އަނަސްގެ ހަށިގަނޑު ބެއްލެވި ޑޮކްޓަރު: ފުރާނައަށް އެންމެ ނުރައްކާވާ ގޮތަށް ހުރި ޒަޙަމްތަކަކީ ކަރާއި، މޭމަތީގައި ހުރި އަނިޔާގެ ޒަޙަމްތައް!

ރ. މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގައި ހިމެނޭ ސިއްރު ނޫން ހެކިވެރިއެއްގެ ހެކިބަސް ނަގައިފިއެވެ.

މި މައްސަލައިގައި ހޯމަ ދުވަހު ކްރިމިނަލް ކޯޓުގައި ކުރިއަށް ގެންދިޔަ އަޑުއެހުމަކީ ސިއްރު ނޫން ހެކިންގެ ހެކިބަސް ނެގުމަށް ބާއްވާފައިވާ އަޑުއެހުމެކެވެ. އެގޮތުން މި އަޑުއެހުމުގައި ވަނީ އަނަސް އޭޑީކޭއަށް ގެންދިޔައިރު ޑޮކްޓަރެއްގެ ހައިސިއްޔަތުން ހަށިގަނޑަށް އެޓެންޑްވި އަދި މި މައްސަލައިގެ އެކްސްޕާރޓް އޮޕީނިއަންއެއް ހޯދުމަށް ޑރ އިބްރާހިމް މޫމިންގެ ހެކިބަސް ނަގާފައެވެ.

މި އަޑުއެހުމުގައި ކުރި ސުވާލުތަކަށް ޖަވާބު ދެއްވަމުން ޑރ އިބްރާޙިމް ވިދާޅުވީ، ޙާދިސާ ހިނގިއިރު ވެސް އަދި މިހާރު ވެސް މަސައްކަތް ކުރައްވަމުން ގެންދަވަނީ އޭޑީކޭގައި އޮޕަރޭޝަންސް ޑޮކްޓަރެއްގެ ގޮތުގައި ކަމަށެވެ. އަދި އަނަސްގެ ހަށިގަނޑަށް އެޓެންޑް ވީއިރު، އީއާރް ޑޮކްޓަރުން ބަލި މީހާ ރަނގަޅު ކުރެވޭތޯ މަސައްކަތް ކުރަމުން ދިޔަ ކަމަށާއި، އޭރު އެއްވެސް ވިންދު އަދި ޙަރަކާތް ވެސް ނެތް ކަމަށެވެ. އަދި އޭރު ހަށިގަނޑުގެ އެކި ތަންތަނުގައި ބޮޑެތި ޒަޙަމްތައް ފެންނަން ހުރި ކަމަށާއި، މެޑިކޯ ލީގަލް ރިޕޯޓުގައި އެކަމުގެ ތަފްސީލުތައް ހިމަނާފައިވާނެކަން ޑޮކްޓަރު ފާހަގަ ކުރެއްވިއެވެ.

ޑޮކްޓަރު އިތުރަށް ވިދާޅުވީ، އެންމެ ފުރާނައަށް ނުރައްކާވާ ގޮތަށް ހުރި ޒަޙަމްތަކަކީ ކަރާއި، މޭމައްޗަށް ދީފައިވާ އަނިޔާގެ ޒަޙަމްތައް ކަމަށެވެ. އަދި އޭގެ އިތުރުން ވެސް 24 ވަރަކަށް ޒަޙަމް ފެންނަން ހުރި ކަމަށާއި، މި ޒަޙަމްތަކަކީ ވަގުތުން މީހާ މަރުވާ ޒާތުގެ ޒަޙަމްތަކެއްކަން ޑޮކްޓަރ ފާހަގަ ކުރެއްވިއެވެ.

ދައުލަތުން ކުރި ސުވާލުތަކާ ގުޅިގެން ހެކިބަސް ދެއްވަމުން ޑޮކްޓަރ އިތުރަށް ވިދާޅުވީ، އަނަސް މަރުވެފައިވަނީ ލިބުނު އަނިޔާތަކުގެ ސަބަބުން ހަށިގަނޑުން ލޭމަދުވެ. އެކަމުގެ ނަތީޖާއެއްގެ ގޮތުން ކަމަށް ޑޮކްޓަރ ވިދާޅުވިއެވެ.

މި މައްސަލައިގައި ދިފާއުން ކުރި ސުވާލުތަކަށް ޖަވާބު ދެއްވަމުން ޑޮކްޓަރ ވިދާޅުވީ، އަނަސްގެ ހަށިގަނޑު ހޮސްޕިޓަލަށް ގެނައި އިރުވެސް އޭނާ އޮތީ މަރުވެފައި ކަމަށާއި، ގެނައި އިރުވެސް ހަށިގަނޑުގެ އެއްވެސް ހަރަކާތެއް ނެތް ކަމަށެވެ. އަދި ބައެއް ޒަޙަމްތަކަށް ބަލާއިރު ފުއްޕާމެއަށް ވެސް ޒަޙަމްގެ އަސަރުތައް ކޮށްފައިވާ ކަމަށް ވިދާޅުވިއެވެ.

ޑޮކްޓަރ އިތުރަށް ވިދާޅުވީ، ލިބިފައިވާ ތަޖުރިބާގެ އަލީގައި ވިދާޅުވާނަމަ، އަނަސް މަރުވި ކަމަށް ބެލެވެނީ ލިބިފައިވާ ޒަޙަމްތަކާއި އަނިޔާގެ ސަބަބުން ކަމަށެވެ.

މި މައްސަލައިގައި ދެފަރާތުން ފާހަގަ ކުރެއްވި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވިދާޅުވީ، މި މައްސަލައިގައި ވަރަށް އަވަސް މުއްދަތެއްގެ ތެރޭގައި އިތުރު އަޑުއެހުމެއް ތާވަލު ކުރާނެ ކަމަށެވެ. އެގޮތުން އަންނަ ނޮވެމްބަރު މަހުގެ 5 ވަނަ ދުވަހު އަޑުއެހުމެއް ބޭއްވިދާނެކަން ގާޒީ ފާހަގަ ކުރެއްވިއެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ ނިމިދިޔަ ފެބްރުއަރީ މަހުގެ 13 ވަނަ ދުވަހުއެވެ. ނަމަވެސް އެދުވަހު ހެކިބަސް ނެގުމަށް ބޭއްވި އަޑުއެހުން ފަސް ކޮށްފައިވަނީ އަނަސްގެ މަރުގެ މައްސަލައިގައި ދައުވާ ލިބޭ ފަރާތަކަށް ލިޔެކިއުން ލިބިފައިނުވާތީއެވެ.

މި މައްސަލައިގައި ދައުލަތުން 7 މީހެއްގެ މައްޗަށް ދައުވާ ކޮށްފައިވާއިރު، ދައުވާލިބޭ 7 މީހުންވެސް ދައުވާއަށް އިންކާރު ކުރެއެވެ.