ލުތުފަރުގެ މަރުގެ މައްސަލަ: ދައުވާ ލިބޭ މީހުންނަށް ޖަވާބުދާރީވުމަށް ފުރުސަތު ދިނުމަށް މިއަދުގެ އަޑުއެހުން ކެންސަލް ކޮށްފި

ށ. ޅައިމަގު "ކުރިމަގު 1'' ބޯޓުން ގެއްލުނު ލުތުފަރު މަރާލި މައްސަލައިގެ އަޑުއެހުމެއް ކްރިމިނަލް ކޯޓުގައި ބުދަ ދުވަހަށް ތާވަލް ކުރުމަށްފަހު ކެންސަލް ކޮށްފި އެވެ.

މިމައްސަލައިގެ ބުދަ ދުވަހުގެ އަޑުއެހުން ކެންސަލް ކޮށްފައިވަނީ، ދައުވާ ރައްދުވާ މީހުންނަށް ލިބެންޖެހޭ ލިޔެކިޔުންތައް ހަމައަށް ލިބުމުގައި ދިމާވި މައްސަލައަކާ ގުޅިގެންނެވެ. އެ ލިޔެކިޔުންތައް ލިބުނީ ވަރަށް ފަހުން ކަމަށްވާތީ، ދިފާއީ ވަކީލުންގެ އެދިލެއްވުމުގެ މަތިން، އެލިޔެކިޔުންތައް ދިރާސާ ކުރުމަށްފަހު، ޖަވާބުދާރީވުމަށް ފުރުސަތު ދިނުމުގެ ގޮތުން ބުދަ ދުވަހުގެ އަޑުއެހުން ކެންސަލް ކުރީ ކަމަށް ކްރިމިނަލް ކޯޓުން މައުލޫމާތު ދެއެވެ. އަދި ދެން ބޭއްވީ އަޑުއެހުމުގައި އޮންނާނީ ދައުވާ ރައްދުވާ މީހުން ދައުވާއަށް ޖަވާބުދާރީވުމެވެ. އެއަޑުއެހުން ބޭއްވޭނެ ވަކި ދުވަހެއް ކްރިމިނަލް ކޯޓުން ހާމައެއް ނުކުރެއެވެ.

މި މައްސަލާގައި މިދިއަ އޮކްޓޯބަރު މަހުގެ 25 ވަނަ ދުވަހު ބޭއްވި އިބްތިދާއީ އަޑުއެހުމުގައި ވަނީ ދައުލަތުން ދައުވާކުރާ ތިން ބިދޭސީންގެ މައްޗަށް ކުށް ސާބިތު ކުރުމަށް ހެކި ހުށަހަޅާފައެވެ.

ލުތުފަރު މަރާލި މައްސަލާގައި ދައުލަތުން ދައުވާ ކޮށްފައިވަނީ، ބަންގްލަދޭޝް ތިން މީހެއްގެ މައްޗަށެވެ. އެއީ އަލަމިން އާއި ނޫރުލްއިސްލާމް އަދި އެމްޑީ އަކޮތޮރު ހޮސައިންގެ މައްޗަށެވެ.

އޮކްޓޯބަރު 25 ވަނަ ދުވަހު ބޭއްވި އަޑުއެހުމުގައި ވަނީ، ލުތުފަރު މަރާލި މައްސަލާގައި، އަލުން ދައުވާ އިއްވުމުގެ ފުރުސަތު ދެއްވާފައެވެ. އަދި ދައުވާ އިއްވުމުން، ދައުވާ ރައްދުވާ މީހުން ވަނީ އެދައުވާއަށް އިންކާރުކޮށްފައެވެ.

އެހެންކަމުން ޝަރީއަތުން ވަނީ، ދައުވާ ސާބިތު ކުރުމަށް ދައުލަތަށް ހެކި ހުށަހެޅުމުގެ ފުރުސަތު ދެއްވާފައެވެ.

އެ މީހުންގެ މައްޗަށް އިއްވި ދައުވާގައި ބުނެފައި ވަނީ، އަލަމިން އިތުރު ދެމީހަކާއެކު 21 އޭޕްރީލް 2019 ވަނަ ދުވަހު 21:30 އެހާކަންހާއިރު، އެމީހުން މަސައްކަތްކުރާ ށ. ޅައިމަގު "ކުރިމަގު 1" ބޯޓުގައި ކައްކާއެއްގެ ގޮތުގައި މަސައްކަތްކުރާ ބަންގްލަދޭޝްގެ ރައްޔިތެއް ކަމުގައިވާ ލުތުފަރު ރަހްމާނާއި އަލަމިންއާ ދެމެދ ހިނގި ހަމަނުޖެހުމެއްގައި، ލުތުފަރު އެ ބޯޓުގެ ދިރުނބާކޮޅަށް ވައްޓާލައި، އަލަމިން އާއި އަހޮތޮރު، ލުުތުފަރުގެ ކަރާއި އަނގަޔާއި ނޭފަތުގައި ހިފަހައްޓައި ނޫރުލްއިސްލާމް، ލުތުފަރުގެ ގައިގާ ހިފަހައްޓައި، ލުތުރުފަރު މަރުވުމުން، ށ. ލައިމަގު ބަނދަރާ ދިމާލު ބޭރުން ގާތްގަނޑަކަށް 200 ވަރަކަށް ފޫޓު ދުރު ހިސާބަށް ލުތުފަރުގެ ހަށިގަނޑު ކަނޑުފައްތާފައިވާ ކަމަށް އިއުތިރާފް ވެފައިވާތީ، ކަމަށް ދައުވާގައި ބުނެފައި ވެއެވެ.

ލުތުފަރު މަރާލިކަމަށް އެ ތިން މީހުން އިއުތިރާފްވެފައިވަނީ، މި މައްސަލާގައި ފުލުހުން ހިންގި ތަހުގީގުގައެވެ.

އެ ތިން މީހުންގެ މައްޗަށް ވެސް އުފުލާފައި ވަނީ، އެނގިހުރެ މީހަކު މެރުމުގެ ކުށުގެ ދައުވާއެވެ. ދައުވާ އިއްވުމުން، އަލަމިން އާއި ނޫރުލްއިސްލާމް، އެ ދައުވާއަށް އިންކާރު ކުރާކަމަށް ދެ މީހުންގެ ގާނޫނީ ވަކީލުން ވިދާޅުވިއެވެ.

އަހޮތޮރުގެ ގާނޫނީ ވަކީލެއް އައްޔަން ކުރެވިފައިނުވާތީ، އޭނާއަށް ވަނީ ގާނޫނީ ވަކީލެއް އައްޔަން ކުރުމަށް ފުރުސަތު ދެއްވާފައެވެ.

ލުތުފަރު މަރާލި މައްސަލަ، އެ ތިން މީހުންގެ މައްޗަށް ސާބިތު ކުރުމަށް، ގިނަ ސަފަވީ ހެކިތަކާއި ކިތާބީ ހެކިތަކެއް ދައުލަތުގެ ފަރާތުން ވަނީ ހުށަހަޅާފައެވެ.