ކޮވިޑް-19 އިން ރަނގަޅުވެ ތިއާގޯ އާއި މާނޭ ލިވަޕޫލުގެ ފަރިތަކުރުންތަކަށް
14 އޮކްޓޯބަރު 2020 | ބުދަ 10:42ވައިރަހުން ރަނގަޅުވެ އަންގާރަ ދުވަހު ލިވަޕޫލުން ބޭއްވި ފަރިތަކުރުންތަކުގައި ތިއާގޯ އާއި މާނޭ ވަނީ ބައިވެރިވެފައި
މިޑްފީލްޑަރު ތިއާގޯ އަލްކަންޓާރާ އާއި ފޯވާޑް ސަޑިއޯ މާނޭ ލިވަޕޫލުގެ ފަރިތަކުރުންތަކުގައި
ސްޕެއިނުގެ މިޑްފީލްޑަރު ތިއާގޯ އަލްކަންޓާރާ އާއި ސެނެގާލްގެ ފޯވާޑް ސަޑިއޯ މާނޭ ކޮވިޑް-19 އިން ރަނގަޅުވެ ލިވަޕޫލުގެ ފަރިތަކުރުންތަކުގައި ބައިވެރިވާން ފަށައިފިއެވެ.
ތިއާގޯ އާއި މާނޭގެ ތެރެއިން އެންމެ ފުރަތަމަ ކޮވިޑް-19 އަށް ޕޮޒިޓިވްވީ ތިއާގޯއެވެ. އެގޮތުން މިދިޔަ ސެޕްޓެމްބަރު މަހުގެ 29 ވަނަ ދުވަހު ލިވަޕޫލުން ވަނީ ތިއާގޯ ކޮވިޑް-19 އަށް ޕޮޒިޓިވްވިކަން ހާމަކޮށްފައެވެ. އަދި އޭގެ ފަހުން މި މަހުގެ ދެވަނަ ދުވަހު ލިވަޕޫލުން ވަނީ މާނޭ ކޮވިޑް-19 އަށް ޕޮޒިޓިވްވިކަން ހާމަކޮށްފައެވެ.
ލިވަޕޫލުން އޭރު ނެރުނު ބަޔާނުގައި ވަނީ އެ ދެ ކުޅުންތެރިންގެ ހަށިގަނޑުންވެސް ވައިރަހުގެ އަލާމާތްތަކެއް ފެނުނު ކަމަށާއި، އެއާއެކު ދެ ކުޅުންތެރިންވެެސް އައިސޮލޭޓްވި ކަމަށް ބުނެފައެވެ.
މާނޭ އާއި ތިއާގޯ ނުލާ އިނގިރޭސި ޕްރިމިއާ ލީގުގައި އެންމެ ފަހުގެ ޗެމްޕިއަން ލިވަޕޫލުން އެސްޓަން ވިލާއާ ދެކޮޅަށް ނުކުތްއިރު، އެ މެޗުން ލިވަޕޫލް ވަނީ ލަދުވެތިގޮތަކަށް 7-2 ގެ ތަފާތު ބޮޑު ނަތީޖާއަކުން ބަލިވެފައެވެ. މިއީ 1963 ވަނަ އަހަރުގެ އޭޕްރީލް މަހަށްފަހު ލިވަޕޫލް ކޮޅަށް ހަތް ލަނޑު ވަން ފުރަތަމަ މެޗެވެ.
ބައިނަލްއަގުވާމީ މެޗުތަކަށްފަހު ޕްރިމިއާ ލީގުގައި ލިވަޕޫލުން ކުޅޭ ފުރަތަމަ މެޗުގައި އަންނަ ހޮނިހިރު ދުވަހުގެ ހަވީރު ޑާބީ މެޗުގައި އެވަޓަނާ ދެކޮޅަށް ނުކުންނާނެއެވެ. އެ މެޗަށް ތައްޔާރުވުމަށް ލިވަޕޫލުން ދާދި ފަހުން ކުރިއަށްގެންދިޔަ ފަރިތަކުރުންތަކުގައި ތިއާގޯ އާއި މާނޭ ބައިވެރިވެފައިވާއިރު، ރިޕޯޓުތައް ބުނާ ގޮތުން އެ މެޗުގައި އެ ދެ ކުޅުންތެރިންވެސް ފެނިގެންދާނެއެވެ.
ލީގު ތާވަލަށް ބަލާއިރު، އެންމެ ފަހުގެ ޗެމްޕިއަން ލިވަޕޫލް އޮތީ ތާވަލުގެ ފަސްވަނައިގައި ކުޅުނު ހަތަރު މެޗުން ލިބުނު ނުވަ ޕޮއިންޓާއެކުއެވެ. އެއްވަނައިގައި ކުޅުނު ހަތަރު މެޗުން 12 ޕޮއިންޓާއެކު އޮތީ އެވަޓަނެވެ. އެވަޓަނުން މިހާތަނަށް ކުޅުނު ހަތަރު މެޗުންވެސް މޮޅުވެފައިވާއިރު، އެ ޓީމުން އަންނަނީ މި ސީޒަނުގައި މޮޅު ކުޅުމެއް ދައްކަމުންނެވެ.
