އެމްބާޕޭ ހޯދުމަށް ރެއާލުން އަނެއްކާވެސް މަސައްކަތް ކުރަނީ

ޕީއެސްޖީއަށް ކުޅެމުން އަންނަ ފްރާންސްގެ ތަރި ކީލިއަން އެމްބާޕޭ ހޯދުމަށް ރެއާލް މެޑްރިޑުން އަނެއްކާވެސް މަސައްކަތް ފަށާފައިވާ ކަމަށް ރިޕޯޓުތައް ބުނެފިއެވެ.

މީގެ ކުރިން ރެއާލުން ވަނީ ދެ ފަހަރެއްގެ މަތިން އެމްބާޕޭ ހޯދުމަށް މަސައްކަތް ކޮށްފައެވެ. އެގޮތުން އެމްބާޕޭގެ އުމުރުން 14 އަހަރުގައި އޭނާ ހޯދުމަށް ރެއާލުން ފުރަތަމަ މަސައްކަތް ކުރިއިރު، ދެވަނަ ފަހަރަށް މަސައްކަތް ކުރީ އެމްބާޕޭ މޮނާކޯއަށް ކުޅުނު ދުވަސްވަރުއެވެ. އެކަމަކު 2017 ވަަނަ އަހަރު މޮނާކޯ ދޫކޮށް 145 މިލިޔަން ޔޫރޯއަށް އެމްބާޕޭ ބަދަލުވީ ޕީއެސްޖީއަށެވެ. އެއީ ދުނިޔޭގެ ދެވަނައަށް އެންމެ އަގުބޮޑު ޓްރާންސްފާއެވެ.

ދާދި ފަހުން ރެއާލުގެ ރައީސް ފްލޮރެންޓީނޯ ޕެރޭޒް ވަނީ އަންނަ އަހަރުގެ ހޫނު މޫސުމުގައި އުމުރުން 21 އަހަރުގެ އެމްބާޕޭ ހޯދުމަށް ރެއާލުން އަލުން މަސައްކަތް ކުރާނެ ކަމުގެ އިޝާރާތެއް ދީފައެވެ. އެމްބާޕޭ ޕީއެސްޖީގެ އެއްބަސްވުމުގައި ހުރީ 2022 ވަނަ އަހަރުގެ ހޫނު މޫސުމުގެ ނިޔަލަށެވެ. ޕީއެސްޖީގެ އެއްބަސްވުން އާކުރަން އެމްބާޕޭ ބޭނުންނުވާތީ އަންނަ އަހަރުގެ ހޫނު މޫސުމުގައި ޕީއެސްޖީން އެމްބާޕޭ ވިއްކާލާނެ ކަމަށް ރިޕޯޓުތައް ބުނެއެވެ. ސަބަބަކީ އަންނަ އަހަރު ޕީއެސްޖީއަށް އެމްބާޕޭ ވިއްކާނުލެވިއްޖެ ނަމަ، 2022 ވަނަ އަހަރު އެމްބާޕޭއަށް ހިލޭ ޓްރާންސްފައެއްގެ ދަށުން ކުލަބު ބަދަލުކުރެވޭނެތީއެވެ.

ރެއާލުން އެމްބާޕޭ ގެންދިޔުމަށް މަސައްކަތް ކުރަމުން އަންނައިރު، ޕީއެސްޖީން އޭނާ ވިއްކާލުމަށް ބޭނުންވަނީ 200 މިލިޔަން ޔޫރޯއަށް ކަމަށް ފްރާންސްގެ މިޑިއާތަކުން ވަނީ ރިޕޯޓުކޮށްފައެވެ. އެކަމަކު ކޮވިޑް-19 ގެ މި ދަނޑިވަޅުގައި އެ އަދަދު ދައްކަން ރެއާލުން ބޭނުންނުވާ ކަމަށްވެސް ރިޕޯޓުތައް ބުނެއެވެ.

ރެއާލުގެ އިތުރުން ލިވަޕޫލާއި، ޔުވެންޓަސް އަދި ބާސެލޯނާއިންވެސް އަންނަނީ އެމްބާޕޭ ހޯދުމަށް މަސައްކަތް ކުރަމުންނެވެ.

ޒުވާން އުމުރުގައި ފްރާންސާއެކު ފީފާ ވޯލްޑް ކަޕް ކާމިޔާބުކޮށްފައިވާ އެމްބާޕޭ ވަނީ މިހާތަނަށް ޕީއެސްޖީއަށް ކުޅެދުން 128 މެޗުގައި 94 ލަނޑު ޖަހާފައެވެ. އަދި އޭނާ ވަނީ ޕީއެސްޖީއާއެކު ފްރެންޗް ލީގު ތިން ފަހަރު ކާމިޔާބުކޮށްފައެވެ.