮޅުތަކަށް އެއްޗެއް ލިބޭއިރު އަނެއް ބައި އަތޮޅުތަކަށް އެއްވެސް އެއްޗެއް ނުލިބޭ. މިހަކަލަ ގޮތަކަށް މިދަނީ. އުސޫލުތަކަށް ކަނޑައަޅާނެ ވާހަކަ ދެންނެވުމުން ކޮމިޓީއިން ރިކޮމޮޑޭޝަންތަކެއް މިކަމަށް ހުށަހަޅާނަން. އެހެންކަމުން މަޝްވަރާކުރާއިރު އެކަމަށް ބެލުމަށް އެދިވަޑައިގަންނަވަން~ ހޯރަފުށީ ދާއިރާގެ މެމްބަރު އަހްމަދު ސަލީމް
މިކަމާއި ގުޅިގެން ތުލުދުސްދޫ ދާއިރާގެ މެމްބަރު އިބްރާހިމް ނަސީމް ވަނީ މިހާރު ކޮންމެ އަތޮޅަކަށް ފިހާރައެއް ހުރިތޯއާއި އަދި މިތަންތަނުން ލިބޭ ޖުމްލަ އާމްދަނީގެ ތަފްސީލް ހޯދުމަށް އެދިވަޑައިގެންފައެވެ.
އެކަމާއި ގުޅިގެން އަޝްރަފް ވިދާޅުވީ އެ ތަފްސީލް ލިޔުމުން ކޮމިޓީއަށް ހުށަހަޅާނެ ކަމަށެވެ.
އަތޮޅު ފިހާރަތަކަކީ އަތޮޅުގެ ބައިވެރިވުމާއެކު މާލޭގެ އުތުރު ފަރާތުގައި ގާއިމް ކޮށްފައިވާ ފިހާރަތަކެކެއެވެ.
އެކި އަގުގައި ކުއްޔަށްދީފައިވާ ފިހާރަތަކުން ކޮންމެ އަތޮޅެއްގެ ކައުންސިލަކަށް ވެސް ލިބެނީ އެ ފިހާރައެއް ކުއްޔަށްދީފައިވާ އަގުގެ 40 އިންސައްތައެވެ.
އަތޮޅު ފިހާރަތައް ތަރައްގީ ކުރުމުގެ ޕްލޭނެއް އެބައޮތް ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ވިދާޅުވެފަ އެވެ.
ރައީސް ވިދާޅުވެފައިވަނީ އަތޮޅު ފިހާރަތައް ތަރައްގީ ކުރުގެ ޕްލޭނެއް އެބައޮތް ކަމަށާއި، ނަމަވެސް ފުރަތަަމަ ކަމަކަށް އޮތީ މާލޭ ޕޯޓް ގުޅީ ފަޅަށް ބަދަލު ކުރުން ކަމަށާއި އެމަނިކުފާނުގެ ފަސް އަހަރުގެ ދައުރު ނިމޭއިރު އެ ސަރަހައްދަށް ބޮޑެތި ބަދަލުތަކެއް އަންނާނެ ކަމަށެވެ.
