ދޫނިދޫ ޖަލުގައި ފޯރުކޮށްދޭ ފެނުގެ މައްސަލަ އާއި ގުޅިގެން އެޗްއާރުސީއެމުން ބަޔާން ނެރުނީ ކަމުގެ ހަގީގަތް އޮޅޭގޮތަށް: ފުލުހުން
3 ނޮވެމްބަރު 2020 | އަންގާރަ 08:36އެކަމަށް ދާއިމީ ހައްލެއް ހޯދުމަށް ކުރަންޖެހޭ މަސައްކަތްތައް ފުލުހުން ގެންދަނީ ކުރަމުން ކަމަށް ފުލުހުން ބުނޭ
ދޫނިދޫ
ދޫނިދޫ ޖަލުގައި ފޯރުކޮށްދޭ ފެނުގެ މައްސަލާގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބަޔާން ނެރިފައިވަނީ ކަމުގެ ހަގީގަތް ރައްޔިތުންނަށް އޮޅޭ ގޮތަށް ކަމަށް ފުލުހުން ބުނެފި އެވެ.
އެކަން ބަޔާންކޮށް ފުލުހުން ނެރެފައިވާ ބަޔާނެއްގައި ބުނެފައިވަނީ ދޫނިދޫގައި ސާފުފެން ލިއްބައިދިނުމަށްޓަކައި އެރަށުގައި ފެން ޕްލާންޓެއް ބަހައްޓައިގެން ދަނީ ފެން ފޯރުކޮށްދެވެމުން ކަމަށެވެ. މިގޮތުން ފޯރުކޮށްދެވޭ ފެނަކީ ދޫނިދޫގައި ބަންދުކުރެވޭ ގައިދީންނާއި އަދި އެތަނުގައި ޑިއުޓީ ކުރާ ފުލުހުންނާއި އެހެންވެސް ބޭނުންތަކުގައި ދޫނިދޫއަށް އައިސް ގޮސްވާ ހުރިހާ އެންމެންވެސް ބޭނުންކުރާ ފެން ކަމަށް ފުލުހުން ބުނެއެވެ.
އެޗް.އާރް.ސީ.އެމްގެ ފަރާތުން ދޫނިދޫއަށް ކުރި ޒިޔާރަތުގައި ފެން ޓެސްޓްކުރިއިރު ބައެއް ގޮޅިތަކުން ނެގުނު ފެނުގައި ކޮލިފޯމް ހުރިކަމަށް ފާހަގަކޮށް، 72 ގަޑިއިރުގެ މުހުލަތެއް ދީ 27 އޮކްޓޫބަރ ގައި ފުލުހުންނަށް ސިޓީއަކުން އެޗްއާރުސީއެމުން އެންގިކަމަށް ބަޔާނުގައި ބުނެފައިވެ އެވެ. އެ އެންގުމުން އެކަމަށް ދާއިމީ ހައްލެއް ހޯދުމަށް ކުރަންޖެހޭ މަސައްކަތްތައް ފުލުހުން ގެންދަނީ ކުރަމުން ކަމަށް ބަޔާނުގައި ބުނެފައިވެ އެވެ.
އެތަނުގެ ބައެއް ފެންހޮޅިތައް ބަދަލުކުރުމާއި ފެން ސާފުކުރުމަށް ބޭނުންކުރާ ކްލޮރިނޭޝަން ސިސްޓަމާއި އަލްޓްރާ ވައިލެޓްފިލްޓްރޭޝަން ސިސްޓަމް ޤާއިމުކުރުމުގެ މަސައްކަތް އިސްކަމެއް ދީގެން ކުރިއަށް ގެންދާކަމަށްވެސް ފުލުހުން ބުނެއެވެ. ނަމަވެސް ސަރުކާރު ބަންދު ދުވަސްތަކެއް އައުމާއި، އެއްވެސް އެސެޓެއް ގަތުމުގެ ކުރިން މިނިސްޓްރީ އޮފް ފިނޭންސަށް ލިޔެ ހުއްދަ ހޯދަންޖެހޭތީ އެކަމަށްކުރަންޖެހޭ މަސައްކަތްތައް ރޭވެމުން ދަނިކޮށް، ފުލުހުން މިކަން ރަނގަޅުކުރުމަށް ފިޔަވަޅު އަޅާފައިނުވާކަމަށް ބަޔާންކޮށް އެޗް.އާރް.ރ.ސީ.އެމް.އިން ނޫސްބަޔާނެއް ނެރެފައިވަނީ ކަމުގެ ހަގީގަތް ރައްޔިތުންނަށް އޮޅޭގޮތަށް ފުލުހުން ދެކޭކަމަށް މިކަމާއި ގުޅިގެން ފުލުހުން ނެރެފައިވާ ބަޔާނުގައި ބުނެފައިވެ އެވެ. އަދި ދޫނިދޫގައި ތިބޭ ގައިދީން ފެން ބުއިމަށްޓަކައި ފުޅީގައި ބަންދުކޮށްފައި ހުންނަ ފެން ލިބޭނެ އިންތިޒާމު މިހާރު ވަގުތީގޮތުން ހަމަޖައްސާފައިވާކަމަށް ފުލުހުން ބުނެއެވެ.
ދޫނިދޫ ޖަލުގައި ފެން ފޯރުކޮށްދިނުމާއި ގުޅޭގޮތުން އެޗްއާރްސީއެމުން ނެރުނު ބަޔާނެއްގައި ބުނެފައިވަނީ ދޫނިދޫ ޖަލުގައި ބޯން އެކަށީގެން ނުވާ ފެން ފޯރުކޮށްދޭ މައްސަލަ ހައްލު ކުރަން ފުލުހުންނަށް ދިން މުއްދަތުގައި އެކަން ކޮށްފައި ނުވާތީ ފިޔަވަޅު އަޅާނެ ކަމަށެވެ.
