ޕޮޗެޓީނޯއަށް މެންޗެސްޓާގެ ދެ ކުލަބުން ފާރަލަނީ
11 އޮކްޓޯބަރު 2020 | އާދީއްތަ 11:51ނޮވެންބަރު މަހު ޓޮޓެންހަމުގެ ކޯޗުގެ މަގާމުން ވަކިކުރި ޕޮޗެޓީނޯ އަދި ޓީމަކާ ހަވާލުވެފައެއް ނުވޭ
ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯ
ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯއަށް މެންޗެސްޓާ ސިޓީ އާއި މެންޗެސްޓާ ޔުނައިޓެޑުން ފާރަލަމުން އަންނަ ކަމަށް ރިޕޯޓުތައް ބުނެފިއެވެ.
މިދިޔަ އަހަރުގެ ނޮވެންބަރު މަހު ޓޮޓެންހަމުގެ ކޯޗުގެ މަގާމުން ވަކިކުރި ޕޮޗެޓީނޯ އަދި ޓީމަކާ ހަވާލުވެފައެއް ނުވެއެވެ. ޕޮޗެޓީނޯ ޓޮޓެންހަމުގެ ކޯޗުގެ މަގާމުން ވަކިކޮށްފައިވަނީ ފަސް އަހަރަށް ފަހުއެވެ. އޭނާ ވަނީ އެ ޓީމުގައި ކާމިޔާބު މަސައްކަތްތަކެއް ކޮށްފައެވެ. އެގޮތުން އެ ޓީމަށް އަލަށް ޔުއެފާ ޗެމްޕިއަންސް ލީގުގެ ފައިނަލުން ފުރުސަތު ހޯދައިދީ ރަނގަޅު ޓީމެއް އެކުލަވާލިއެވެ.
ރިޕޯޓުތައް ބުނާ ގޮތުން ޔުނައިޓެޑުން އަންނަނީ އެ ޓީމުގެ މިހާރުގެ ކޯޗު އޮލެ ގުނަ ސޯލްޝެއާގެ ބަދަލުގައި ޕޮޗެޓީނޯ ގެނައުމަށް މަސައްކަތް ކުރަމުންނެވެ. އެގޮތުން މި ފަހަކަށް އައިސް ޔުނައިޓެޑުން ނެރެމުން އަންނަ ދަށް ނަތީޖާތަކުގެ ސަބަބުން އެ ޓީމުގެ މެނޭޖުމަންޓުން ސޯލްޝެއާ ވަކިކޮށް އައު ކޯޗެއް ހޯދުމަށް މިހާރު މަސައްކަތް ކުރަމުން އަންނަ ކަމަށްވެސް ވަނީ ރިޕޯޓުކޮށްފައެވެ.
މީގެ އިތުރުން ސިޓީން ޕޮޗެޓީނޯއަށް ފާރަލަމުން އަންނަނީ އެ ޓީމުގެ މިހާރުގެ ކޯޗު ޕެޕް ގާޑިއޯލާގެ އެއްބެސްވުން ހަމަވުމުން ޕޮޗެޓީނޯ ގެނައުމަށެވެ. ގާޑިއޯލާ މި ވަގުތު ސިޓީގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށެވެ.
އުމުރުން 48 އަހަރުގެ ޕޮޗެޓީނޯ ހޯދުމަށް ސިޓީ އާއި ޔުނައިޓެޑުންވެސް މަސައްކަތް ކުރަމުން އަންނައިރު، މީގެ ކުރިން އޭނާ ހޯދުމަށް ބާސެލޯނާ އާއި ރެއާލް މެޑްރިޑުންވެސް ވަނީ މަސައްކަތް ކޮށްފައެވެ. އޭގެ ތެރެއިން ބާސާއިން ވަނީ އެ ޓީމުގެ ކޯޗަކަށް ރޮނާލްޑް ކޫމަން ހަމަޖެއްސުމުގެ ކުރިން ޕޮޗެޓީނޯއާއެކު މަޝްވަރާ ކޮށްފައެވެ.
އެކަމަކު ދާދި ފަހުން ޕޮޗެޓިނޯ ވަނީ އަނބުރާ އިނގިރޭސި ޕްރިމިއާ ލީގާ ގުޅެން ބޭނުންވާކަން ހާމަކޮށްފައެވެ. އެހެންކަމުން ޕޮޗެޓީނޯ ބަދަލުވުން އެންމެ ގާތީ ޔުނައިޓެޑަށް ކަމަށް ރިޕޯޓުތައް ބުނެއެވެ.
