އިކޮނޮމިކް ރެސްޕޮންސަށް 1.1 ބިލިއަން ރުފިޔާ ހަރަދު ކޮށްފި

ކޮވިޑް-19 ފެތުރެން ފެށިފަހުން އިކޮނޮމިކް ރެސްޕޮންސަށް 1.1 މިލިއަނަށް ވުރެ ގިނަ ރުފިޔާ ހަރަދު ކޮށްފިއެވެ.

ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުން، މިހާތަނަށް 1142.5 މިލިއަން ނުވަތަ (1.14 ބިލިއަން) ރުފިޔާ ވަނީ ހަރަދުވެފައެވެ. މިއީ މި މަހުގެ 8 ވަނަ ދުވަހާ ހަމައަށް ހަރަދު ކޮށްފައިވާ އަދަދެވެ. މި ފައިސާގެ ތެރެއިން އެންމެ ބޮޑު ބައެއް ހޭދަ ކޮށްފައިވަނީ ކޮވިޑް-19 ރިކަވަރީ ލޯން ސްކީމަށެވެ. އެގޮތުން ލޯން ސްކީމްތަކަށް މިހާތަނަށް އައި އިރު 1 ބިލިއަން ރުފިޔާ ވަނީ ހަރަދުކޮށްފައެވެ.

ކޮވިޑް-19 ރިކަވަރީ ލޯން ސްކީމް ދެނީ ރާއްޖޭގައި ރަޖިސްޓްރީކޮށްފައިވާ ރިސޯޓްތައް އަދި ވިޔަފާރިތަކުގެ ތެރެއިން 2019 ވަނަ އަހަރު 10 މިލިއަން ރުފިޔާއަށްވުރެ އިތުރަށް އާމްދަނީ ލިބިފައިވާ ވިޔަފާރިތަކުން ކޮވިޑް-19 ގެ ބަލިމަޑުކަމާ ގުޅިގެން މާލީ ގޮތުން ނޭދެވޭ އަސަރު ކޮށްފައިވާނަމައެވެ. އަދި މި ސްކީމްގެ ދަށުން ލޯނު ދޫކުރުމަށް ހަމަޖެހިފައިވަނީ ރަހުނަކާ ނުލައި %6 އިންޓަރެސްޓްގައި، ގިނަވެގެން 6 މަސް ދުވަހުގެ ގްރޭސް ޕީރިއަޑްއަކާ އެކުއެވެ.

ރިކަވަރީ ލޯންގެ ގޮތުގައި މިހާތަނަށް ބީއެމްއެލް މެދުވެރިކޮށް 381 ވިޔަފާރިއަކަށް 530 މިލިއަން ރުފިޔާއާއި، 8 މިލިއަން ޑޮލަރު ވަނީ ދޫކޮށްފައެވެ. މީގެ އިތުރުން އެސްޑީއެފްސީ މެދުވެރިކޮށް 1816 ވިޔަފާރިއަކަށް 300.1 މިލިއަން ރުފިޔާ ވަނީ ދޫކޮށްފައެވެ.

ދެން އެންމެ ގިނަ އަދަދަކަށް ހަރަދު ކޮށްފައިވަނީ އިންކަމް ސަޕޯޓް އެލަވަންސަށެވެ. އިންކަމް ސަޕޯޓް އެލަވަންސްގެ ގޮތުގައި 101.2 މިލިއަން ރުފިޔާ ވަނީ ދޫކޮށްފައެވެ. މި މަހުގެ 8 ވަނަ ދުވަހުގެ ނިޔަލަށް 23،908 މީހުން އެދިފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތައް ދައްކައެވެ. އަދި އެލަވަންސަށް އެދުނު މީހުންގެ ތެރެއިން 9639 މީހުންނަށް މިހާރު މި އެލަވަންސް ވަނީ ދޫކޮށްފައެވެ.

އިންކަމް ސަޕޯޓް އެލަވަންސް ދިނުމަށް ސަރުކާރުން ނިންމީ ކޮވިޑް-19 ގެ ސަބަބުން ރާއްޖޭގެ އިގްތިސާދަށް ކުރި އަސަރާއި އެކު ވަޒީފާ ގެއްލުނު މީހުންނަށް އެހީތެރިވުމުގެ ގޮތުންނެވެ. އެގޮތުން މި އެލަވަންސް މެއި މަހުގެ 20 ވަނަ ދުވަހު ދޫކުރަން ފަށާފައިވާ އިރު، އިންކަމް ސަޕޯޓް އެލަވެންސް ދޫކޮށްފައިވާ ކޮންމެ މީހަކަށް ވެސް ގިނަވެގެން ލިބޭނީ 5،000 ރުފިޔާ ކަމަށް ފިނޭންސް މިނިސްޓަރު އިބްރާހިމް އަމީރު ވަނީ ފާހަގަކުރައްވާފައެވެ.

އިކޮނަމިކް ރެސްޕޮންސް ސްޕެންޑިންގެ ތެރެއިން މި މަހުގެ 8 ވަނަ ދުވަހުގެ ނިޔަލަށް ކަރަންޓް ޑިސްކައުންޓުގެ ގޮތުގައި 48.2 މިލިއަން ރުފިޔާ ވަނީ ދޫކޮށްފައެވެ. ނަމަވެސް މެއި މަހުގެ ނިޔަލަށް ކަރަންޓާއި ފެނުގެ ޑިސްކައުންޓުން ޖުމްލަ 10.2 މިލިއަން ރުފިޔާ ވަނީ ހަރަދު ކޮށްފައެވެ.