އެމްއެމްޕީއާރްސީ ޙިޔާނާތާއި ގުޅިގެން އެސެޓް ރިކަވަރީ ކޮމިޝަނުން ނިހާނުއާ ސުވާލުކޮށްފި

ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެމްބަރު އަހުމަދު ނިހާނު ހުސައިން މަނިކު އެސެޓް ރިކަވަރީ ކޮމިޝަނަށް ހާޒިރު ކޮށްފިއެވެ.

އިތުބާރު ހުރި މަސްދަރަކުން "ރާއްޖެއެމްވީ" އަށް މައުލޫމާތު ދެއްވަމުން ވިދާޅުވީ، ނިހާން ހާޒިރު ކޮށްފައި ވަނީ ބުރާސްފަތި ދުވަހު ކަމަށާއި، އޭނާއާ ސުވާލު ކޮށްފައި ވަނީ މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ބޮޑު ޙިޔާނާތާ ގުޅިގެން ކަމަށެވެ. އޭގެ އިތުރުން، ނިހާނުގެ ފްލެޓާ ގުޅޭ ގޮތުން ވެސް ކޮމިޝަނުން ސުވާލު ކޮށްފައި ވެއެވެ.

މައުލޫމާތު ލިބިފައިވާ ގޮތުގައި ނިހާން ވަނީ ތަހުޤީޤުގައި ވަކީލެއްގެ ފުރުސަތަކަށް އެދިވަޑައިގަންނަވާފައެވެ. އަދި އެ ފުރުސަތު ދިނުމަށް ފަހު ތަހުޤީޤު އެހެން ދުވަހަކަށް ފަސްކޮށްފައިވާ ކަމަށް ބައެއް ނޫސްތަކުން ރިޕޯޓް ކޮށްފައި ވެއެވެ. އެހެން ނަމަވެސް އެކަމާ ގުޅޭގޮތުން މައުލޫމާތު ސާފު ކޮށްލުމަށް "ރާއްޖެއެމްވީ" އިން ނިހާނަށް ގުޅާލުމުން އެކަމަށް ސީދާ ޖަވާބެއް ދެއްވާފައެއް ނުވެއެވެ.

މީގެ ކުރިން ހާމަކޮށްފައިވާ މައުލޫމާތުތަކަށް ބަލާއިރު 18 ވަނަ ރައްޔިތުންގެ މަޖިލީހުގެ 44 މެމްބަރުންނަށް ޙިޔާނާތުގެ ފައިސާ ލިބިފައިވާ ކަން ވަނީ ތަޙުޤީޤުތަކުން ހާމަވެފައެވެ. އަދި މި މައްސަލައިގައި ނިހާންއާ ސުވާލު ކޮށްފައިވާ އިރު، ނިހާން ހުޅުމާލެއިން ބައްލަވައިގެންފައިވާ އެޕާޓްމެންޓެއްގެ މައްސަލަ އޭސީސީއަށް ހުށައެޅިފައި ވެއެވެ.

އެހެން ނަމަވެސް، ނިހާންގެ ދަރިފުޅަށް 4.7 މިލިއަން ރުފިޔާގެ ފްލެޓެއް ބައްލަވައިގަތީ ޙަލާލު ގޮތުގައި ހޯދި މުސާރައިން ކަމަށް އޭނާ ވަނީ ވިދާޅުވެފައެވެ. އަދި ނުޙައްޤުން މުއްސަނދި ކަން ހޯދާފައިވާ ކަމުގެ ބޮޑެތި ތުހުމަތުތަކެއް ވެސް ނިހާނުގެ މައްޗަށް ކުރެވިފައި ވެއެވެ.