މެޗުގެ ނިސްބަތުން ދުނިޔޭގެ ލަނޑު ލިސްޓުގެ ދެވަނަ ދަގަނޑޭއަށް

މި ވަގުތު ފުޓްބޯޅަ ކުޅޭ ކުޅުންތެރިންގެ ތެރެއިން، މެޗުގެ ނިސްބަތުން ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިންގެ ލިސްޓުގެ ދެވަނަ ރާއްޖޭގެ އަލީ އަޝްފާގު (ދަގަނޑޭ) ހޯދައިފިއެވެ.

ދަގަނޑޭ ދެވަނައިގައި އޮތީ ކްރިސްޓިއާނޯ ރޮނާލްޑޯ އާއި، ލިއޮނަލް މެސީ އާއި، ނޭމާ ފަދަ ކުޅުންތެރިން ފަހަތަށް ޖައްސާލުމަށްފަހުއެވެ.

މެޗުގެ ނިސްބަތުން ލަނޑު ލިސްޓުގެ ދެވަނަ ދަގަނޑޭއަށް ލިބޭއިރު، މީގެ ކުރިން 2018 ވަނަ އަހަރުގެ ޖެނުއަރީ މަހު އޭނާ މި ލިސްޓުގެ އެއްވަނައިގައި އޮތެވެ. އެކަމަކު އެ އަހަރުގެ މާޗު މަހުން ފެށިގެން ދަގަނޑޭ ގައުމީ ޓީމުން ސަސްޕެންޑް ކުރުމާ ގުޅިގެން އޭނާއަށް ގިނަ މެޗުތަކެއް ގެއްލުނެވެ. އެ ސަސްޕެންޝަން އުވާލީ މިދިޔަ އަހަރުގެ ސެޕްޓެމްބަރު މަހު ފީފާ ވޯލްޑް ކަޕް އަދި އޭއެފްސީ އޭޝިއަން ކަޕުގެ ޖޮއިންޓް ކޮލިފައިންގައި މާލޭގައި ޗައިނާއާ ދެކޮަޅަށް ކުޅުނު މެޗުންނެވެ.

"ގިވްމީސްޕޯޓްސް" ވެބްސައިޓުން އާންމުކުރި ތަފާސްހިސާބުތަކަށް ބަލާއިރު މެޗުގެ ނިސްބަތުން ދުނިޔޭގެ ލަނޑު ލިސްޓުގެ އެއްވަނައިގައި އޮތީ ޔޫއޭއީގެ އަލީ މަޚްތޫބެވެ. އޭނާ ވަނީ 83 މެޗުގައި 63 ލަނޑު ޖަހާފައެވެ. ދެވަނައިގައި އޮތް ދަގަނޑޭ ވަނީ 80 މެޗުން 53 ލަނޑު ޖަހާފައެވެ. އަދި ތިންވަނައިގައި އޮތީ 115 މެޗުން 72 ލަނޑު ޖަހާފައިވާ ސުނިލް ޗެތުރީއެވެ. މި ލިސްޓުގެ ހަތަރުވަނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯއަށް ލިބޭއިރު، އާޖެންޓީނާގެ ކެޕްޓަން ލިއޮނެލް މެސީ އޮތީ 10 ވަނައިގައެވެ.

މިހާރު ކުޅެމުން އަންނަ ކުޅުންތެރިންގެ ތެރެއިން ބައިނަލްއަގުވާމީ އެންމެ ގިނަ ލަނޑު ޖެހި ކުޅުންތެރިންގެ ލިސްޓުގައި ދަަގަނޑޭ އޮތީ 10 ވަނައިގައެވެ. އެ ލިސްޓުގެ އެއްވަނައިގައި އޮތީ 101 ލަނޑު ޖަހައިގެން ރޮނާލްޑޯއެވެ. ދެވަނައިގައި 72 ލަނޑު ޖަހާފައިވާ ޗެތުރީ އޮތްއިރު، ތިންވަނައިގައި އޮތީ 71 ލަނޑު ޖަހާފައިވާ މެސީއެވެ.

ދަގަނޑޭ މިހާތަނަށް ގައުމީ ޓީމަށް 53 ލަނޑު ޖަހާފައިވާއިރު، އޭނާ ގައުމީ ޓީމަށް ކުޅެން ފެށީ 2004 ވަނަ އަހަރެވެ. ގައުމީ ޓީމަށް ކުޅުނު ފުރަތަމަ މެޗުގައި ދަގަނޑޭ ވަނީ 2004 ވަނަ އަހަރު ވޯލްޑް ކަޕް ޕްރީ-ޕްރިމިލަނަރީގައި މާލޭގައި މޮންގޯލިއާއާ ދެކޮޅަށް ކުޅުނު މެޗުގައި ހަތަރު ލަނޑު ޖަހައިގެން އެއް މެޗެއްގައި ގައުމީ ޓީމަށް އެންމެ ގިނަ ލަނޑު ޖެހި ކުޅުންތެރިޔާގެ ރިކޯޑު ހަދާފައެވެ.

ސާފް ޗެމްޕިއަންޝިޕުގައި މިހާތަނަށް 20 ލަނޑު ޖަހައިގެން އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދާފައިވާ ދަގަނޑޭ ވަނީ ރާއްޖޭގެ މޮޅު ކުޅުންތެރިޔާގެ މަގާމު މިހާތަނަށް ހަ ފަހަރު ހޯދާފައެވެ. ދަގަނޑޭ އަކީ މި އެވޯޑު އެންމެ ގިނައިން ހޯދި ދިވެހި ކުޅުންތެރިޔާއެވެ.