އާޖެންޓީނާ އާއި ބްރެޒިލަށް މޮޅެއް

ދެކުނު އެމެރިކާގެ ފީފާ ވޯލްޑް ކަޕް ކޮލިފައިންގ ބުރުގައި އަންގާރަ ދުވަހުގެރޭ ބޮލިވިއާ އަތުން އާޖެންޓީނާ ހަނިގޮތަކަށް މޮޅުވިއިރު، ނޭމާގެ ހެޓްރިކާއެކު ޕެރޫ އަތުން ބްރެޒިލް މޮޅުވެއްޖެއެވެ.

އަންގާރަ ދުވަހުގެރޭ ބޮލިވިއާގައި ކުޅުނު މެޗުން އާޖެންޓީނާ މޮޅުވީ ފަހަތުން އަރައި 2-1 ންނެވެ.

މި މެޗުގެ ކުރީކޮޅު ބޮލިވިއާއިން ރަނގަޅު ކުޅުމެއް ދެއްކިއިރު، މެޗުގެ 24 ވަނަ މިނެޓުގައި އެ ގައުމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން މޮރޭނޯ މާޓިންސްއެވެ.

އެކަމަކު އާޖެންޓީނާއިން ވަނީ ފުރަތަމަ ހާފު ނިމުމުގެ ކުރިން ނަތީޖާ އެއްވަރުކޮށްފައެވެ. ފުރަތަމަ ހާފުގެ އިތުރު ވަގުތުގައި އާޖެންޓީނާއަށް ނަތީޖާ އެއްވަރުކޮށްދިނީ ފޯވާޑް ލަޓާރޯ މާޓިނޭޒެވެ. މިއީ 2016 ގެ ފަހުން ވޯލްޑް ކަޕް ކޮލިފައިންގައި އާޖެންޓީނާއަށް އެ ގައުމުގެ ކެޕްޓަން ލިއޮނަލް މެސީ ނޫން ކުޅުންތެރިއަކު ލަނޑު ޖެހި ފުރަތަމަ ފަހަރެވެ.

މި މެޗުން އާޖެންޓީނާ މޮޅުވީ މެޗުގެ 79 ވަނަ މިނެޓުގައި ޔޯކުއީން ކޮރޭއާ ކާމިޔާބުކުރި ލަނޑުންނެވެ. އޭނާ މި ލަނޑު ޖެހީ މާޓިނޭޒްގެ އެހީއާއެކުއެވެ.

މީގެ އިތުރުން ދެކުނު އެމެރިކާގެ ފީފާ ވޯލްޑް ކަޕް ކޮލިފައިންގ ބުރުގައި އަންގާރަ ދުވަހުގެރޭ ޕެރޫ އަތުން ބްރެޒިލް މޮޅުވީ 4-2 ންނެވެ.

ޕެރޫގައި ކުޅުނު މި މެޗުގެ ވަރަށް ކުރީކޮޅު އެ ގައުމުން ވަނީ ލީޑު ނަގާފައެވެ. މެޗުގެ ހަ ވަނަ މިނެޓުގައި މި ލަނޑު ޕެރޫއަށް ކާމިޔާބުކޮށްދިނީ އަންދްރޭ ކަރީއްޔޯއެވެ. އެކަމަކު މެޗުގެ 28 ވަނަ މިނެޓުގައި ލިބުނު ޕެނަލްޓީއަކުން ނޭމާ ވަނީ ބްރެޒިލަށް ނަތީޖާ އެއްވަރުކޮށްދީފައެވެ.

މެޗުގެ ފުރަތަމަ ހާފު ނިމުނުއިރު ދެ ޓީމު އެއްވަރުވެފައި އޮތް ނަމަވެސް، ދެވަނަ ހާފު ފަށައިގެން 14 ވަނަ މިނެޓުގައި ރެެެނާޓޯ ޓަޕިއާގެ ލަނޑުން ޕެރޫން ވަނީ މެޗުގައި އަލުން ލީޑު ނަގާފައެވެ. އޭގެ ފަސް މިނެޓު ފަހުން ބްރެޒިލުން އަނެއްކާވެސް ނަތީޖާ އެއްވަރުކުރީ ރިޗާލިސަން ޖެހި ލަނޑުންނެވެ. އަދި މެޗުގެ 83 ވަނަ މިނެޓުގައި ނޭމާ ވަނީ ޕެނަލްޓީއަކުން ބްރެޒިލަށް މެޗުގައި ފުރަތަމަ ފަހަރަށް ލީޑު ނަގައިދީފައެވެ.

އޭގެ ފަހުން ޕެރޫގެ ދެ ކުޅުންތެރިއަކަށް ވަނީ ސީދާ ރަތް ކާޑު ދައްކާފައެވެ. އެއީ އެ ޓީމު ކާލޮސް ކެސޭޑާ އާއި ކާލޮސް ޒަމްބްރާނޯއަށެވެ. މި މެޗުގައި ނޭމާ އޭނާގެ ހެޓްރިކް ފުރިހަމަކޮށްފައިވަނީ އިތުރު ވަގުތުގައި ޖެހި ލަނޑާއެކުއެވެ.

މި ހެޓްރިކާއެކު ނޭމާ ވަނީ ބްރެޒިލުގެ ގައުމީ ޓީމަށް 64 ލަނޑު ޖަހައިދީ، ބްރެޒިލަށް ދެވަނައަށް އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު ހޯދާފައެވެ. ލަނޑު ލިސްޓުގެ ދެވަނައަށް ނޭމާ ޖެހިލީ 62 ލަނޑު ޖަހާފައިވާ ލެޖެންޑަރީ ފޯވާޑް ރޮނާލްޑޯ ނަޒާރިއޯ ފަހަތަށް ޖައްސާލުމަށްފަހުއެވެ. މި ލިސްޓުގެ އެއްވަނައިގައި އޮތީ 77 ލަނޑު ޖަހައިގެން ފުޓްބޯޅަ ލެޖެންޑް ޕެލޭއެވެ.