ހުކުރު ދުވަހު 1160 ފަސިންޖަރުން ރާއްޖެ އައިސްފައިވާއިރު އޭގެ ތެރެއިން 345 ފަސިންޖަރުން އައި އެއިރޯފްލޮޓުން: ވީއައިއޭ
11 އޮކްޓޯބަރު 2020 | އާދީއްތަ 07:55133 ފަސިންޖަރުން ރާއްޖެއިން ފުރާފައިވޭ
އެއިރޯފްލޮޓްގެ ފްލައިޓެއް
ހުކުރު ދުވަހު 1160 ފަސިންޖަރުން ރާއްޖެ އައިސްފައިވާ ވެލާނާ އިންޓަރނޭޝަނަލް އެއަރޕޯޓަށް އައިސްފައިވާ ކަމަށް ވޭލާނާ އިންޓަރނޭޝަނަލް އެއަރޕޯޓް (ވީއައިއޭ) އިން ބުނެފިއެވެ.
ރާއްޖެޓީވީގެ ފަށާއިރު ޕްރޮގްރާމްގައި ހޮނިހިރު ދުވަހު ވާހަކަ ދައްކަވަމުން ވީއައިއޭގެ ޓާމިނަލް އޮޕަރޭޝަންސްގެ ޖެނެރަލް މެނޭޖަރ އިބްރާހިމް ހުސެއިން ވިދާޅުވީ ރާއްޖެއަށް އެ އަދަދަށް ފަސިންޖަރުން އައިސްފައިވާއިރު 133 ފަސިންޖަރުން ރާއްޖެއިން ފުރާފައިވާ ކަމަށެވެ. އަދި އޭގެ ތެރެއިން 345 ފަސިންޖަރުން އައިސްފައިވަނީ އެއިރޯފްލޮޓްގެ ފްލައިޓުން ކަަމަށްވެސް އޭނާ ވިދާޅުވިއެވެ.
ޑޮމެސްޓިކް އޮޕަރޭޝަންތަކުގެ ތަފްސީލު ހާމަކުރައްވަމުން އިބްރާހިމް ހުސެއިން ވިދާޅުވީ 11 ފްލައިޓް އޮޕަރޭޓް ކޮށްފައިވާ ކަމަށެވެ. އެއީ މޯލްޑިވިއަންއިން ނުވަ ފްލައިޓަކާއި ފްލައިމީގެ ދެ ފްލައިޓް ކަަމަށެވެ. އެ ފްލައިޓްތަކުން ޖުމްލަ 200 ފަސިންޖަރުން އެއަރޕޯޓަށް އައިސްފައިވާއިރު އެއަރޕޯޓުން 251 ފަސިންޖަރުން ފުރާފައިވާ ކަމަށް އިބްރާހިމް ހުސެއިން ވިދާޅުވިއެވެ.
މޯޑިވިއަން އިން ޑާކާ އަށް ސީދާ ދަތުރުތައް ސެޕްޓެމްބަރު މަހުގެ ތެރޭގައި ވަނީ ފަށާފައެވެ. ހަފްތާއަކު ތިން ދުވަހު ޑާކާއަށް ސީދާ ދަތުރުތައް ކުރަމުން އަންނައިރު ހުކުރު ދުވަހު 129 ބަންގްލަދޭޝް ރައްޔިތުން މޯލްޑިވިއަންގެ ފްލައިޓްގައި ޤައުމަށް ގޮސްފައިވާ ކަމަށް ވެސް ވެލާނާ އިންޓަރނޭޝަނަލް އެއަރޕޯޓުން ބުންޏެވެ.
ވެލާނާ އިންޓަރނޭޝަނަލް އެއަރޕޯޓުން ހުކުރު ދުވަހު ތިން ޖެޓް އޮޕަރޭޓް ކޮށްފައިވާކަން ފާހަގަކުރައްވާ އިބްރާހިމް ހުސެއިން ވިދާޅުވީ ޔޫއޭއީ އާއި މާލެއާ ދޭތެރޭގައި ދެ ޖެޓް، ގަތަރާއި ދޯހާ އަދި މާލެއާ ދޭތެރޭގައި އެއް ޖެޓް އޮޕަރޭޓް ކޮށްފައިވާ ކަމަށެވެ.
އަދި އެ ދުވަހު 44.91 ޓަނުގެ މުދާ ރާއްޖެ ގެނެސްފައިވާއިރު 37.27 ޓަނުގެ މުދާ ރާއްޖެއިން ބޭރުކޮށްފައިވެއެވެ.
