100 ކިލޯގެ މަސްތުވާތަކެތީގެ މައްސަލަ: އިތުރު ތިން މީހަކު ޝަރީއަތް ނިމެންދެން ބަންދުކޮށް، ވަނަވަރު އާންމުކޮށްފި
10 އޮކްޓޯބަރު 2020 | ހޮނިހިރު 10:33އެންމެ ފުރަތަމަ މިމައްސަލާގައި ހައްޔަރުކުރީ 14 މީހުން ނަމަވެސް ފަހުން ދެ މީހަކު ހައްޔަރުކޮށް ޖުމްލަ 16 މީހަކު ހައްޔަރުކުރި
އައްޑޫގައި ހިންގި މަސްތުވާތަކެތީގެ ބޮޑު އޮޕަރޭޝަނުގައި ހައްޔަރުކުރި މީހުގެ ތެރެއިން ޝަރީއަތް ނިމެންދެން ފަހުން ބަންދުކުރި ތިން މީހުން
އައްޑޫ ސިޓީގައި ހިންގި މަސްތުވާތަކެތީގެ ހާއްސަ އޮޕަރޭޝަނުގައި ހައްޔަރުކުރި މީހުންގެ ތެރެއިން އިތުރު 3 މީހަކު ޝަރީއަތް ނިމެންދެން ބަންދުކޮށްފިއެވެ.
ފުލުހުންގެ މީޑިއާއިން ބުނީ، ޝަރީއަތް ނިމެންދެން ބަންދުގައި ބެހެއްޓުމަށް އަމުރުކޮށްފައިވަނީ ސ. ހިތަދޫ، ފިނިފަރު، ހަސަން އާމިރު (25އ) އާއި ސ. ހިތަދޫ، ބުލޫބާރޑް، ހޫދު ލަތީފް (24އ) އާއި ސ. ހިތަދޫ، މަންދޫބުގެ، ޙުސައިން ސިމާޙު (27އ) އެވެ.
މި މީހުންގެ ތެރޭގައި ހިމެނޭ ހޫދު ލަތީފް އަކީ މިމައްސަލައާ ގުޅިގެން އޮކްޓޫބަރު 7 ވަނަ ދުވަހުގެ ވަގުތެއްގައި ހައްޔަރުކޮށް، އެދުވަހު ކޯޓަށް ހާޒިރުކުރުމުން ޝަރީއަތް ނިމެންދެން ބަންދުގައި ބެހެއްޓުމަށް އަމުރުކޮށްފައިވާ މީހެކެވެ. އަދި އަނެއް ދެ މީހުން ޝަރީއަތް ނިމެންދެން ބަންދުގައި ބޭތިއްބުމަށް އަމުރުކޮށްފައިވަނީ އެ ދެ މީހުންގެ ބަންދާމެދު ގޮތެއް ނިންމުމަށް ހުކުރު ދުވަހު ކޯޓަށް ހާޒިރުކުރުމުން ކަމަށް ފުލުހުން ބުނެއެވެ.
މި ތިން މީހުންނާއެކު ޖުމްލަ 5 މީހަކަށް ވަނީ ޝަރީއަތް ނިމެންދެން ބަންދުގައި ބެެހެއްޓުމަށް އަމުރުކޮށްފައެވެ. މީގެ ކުރިން މި މައްސަލަގައި ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން އަމުރުކުރީ، ސ. ހިތަދޫ، ފިނިފަރު، ޢަބްދުﷲ އިބްރާހިމް (33އ) އާއި ސ. ހިތަދޫ، ކޯޅި، މުޙައްމަދު ޔާމީން ނަޞީރު (23އ) އަށެވެ.
އޮކްޓޫބަރު 1 ވަނަ ދުވަހުން ފެށިގެން އައްޑޫ ސިޓީގައި ފުލުހުން ހިންގި މަސްތުވާތަކެތީގެ މި އޮޕަރޭޝަނުގައި ޖުމްލަ 16 މީހަކު ހައްޔަރުކޮށްފައިވާއިރު، މި މައްސަލައާ ގުޅިގެން ފަހުން ހައްޔަރުކުރި ދެ މީހުން ހައްޔަރުކޮށްފައިވަނީ އޮކްޓޫބަރު 5 އަދި 7 ވަނަ ދުވަހުގެ ވަގުތެއްގަ ކަމަށެވެ. އެ ދެ މީހުންގެ ތެރެއިން އެކަކު ހައްޔަރުކޮށްފައިވަނީ އޮކްޓޫބަރު 5 ވަނަ ދުވަހުގެ ވަގުތެއްގައެވެ. އަދި އޮކްޓޫބަރު 7 ވަނަ ދުވަހު ހައްޔަރުކޮށްފައިވަނީ ހޫދު ލަތީފް ކަމަށްވެސް ފުލުހުން ބުނެފައި ވެއެވެ. މި މައްސަލައާ ގުޅިގެން ހައްޔަރުކުރި މީހުންގެ ތެރެއިން ތަހުގީގަށް އިތުރަށް ބަންދުގައި ބައިތިއްބަން ނުފެންނާތީ 8 މީހަކު ވަނީ ދޫކޮށްލާފައެވެ.
ބޭރުގެ ބަޔަކާ ގުޅިގެން ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރަން އުޅުނު މައްސަލައިގައި އިސްކޮށް ހަރަކާތްތެރިވީ މި މައްސަލާގައި ހައްޔަރުކޮށްފައިވާ ޢަބްދުﷲ އިބްރާހީމް (އަބުޗާ) ކަމަށް ފުލުހުން ވަނީ ބުނެފައެވެ. އަދި މިއީ ދިވެހި ފުލުހުންނަށް ލިބުނު އިންޓެލިޖެންސް މައުލޫމާތަކާއި ގުޅިގެން ޑީއީޑީ، މެރިން ޕޮލިސް އަދި ސައުތު ޕޮލިސް ޑިވިޝަންގައި ގާއިމްވެތިބީ އެސްއޯ ފުލުހުންނާއި އާންމު ފުލުހުން ބައިވެރިވެގެން ހިންގި އޮޕަރޭޝަނެކެވެ. މި ހާއްސަ އޮޕަރޭޝަންގައި އަތުލައިގަތް މަސްތުވާތަކެތީގެ ވަގުތީ ބަރުދަނުގައި 98.6 ކިލޯގެ ހުރިކަމަށް ފުލުހުން ވަނީ ހާމަކޮށްފައެވެ.
