އެޗްޕީއޭގެ ގައިޑްލައިނާ ހިލާފަށް މުޒާހަރާކުރި 5 މީހަކު ހައްޔަރުކޮށްފި

ހެލްތު ޕްރޮޓެކްޝަން އެޖެންސީގެ ގައިޑްލައިނާ ހިލާފަށް، މުޒާހަރާ ކުރި 5 މީހަކު ފުލުހުން ހައްޔަރު ކޮށްފިއެވެ.

ފުލުހުން ބުނީ އެޗްޕީއޭގެ ގައިޑްލައިނާ ހިލާފަށް އެއްވުމަށް ކުރިއަށް ގެންދިޔަ ބަޔަކަށް ފުލުހުން ނަސޭހަތްތެރި ވުމުން ވެސް އެއްވުން ކުރިއަށް ގެންގޮސްފައިވާ ކަމަށެވެ. އެހެން ކަމުން ފުލުހުންގެ އަމުރަށް ނުކިޔަމަންތެރި ވެފައިވާ މައްސަލަ އާއި ގުޅިގެން 5 މީހަކު ފުލުހުންގެ ހައްޔަރަށް ގެންދެވިފައިވާ ކަމަށް ފުލުހުން ބުންޏެވެ. އޭގެ ތެރޭގައި ހިމެނެނީ 2 ދިވެހި ފިރިހެނުންނާއި، 3 ދިވެހި އަންހެނުންނެވެ.

މި މީހުން އެއްވުން ކުރިއަށް ގެންދިއުމަށް މަސައްކަތް ކޮށްފައި ވަނީ މަޖީދީ މަގު އޮލިމްޕަސް ސަރަހައްދުގައެވެ. އެއްވުން ކުރިއަށް ގެންދާ ސަބަބެއް ކަމަށް އެ މީހުން ބުނެފައި ވަނީ ރޭޕާއި، ގެވެށި އަނިޔާ އާއި ދެކޮޅަށް އަޑުއުފުލުމާއި، ކޮވިޑް-19 ގެ ހާލަތުގައި ސަރުކާރުން އަމަލު ކުރަމުން ގެންދާ ގޮތާއި މެދު ހިތްހަމަނުޖެހުން ކަމަށެވެ. އެޗްޕީއޭގެ ގައިޑްލައިން ބުނާގޮތުން، ގިނަ މީހުން އެއްވާ ގޮތަށް އެއްވުންތައް ކުރިއަށް ގެންދިއުމަކީ މަނާކަމެކެވެ.

މީގެ ކުރިން ވެސް ކޮވިޑަށް ދިން ލުއިތަކާ އެކު މުޒާހަރާތަކެއް ކުރިއަށް ގެންދިޔައެވެ. އެ މުޒާހަރާތަށް ކުރިއަށް ގެންދިޔަތާ ގިނަ ދުވަސްތަކެއް ނުވެ، ކޮވިޑް-19 ކޭސްތަކުގެ އަދަދު ވަރަށް ބޮޑަށް އިތުރުވެ، އިތުރު ފިޔަވަޅުތަކެއް އަޅަން ޖެހުނެވެ.