ބޮލިވިއާ ބަލިކޮށް ބްރެޒިލަށް ރަނގަޅު ފެށުމެއް

ބޮލިވިއާ ބަލިކޮށް ބްރެޒިލުން ދެކުނު އެމެރިކާގެ ފީފާ ވޯލްޑް ކަޕް ކޮލިފައިންގ ބުރުގައި ފެށުން ރަނގަޅުކޮށްފިއެވެ.

ހޮނިހިރު ދުވަހުގެ ފަތިހު ބްރެޒިލުގައި ކުޅުނު މެޗުން ބޮލިވިއާގެ މައްޗަށް އެ ގައުމު ކުރިހޯދީ 5-0 ގެ ތަފާތު ބޮޑު ނަތީޖާއަކުންނެވެ.

މި މެޗުގައި ބްރެޒިލުން މޮޅު ކުޅުމެއް ދެއްކިއިރު، މެޗު ފަށައިގެން 6 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ޑެނީލޯގެ އެހީއާއެކު މި ލަނޑު ބްރެޒިލަށް ކާމިޔާބުކޮށްދިނީ މާކީނީއޯސްއެވެ. އަދި ފުރަތަމަ ހާފު ނިމުމުގެ ކުރިން މެޗުގެ 30 ވަނަ މިނެޓުގައި ރެނާން ލޮޑީގެ އެހީއާއެކު ރޮބާޓޯ ފިރްމީނޯ ވަނީ ބްރެޒިލަށް ލީޑު ފުޅާކޮށްދީފައެވެ.

މި މެޗުގެ ދެވަނަ ހާފުގައިވެސް ބްރެޒިލުން ރަނގަޅު ކުޅުމެއް ދެއްކިއިރު، މި ހާފު ފަށައިގެން ހަތަރުވަނަ މިނެޓުގައި ފިރްމީނޯ ވަނީ ބްރެޒިލުގެ ތިންވަނަ ލަނޑު ޖަހާފައެވެ. އަދި މެޗުގެ 66 ވަނަ މިނެޓުގައި ބްރެޒިލުން އިތުރު ލަނޑެއް ކާމިޔާބުކުރިއިރު، މި ލަނޑަކީ ބޮލިވިއާގެ ހޯސޭ މާރިއޯ ކަރަސްކޯ އަތުން ބައިކޮޅަށް ވަން ލަނޑެކެވެ.

މި މެޗުގައި ބްރެޒިލުން ކާމިޔާބުކުރި ފަސްވަނަ ލަނޑު ޖަހާފައިވަނީ މެޗުގެ 73 ވަނަ މިނެޓުގައެވެ. ނޭމާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ފިލިއްޕޭ ކުޓީނިއޯއެވެ.

ދެކުނު އެމެރިކާގެ ފީފާ ވޯލްޑް ކަޕް ކޮލިފައިންގ ބުރުގައި ކުޅުނު ފުރަތަމަ މެޗުން ބްރެޒިލް ފަސޭހަ މޮޅެއް ހޯދިއިރު، ކޮލިފައިންގައި ކޮލަމްބިއާ ވަނީ 3-0 ން ވެނެޒުއޭލާ ބަލިކޮށްފައެވެ.

ކޮލިފައިންގައި ދެން ބްރެޒިލުން މެޗެއް ކުޅޭނީ އަންނަ ބުދަ ދުވަހުގެ ފަތިހުއެވެ. އެ ދުވަހު ބްރެޒިލް ނުކުންނާނީ ޕެރޫއާ ދެކޮޅަށެވެ.