ޔޮޓު ޓުއާރސް މައްސަލަ: ސިވިލް ކޯޓުން ކޮށްފައިވާ ހުކުމް ތަންފީޒު ކުރުމުގެ ގޮތުން އެއްވެސް ފިޔަވަޅެއް ނޭޅުމަށް ހައިކޯޓުން އަމުރެއް ނެރެފި
ޔޮޓް ޓުއަރސް ކުންފުނީގެ ފަރާތުން ހޯދުމަށް އެދިފައިވަނީ 22،784،837.59 ޑޮލަރު
މިމަހުގެ 11 ވަނަ ދުވަހު، ހައިކޯޓުގައި ކުރިއަށް ދިޔަ ޔޮޓް ޓުއަރސް އާއި އެލައިޑް އިންޝުއަރެންސްގެ މައްސަލައިގެ ޝަރީއަތުގެ އަޑުއެހުމުގެ ތެރެއިން ނަގާފައިވާ ސްކްރީން ފޮޓޯއެއް
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޔޮޓް ޓުއަރސްއަށް 22 މިލިއަން ޑޮލަރު ދެއްކުމަށް އެލައިޑް އިންޝުއަރެންސްގެ މައްޗަށް ސިވިލް ކޯޓުން ކޮށްފައިވާ ހުކުމް ތަންފީޒު ކުރުމުގެ ގޮތުން އެއްވެސް ފިޔަވަޅެއް ނޭޅުމަށް ހައިކޯޓުން އަމުރެއް ނެރެފިއެވެ.
އެލައިޑް އިންޝުއަރެންސް ކުންފުނީގެ މައްޗަށް 22 މިލިއަން ޑޮލަރު ޔޮޓު ޓުއާރސް ކުންފުންޏަށް 6 ދުވަހުގެ ތެރޭގައި ދެއްކުމަށް ސިވިލް ކޯޓުން ހުކުމް ކުރުމާއި ގުޅިގެން އެލައިޑް ކުންފުނިން ވަނީ ހައިކޯޓުގައި އެ މައްސަލަ އިސްތިއުނާފް ކޮށްފައެވެ. އެގޮތުން މި މައްސަލައާ ގުޅިގެން މިމަހުގެ 11 ވަނަ ދުވަހު ހައިކޯޓުގައި ބޭއްވި ފުރަތަމަ އަޑުއެހުމުގައި އެލައިޑު އިންޝޫރެންސް ކުންފުނިން ވަނީ، ހައިކޯޓުގައި އިސްތިއުނާފް ކޮށްފައިވާ މި މަސައްލައަށް ވަކި ގޮތެއް ކަނޑައެޅެންދެން، ސިވިލް ކޯޓުން ކޮށްފައިވާ އެ ހުކުމް ތަންފީޒު ކުރުން ފަސްކޮށްދިނުމުގެ އަމުރަކަށް އެދިފައެވެ.
އެ ވަގުތީ އަމުރު ނެރެދިނުމާއި ގުޅޭ ގޮތުން އިތުރަށް ތަފްސީލު ދެއްވަމުން އެލައިޑް އިންޝުއަރެންސްގެ ގާނޫނީ ވަކީލުން ވަނީ މިފަދަ ބައެއް މައްސަލަތަކުގައި ހައިކޯޓުން ވެސް މީގެކުރިން މިފަދަ އަމުރުތައް ނެރެދެއްވާފައިވާ ކަމަށެވެ. އަދި ރައްދުގައި، ބައެއް ކޯޓުތަކުގެ ނިންމުންތަކަށް ރިއާޔަތްކޮށް ޔޮޓް ޓުއާރސްގެ ގާނޫނީ ވަކީލު ވިދާޅުވީ، ކޮންމެހެން ވަގުތީ އަމުރެއް ނެރެދެންޖެހޭ ސަބަބެއް އޮތް ކަމަށް ނުފެންނަ ކަމަށެވެ.
ހައިކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު މުހައްމަދު ނިޔާޒު ވިދާޅުވީ ވަގުތީ އަމުރާ ގުޅޭގޮތުން ދެ ފަރާތުން ދެއްކެވި ވާހަކަތަކަށާއި ޝަރީއަތަށް ހުށަހެޅިފައިވާ ލިޔެކިޔުންތަކަށް ބެލުމަށްފަހު، ފަނޑިޔާރުންގެ ބެންޗުން ވަކި ގޮތެއް ނިންމުމަށްފަހު، ދެފަރާތަށް ވެސް އަންގަވާނެ ކަމަށެވެ.
ބުރާސްފަތި ދުވަހު ހައިކޯޓުން މިވަނީ އެހުކުމް ތަންފީޒު ކުރުމުގެ ގޮތުން އެއްވެސް ފިޔަވަޅެއް ނޭޅުމަށް ސިވިލް ކޯޓަށް އަންގައި އަމުރު ކޮށްފައެވެ.
މި މައްސަލަ ހައިކޯޓުގައި ބައްލަވަނީ ފަނޑިޔާރު ނިޔާޒުގެ އިތުރުން ފަނޑިޔާރު ޝުއައިބު ހުސައިން ޒަކަރިއްޔާ އާއި ފަނޑިޔާރު ހުސައިން ޝަހީދުއެވެ.
މި މައްސަލައާ ގުޅިގެން އެލައިޑުން އިސްތިއުނާފް ކުރި ނުކުތާތައް އާދިއްތަ ދުވަހުގެ ޝަރީއަތުގެ އަޑުއެހުމަށް ވަނީ ހުށަހަޅާފައެވެ. ދެން އޮންނަ ޝަރީއަތުގެ އަޑުއެހުމުގައި ފުރަތަމަ ކަމަކަށް ކުރިއަށްދާނީ ޔޮޓް ޓުއާރސް ކުންފުނިން އެލައިޑުން ފާހަގަކުރި ނުކުތާތަކަށް ޖަވާބުދާރީ ވުމެވެ.
މި މައްސަލަަކީ، އިންޝުއަރެންސް ކްލެއިމްގެ ގޮތުގައި ބަދަލު ދޭންޖެހޭ ކަމަށް ނިންމައި، އެލައިޑް އިންޝުއަރެންސް މައްޗަށް، ޔޮޓް ޓުއަރސްއަށް 22 މިލިއަން ޑޮލަރު ދެއްކުމަށް ސިވިލް ކޯޓުން ކޮށްފައިވާ ހުކުމާއި ގުޅިގެން، އެލައިޑް އިންޝުއަރެންސުން ހައިކޯޓުގައި އިސްތިއުނާފް ކޮށްފައިވާ މައްސަލައެކެވެ. އަދި މިއީ ހައިކޯޓުގައި މި މައްސަލާގައި ބޭއްވި ފުރަތަމަ އަޑުއެހުމެވެ.
ސިވިލް ކޯޓުން މިދިއަ ޖުލައި މަހުގެ 19 ވަނަ ދުވަހު ކޮށްފައިވާ ހުކުމުގައި ވަނީ، އެލައިޑް އިންޝުއަރެންސްގެ ފަޔަރ އިންޝުއަރެންސް ޕޮލިސީގެ ދަށުން، ޔޮޓް ޓުއަރސް ކުންފުނީގެ ފަރާތުން ހިންގަމުން ދިޔަ ރިސޯޓެއް ކަމަށްވާ ހއ. އަލިދޫ ރިސޯޓުން ދައްކަން ޖެހޭ ފައިސާ ދައްކާފައިވަނިކޮށް، 30 އޯގަސްޓް 2014 އިން 15 ސެޕްޓެމްބަރު 2014 އާ ދެމެދު މޫސުން ވަރަށް ބޮޑަށް ގޯސްވެ، ރާޅުބޮޑުވެ، ކުރިމަތިވި ޤުދުރަތީ ޙާދިސާއެއްގައި އެ ރިސޯޓުގެ މޫދު ރޫމްތަކަށް ބޮޑެތި ގެއްލުންތަކެއް ލިބި އެތަންތަން ބޭނުން ނުކުރެވޭވަރަށް ހަލާކުވެފައިވާ ކަމަށެވެ.
އެ ހާދިސާގައި އަލިދޫ ރިސޯޓަށް ލިބިފައިވާ ގެއްލުންތަކަކީ ދެފަރާތުގެ ދެމެދުގައި ސޮއި ކުރެވިފައިވާ ފަޔަރ އިންޝުއަރެންސް ޕޮލިސީގެ ދަށުން ރައްކާތެރިކަން ލިބެންޖެހޭ ނުރައްކަލަކުން ވެފައިވާ، ގެއްލުންތަކެއް ކަމަށެވެ. އަދި އެ ގެއްލުންތަކަކީ އެލައިޑް އިންޝުއަރެންސް ކުންފުނިން ދޫކޮށްފައިވާ ފަޔަރ އިންޝުއަރެންސް ޕޮލިސީގެ ދަށުން ޔޮޓް ޓުއަރސްއަށް އިންޝުއަރެންސް ކްލެއިމްގެ ގޮތުގައި ބަދަލު ދޭންޖެހޭ ގެއްލުންތަކެއްކަން ހުށަހެޅިފައިވާ ލިޔެކިޔުންތަކުން ޝަރީއަތަކަށް ސާބިތުވާ ކަމަށެވެ.
އެެހެންކަމުން، އެ ޙާދިސާއާ ގުޅިގެން، އަލިދޫ ރިސޯޓަށް ލިބިފައިވާ ގެއްލުމުގެ ބަދަލުގެ ގޮތުގައި، ޔޮޓް ޓުއަރސް ކުންފުނީގެ ފަރާތުން ހޯދުމަށް އެދިފައިވާ 22،784،837.59 ޑޮލަރަކީ އެ ދެފަރާތުގެ ދެމެދު އެކުލަވާލެވުނު އަލިދޫ ރިސޯޓްގެ ފަޔަރ އިންޝުއަރެންސް ޕޮލިސީގައި ބަޔާން ކޮށްފައިވާ ގޮތުގެ މަތީން، އަލިދޫ ރިސޯޓަށް ލިބިފައިވާ ގެއްލުުގެ ބަދަލުގެ ގޮތުގައި އެލައިޑް އިންޝުއަރެންސް ކޮމްޕެނީ އޮފް ދަ މޯލްޑިވްސް ޕްރައިވެޓް ލިމިޓެޑުގެ ފަރާތުން ޔޮޓް ޓުއަރސް މޯލްޑިވްސް ޕްރައިވެޓް ލިމިޓެޑަށް ދޭންޖެހޭ ފައިސާއެއްކަން މަދަނީ މިންގަނޑުން ޝަރީއަތަށް ސާބިތުވާ ކަމަށެވެ.
ސިވިލް ކޯޓުން ކޮށްފައިވާ އެ ހުކުމުގައި ބުނެފައިވަނީ، އެ ފައިސާ ޔޮޓް ޓުއަރސްއަށް ލިބިދިނުމުގެ ގޮތުން، 19 ޖުލައި 2020 ވަނަ ދުވަހުން ފެށިގެން މަދުވެގެން، އެ މަހަކަށް ޖެހޭވަރު، ސިވިލް ކޯޓަށް ފައިސާ ދައްކަމުން ގޮސް، 6 މަސް ދުވަހުގެ ތެރޭގައި. 22،784،837.59 ޑޮލަރު ދައްކާ ހަލާސް ކުރުމަށް އެލައިޑް އިންޝުއަރެންސް ކުންފުނީގެ މައްޗަށް އަންގާ ކަމަށެވެ.
